Jeremiah 7

Amêtôc nêm lêŋ to nêm kôm

Biŋ taŋ Apômtau kêkêŋ gêdêŋ Jeremia naŋ, tonec gebe “Naôkô Apômtaunê andu ŋasacgêdô ma ôsôm biŋ tonec lasê aŋga ônê gebe Amac lau Judaŋa samob, taŋ asô sacgêdô tonec amêŋ gebe ateŋ mec êndêŋ Apômtau naŋ, aŋô Apômtaunê biŋ. Lausiŋ undambêŋa nêŋ Apômtau, Israelnêŋ Anôtô, kêsôm biŋ tonec gebe Amêtôc nêm lêŋ to nêm kôm, go aê jakêŋ amac aŋgôŋ gamêŋ tonec. Taêm êka biŋdansaŋ tonec gebe ‘Apômtaunê lôm dabuŋ tau tonec, Apômtaunê lôm dabuŋ tau tonec, Apômtaunê lôm dabuŋ tau tonec,’ nec atom.

“Mago amac embe amêtôc nêm lêŋ to nêm kôm ŋanôgeŋ ma embe amansaŋ nêm biŋ ŋasawaŋa ŋanôgeŋ awiŋ taôm, embe akôniŋ lau jaba to mosêbu ma awêtuc atom ma embe akêc lau tobiŋmê nêŋ dec siŋ aŋga gamêŋ tonec atom ma embe andaŋguc anôtôi jaba, taŋ senseŋ amac su anaŋa naŋ atom, go jakêŋ amac aŋgôŋ gamêŋ tonec, aŋgôŋ nom, taŋ kakêŋ wanêcgeŋ gêdêŋ tamemi gebe êtu nêŋ gamêŋ endeŋ tôŋgeŋ naŋ.

“Mago alic acgom, amac taêm kêka biŋdansaŋ, taŋ gêjam amac sa atom naŋ. Amboac ondoc amac abe anam geŋgeŋ to anac ŋamalac êndu ma aŋgôm gêŋ mockaiŋo to mockaiŋŋa ma atôc lemem biŋdansaŋŋa ma akêŋ da gêŋmaluŋa êndêŋ Bal to andaŋguc anôtôi jaba, taŋ ajam kauc êsêac naŋ. 10 Su, gocgo amêŋ akô aê laŋôcnêmŋa aŋga andu tonec, taŋ sê ŋoc ŋaê kêpi naŋ, ma asôm gebe ‘Galoc tamoa ôliŋ samuc.’ Asôm su, go aŋgôm gêŋ alôb-alôb samob tonaŋ ŋai êtiam me. 11 Amboac ondoc amac alic andu, taŋ sê ŋoc ŋaê kêpi naŋ, kêtu kêjaŋgowaganêŋ gêsuŋ me. Biŋŋanô, aê tauc galic amboac tonaŋ. Apômtaunê biŋ tau tonec. 12 Galoc ana ŋoc maloc, taŋ gêc Silo naŋ acgom. Alic gamêŋ, taŋ kêtu ŋoc ŋaê ŋaandu ŋamataŋa naŋ. Alic gêŋ, taŋ gagôm gêdêŋ gamêŋ tau kêtu ŋoc lau Israel nêŋ secŋa naŋ acgom. 13 Ma galoc amac agôm sec samob tonaŋ ŋai ma akêŋ taŋem gêdêŋ taŋ kasôm biŋ gêdêŋ amac gamoa naŋ atom ma alôc gêdêŋ taŋ gamôêc amac naŋ atom, 14 tec jaŋgôm andu, taŋ sê ŋoc ŋaê kêpi ma amac taêm kêka naŋ, to gamêŋ, taŋ kakêŋ gêdêŋ amac to tamemi naŋ, êtôm gagôm gêdêŋ Silo. 15 Aê oc jatiŋ amac su gebe jalic amac êtiam atom, êtôm katiŋ nêm tawaŋ, Epraimnê wakuc samob su. Apômtaunê biŋ tau tonec.

Launêŋ taŋeŋpêcŋa

16 “Ma aôm, Jeremia, oteŋ mec êtu lau tonaŋŋa atom. Awam ênac aê ma nêm mec êndêŋ aê êtu êsêacŋa atom. Ônam neneŋ aê êtu êsêacŋa atom gebe aê oc jakêŋ taŋoc aôm atom. 17 Aôm gôlic gêŋ, taŋ êsêac sêgôm aŋga malac Judaŋa to aŋga intêna Jerusalemŋa naŋ, atom me. 18 Gôlôac ŋasec-ŋasec sejoŋ ka masê sa ma tameŋi sêgôm ja gelom, go lauo sêgamuc polom gebe sêpac polom êtu undambê ŋatauoŋa.* Ma êsêac sêkêŋ wain kêtu da gêdêŋ anôtôi jaba gebe sêŋgôm aê têtac ŋandaŋ êsa. 19 Apômtau kêsôm gebe Amboac ondoc oc sêgôm aê têtac ŋandaŋ kêsa me. Oc masi, sêgôm tauŋ têntac ŋandaŋ kêsa e sêlênsôŋ tauŋ secanô. 20 Kêtu tonaŋŋa Apômtau Anôtô kêsôm gebe Alic acgom, aê jakêc ŋoc têtac ŋandaŋ to ŋoc têtac kêbôli auc siŋ wacêpi gamêŋ tonaŋ, êpi ŋamalac to bôc ma ka aŋga kôm to gêŋ ŋanô nomŋa. Ŋoc têtac ŋandaŋ oc êniŋ gêŋ amboac ja ma ŋac teŋ êtôm gebe êsi êmacŋa atom.”

