Jeremiah 19

Biŋ taŋ ku popoc kêdôŋ naŋ

Apômtau kêsôm biŋ tonec gebe “Ôna ma ônam ôli ku teŋ, taŋ sêpac ŋa nom naŋ. Go ôkôc launêŋ laumata ŋagêdô to dabuŋwaga laŋgwa ŋagêdô ma ôsa gaboaŋ Benhinonŋa, taŋ gêc Sacgêdô Kusaboacŋa naŋ, ôna ma ôsôm biŋ, taŋ oc jasôm êndêŋ aôm naŋ, lasê aŋga tônê. Ôsôm gebe ‘O amac kiŋ Judaŋa to amac lau, taŋ aŋgôŋ Jerusalem naŋ, akêŋ taŋem Apômtaunê biŋ. Lausiŋ undambêŋa nêŋ Apômtau, Israelnêŋ Anôtô, kêsôm gebe Alic acgom, aê oc jakêŋ gêŋwapac kaiŋ teŋ, taŋ enseŋ gamêŋ tonaŋ su naŋ, ma lau samob, taŋ sêŋô biŋ tonaŋ ŋawae naŋ, oc têtakê sec. Lau sêwi aê siŋ ma sêgôm gamêŋ tonec kêtu sec gebe sêkêŋ da gêŋmaluŋa gêdêŋ anôtôi jaba, taŋ êsêac to êsêac tameŋi ma kiŋ Judaŋa sêjam kauc naŋ, aŋga gamêŋ tau. Ma êsêac sêkêc lau tobiŋmê nêŋ dec siŋ e gêjam gamêŋ tau auc. Ma êsêac sêboa altar sa kêtu Balŋa gebe sêkêŋ latuŋi sêsa ja têtu daja êndêŋ Bal. Aê kajatu biŋ tonaŋ ma galôc sa atom ma biŋ amboac tonaŋ taêc gêjam gêc ŋoc kauclêlôm atom. Kêtu biŋ samob tonaŋ ŋaiŋa Apômtau kêsôm gebe Alic acgom, bêc oc mêŋêsa, go sêsam gamêŋ tonaŋ gebe Topet me gaboaŋ Benhinonŋa êtiam atom, sêsam gamêŋ tau gebe Gaboaŋ sêjac ŋamalac ênduŋa. Ma aŋga gamêŋ tonaŋ aê gabe janseŋ biŋ, taŋ Juda to Jerusalem sêmasaŋ naŋ, su ma jakêŋ nêŋ launêŋ ŋacjo sênac êsêac êndu ŋa siŋ to jakêŋ êsêac sêsêp lau, taŋ sêkic êsêacnêŋ biŋ naŋ lemeŋ. Aê oc jakêŋ nêŋ ŋacmatê têtu moc umboŋ ŋalabuŋa to bôc nomŋa nêŋ gwada. Aê oc jakêŋ malac tonec êŋgôm lau têtakê ma sêsu susu. Lau taŋ sêwê sêja sêmêŋ naŋ, oc têtakê ma têndaiŋ gêsuŋ êtu gêŋwapac, taŋ geseŋ malac tau su naŋŋa. Êndêŋ taŋ ŋacjo to lau, taŋ sêkic êsêacnêŋ biŋ naŋ, sêŋgi malac tau auc to sêkôniŋ êsêac ŋa gêŋwapac ŋanô naŋ, aê oc jakêŋ êsêac sêniŋ latuŋio to ŋac nêŋ ŋamêsôm ma lau samob oc sêniŋ lau sackapoacgêdô gêdêŋ tauŋŋa nêŋ ŋamêsôm.’

10 “Go aôm ôtuc ku tau popoc aŋga lau, taŋ sêwiŋ aôm naŋ laŋôŋnêmŋa 11 ma ôsôm êndêŋ êsêac gebe ‘Lausiŋ undambêŋa nêŋ Apômtau kêsôm biŋ tonec gebe Aê oc jatuc lau tonec to nêŋ malac popoc êtôm ŋac teŋ kêtuc ku popoc e êtôm gebe tambênôc êtiamŋa atom. Lau sênsuŋ nêŋ ŋacmatê êsêp gamêŋ Topet gebe gamêŋ sênsuŋ ŋacmatê êsêpŋa ŋateŋ oc ênêc atom. 12 Apômtau kêsôm gebe Aê oc jaŋgôm malac tonec to lau, taŋ sêŋgôŋ ŋalêlôm naŋ, êtôm tonaŋ e malac tau êtôm Topet. 13 Andu Jerusalem to kiŋ Judaŋa nêŋ andu êtu gamêŋ alôb-alôb êtôm Topet gebe lau sêkêŋ da gêŋmaluŋa gêdêŋ umboŋ ŋagêŋlêlôm ma sêkêc wain kêtu da gêdêŋ anôtôi jaba aŋga andu tau ŋasalôm ŋaô.’”

14 Go Jeremia gêmêŋ aŋga Topet, taŋ Apômtau kêsakiŋ eŋ gêja gebe eoc biŋ lasê naŋ, jakêkô Apômtaunê andu ŋamalacluŋ ma kêsôm gêdêŋ lau samob gebe 15 “Lausiŋ undambêŋa nêŋ Apômtau, Israelnêŋ Anôtô, kêsôm biŋ tonec gebe Alic acgom, aê oc jakêŋ gêŋwapac sec, taŋ kasôm lasê su naŋ, êpi malac tonec to malac gamêŋ tonecŋa samob gebe êsêac gêsuŋtêkwa ŋatoŋ sec ma dedec gebe sêŋô aêŋoc biŋ.”

Copyright information for `JAE