Isaiah 63

Bêc Anôtô êmêtôc lauŋa

(Anôtô agêc propete sêjam biŋgalôm sêwiŋ tauŋ)

“Asa tê gêmêŋ aŋga Edom, gêmêŋ aŋga malac Bosra tonê ŋakwê kêtu koc samucgeŋ ma nê obo ŋawasi sec ma kêsêlêŋ toŋaclaigeŋ.”

“Aê, aê tauc tec kasôm biŋgêdêŋ lasê ma aêŋoc ŋaclai kapôêŋ kêtôm gebe janam lau kêsiŋa.”

“Nêm ŋakwê kêtu koc samucgeŋ kêtu asageŋŋa ma nêm obo kêtôm lau-sêka-wain-popocwaga * nêŋ kêtu asageŋŋa.”

“Aê taucgeŋ kaka wain popoc, lau teŋ sêmoa sêwiŋ aê atom. Aê kaka êsêac totêtac ŋandaŋgeŋ, kaka êsêac gaim taucgeŋ totêtac ŋandaŋ sec, tec êsêacnêŋ dec ŋakasi-kasi mêŋkêpi ŋoc ŋakwê ma gêjam ŋoc obo samob auc. Gebe ŋoc ŋalêlôm taê gêjam bêc jakac kamocgôcŋa kêtu tôŋ su ma ŋoc jala jakêŋ ŋagêjôŋa mêŋgêô lasê su. Aê matoc geso gamêŋ, mago katap ŋac ênam aê saŋa teŋ sa atom. Aê katakê gebe ŋac êpuc aê tôŋŋa teŋ gêmoa atom. Tec tauc lemoc kaku ŋacjo tulu ma ŋoc têtac ŋandaŋ kêpuc aê tôŋ. Aê kaka tenteŋlatu tôŋ totêtac ŋandaŋgeŋ ma kamakiŋ êsêac popoc totêtac secgeŋ ma kakêc êsêacnêŋ dec siŋ kêsêp nom.”

Anôtônê moasiŋ gêdêŋ Israel

Aê oc jalambiŋ Apômtaunê têtac gêwiŋ teŋgeŋŋa
ma jalambiŋ gêŋsêga, taŋ Apômtau gêgôm gêdêŋ aêac naŋ.
Eŋ kêkêŋ nê moasiŋ kapôêŋ gêdêŋ gôlôac Israelŋa
kêtu taê walô êsêacŋa ma kêtu nê têtac gêwiŋ teŋgeŋŋaŋa.
Eŋ kêsôm gebe “Biŋŋanô, aêŋoc lau tonec,
ŋoc latuci, taŋ oc sênsau aê atom naŋ.”
Tec eŋ kêtu êsêacnêŋ kêsiwaga kêtu nêŋ gêŋwapac samobŋa.
Jaeŋwaga me aŋela gêjam êsêac kêsi atom,
eŋ tau gêmoa gêwiŋ êsêac, tec gêjam êsêac kêsi.
Eŋ têtac gêwiŋ to taê labu êsêac, tec kêsi êsêac su.
Eŋ gêôc êsêac sa mêŋkêsip êsêac kêtôm têm laŋgwa ŋabêc samob.

10 Mago êsêac sêli aweŋ sa
ma sêgôm ênê Ŋalau Dabuŋ têtac ŋawapac kêsa.
Tec eŋ kêkac tau ôkwi jakatu nêŋ ŋacjo
ma tau gêjac siŋ gêdêŋ êsêac.
11 Go êsêac taêŋ gêjam ênê sakiŋwaga Mose nê têm laŋgwa.
“Ŋac taŋ gêwê nê domba ŋagejobwaga kêpi aŋga gwêc gêmêŋ naŋ, gêmoa ondoc.
Ŋac taŋ kêkêŋ nê Ŋalau Dabuŋ kêsêp nêŋ ŋalêlôm naŋ,
12 to kêkêŋ nê lêma ŋawasi jagêwiŋ Mosenê lêma anôŋa
ma gêwa gwêc kêkôc kêtu êsêacŋa gebe êwaka nê ŋaê teŋgeŋŋa sa
13 to gêwê êsêac sêsêp gwêc ŋagêdimbob ŋalêlôm naŋ
ma sêka selelec atom amboac hos, taŋ kêsêlêŋ gêmoa gamêŋ sawa naŋ, gêmoa ondoc.”
14 Apômtaunê Ŋalau gêwê êsêac amboac bulimakao sêsêp gaboaŋ sêja gebe sêlêwaŋ tauŋ.
Aôm gôwê nêm lau amboac tonaŋ
gebe ôŋgôm nêm ŋaê ŋawae êsa.

Mec Anôtô taê walô to ênam nê lau saŋa

15 Matamanô êsêp aŋga undambê,
aŋga nêm gamêŋ dabuŋ to ŋawasi ma ôlic.
Nêm ôlim palê to ŋaclai tau ma gôjam awam su taêm walô aêacŋa gêc ondoc.
Ôŋgamiŋ taôm atom
16 gebe aêacma tameŋi aôm.
Abraham gêjam kauc aêac ma Israel kêjala aêac atom.
O Apômtau, aêacma tameŋi aôm,
gêdêŋ andaŋgeŋ sêsam aômnêm ŋaê gebe Aêacma kêsiwaga.
17 O Apômtau, amboac ondoc gôgôm aêac aôc aso nêm intêna.
Amboac ondoc gôgôm aêacma ŋalêlôm ŋadani kêsa gebe atêc aôm atomŋa nec.
Ômu ômôêŋ êtu nêm sakiŋwaga,
taŋ têtu nêm gôlôaclênsêm naŋŋa.
18 Lau alôb-alôb sêjaiŋ nêm lôm dabuŋ
to aêacma ŋacjo sêka nêm gamêŋ dabuŋ popoc kêtu ageŋŋa.
19 Aêac atôm lau, taŋ aôm gôjam gôliŋ êsêac atom naŋ,
ma atôm lau, taŋ sêwê kaiŋ nêm ŋaê atom naŋ.
Ŋamadiŋ 2 gawa lau, taŋ sejoŋ wain ŋanô sa naŋ, ma
lau-sêkawaga nêŋ kôm ŋagêdô sa. Lau saka wain ŋanô e popoc ma ŋatêkwi asa. Propete gêjam
Copyright information for `JAE