21 Lausiŋ undambêŋa nêŋ Apômtau, Israelnêŋ Anôtô, kêsôm biŋ tonec gebe “Akêŋ nêm daja to nêm da ŋagêdô êpi tageŋ ma taôm aniŋ nêm gêŋ. 22 Gebe gêdêŋ taŋ gawê tamemi sêsa aŋga Aiguptu sêmêŋ naŋ, aê kasôm biŋ teŋ kêtu daja to da ŋagêdôŋa gêdêŋ êsêac atom ma kajatu êsêac kêtu sêkêŋ daŋa atom. 23 Mago kakêŋ biŋsu tonec gêdêŋ êsêac gebe ‘Taŋem wamu aê, go jatu nêm Anôtô ma amac atu ŋoc lau. Ma asa lêŋ samob, taŋ kajatu amac naŋ, gebe amoa ŋajam.’ 24 Mago êsêac taŋeŋ wamu to sêkêŋ taŋeŋ aê atom. Êsêac sêsa nêŋ lêŋ kêtôm nêŋ ŋalêlôm sec kêkac êsêac. Êsêac laŋôŋanô gêdêŋ aê atom, sêbuc dêmôêŋ aê. 25 Gêdêŋ bêc, taŋ amac tamemi sêsa aŋga Aiguptu sêmêŋ e mêŋgêdêŋ galoc naŋ, aê kasakiŋ ŋoc sakiŋwaga propete gêdêŋ êsêac gamoa e ŋabêc maŋgi masi. 26 Mago êsêac taŋeŋ wamu to sêkêŋ taŋeŋ aê atom. Êsêac gêsuŋtêkwa ŋatoŋ ma sêgôm sec kêlêlêc tameŋi su.

27 “Amboac tonaŋ ôsôm biŋ samob tonaŋ êndêŋ êsêac, mago êsêac oc sêkêŋ taŋeŋ aôm atom. Aôm oc ômôêc êsêac, mago êsêac oc sêlôc atom. 28 Ma aôm oc ôsôm êndêŋ êsêac gebe ‘Lau-m tonec tec taŋeŋ wamu Apômtau, êsêacnêŋ Anôtô, awa atom ma sêsô ênê mêtôc ŋalabu atom amboac tonaŋgeŋ. Biŋŋanô gêjaŋa, gêjac tau gêŋgic aŋga êsêac aweŋsuŋ.

Sêgôm geŋ sec aŋga gaboaŋ Benhinonŋa

29 “‘Ôkapiŋ môkêmlauŋ ma ômbaliŋ siŋ.
Ôpuc taŋiboa sa aŋga lôc
gebe Apômtau kêtiŋ gôlôac, taŋ ênê têtac ŋandaŋ kêpi êsêac naŋ su
to gêwi êsêac siŋ.’”
30 Apômtau kêsôm gebe “Juda latui sêgôm sec gêjac aê matocanô atom. Êsêac sêkêŋ nêŋ gêŋ alôb-alôb kêkô andu, taŋ sê ŋoc ŋaê kêpi naŋ, ŋalêlôm gebe sêŋgôm andu tau ŋadabuŋ paliŋ. 31 Êsêac sêkwê gamêŋ ŋabau Topetŋa sa aŋga gaboaŋ Benhinon gebe sêkêŋ latuŋio to ŋac sêsa ja têtu da. Aê kajatu biŋ amboac tonaŋ gêdêŋ êsêac teŋ atom ma taêc gêjam biŋ amboac tonaŋ gec ŋoc kauclêlôm teŋ atom amboac tonaŋgeŋ.” 32 Tec Apômtau kêsôm gebe “Ôlic acgom, ŋanoc kêdabiŋ gebe sêsam gamêŋ tonaŋ Topet me gaboaŋ Benhinon êtiam atom, sêsam gamêŋ tau gebe gaboaŋ seseŋ ŋamalac suŋa. Ma Topet êtu gamêŋ sêôŋa gebe gamêŋ ŋasawa sênsuŋ ŋacmatêŋa teŋ oc ênêc atom. 33 Ma lau tonec nêŋ ŋawêlêlaŋ êtu moc umboŋ ŋalabuŋa to bôc nomŋa nêŋ gwada ma ŋac teŋ oc ensoc êsêac sêc su aŋga tônê atom. Ma aê jaŋgamiŋ têtu samuc to têntac ŋajam ŋakicsêa ma ŋac-gebe-ênam-awêwaga to awê gebe ênam ŋacŋa nêŋ aweŋ ŋaonda aŋga malac Judaŋa samob ma aŋga intêna Jerusalemŋa gebe gamêŋ tau oc êtu gasaŋ.”

34 

8:1 — 9:9 Anôtônê jaeŋ ŋagêdô kêtu launêŋ secŋa ma ŋagêjô, tê gêjac êsêac ŋawae nê, ŋabiŋ gêc ŋasêbu tonec.
Undambê ŋatauo eŋ anôtôo jaba teŋ.


Copyright information for `JAE