Job 40

Ma Apômtau kêsôm gêdêŋ Job gebe

“Ŋac taŋ gebe êmêtôc Ŋaniniŋ Ŋatau naŋ, gebe ênam tau tôŋ me.
Eŋ êjô Apômtau awamaŋ.”
Tec Job gêjô Apômtau awa gebe

“Ôlic acgom, aê ŋac ŋaôma,
aê jajô aôm awam amboac ondoc.
Aê jambôc aocsuŋ auc ŋa lemoc.
Aê kasô ŋoc biŋ teŋ su, oc jasôm teŋ êtiam atom, ma janac têku biŋ tau atom.”

Anôtô kêwaka nê ŋaclai sa

Go Anôtô gêjô Job awa ma kêsôm biŋ kêsa aŋga mu ilai ŋalêlôm gebe

“Ôndi, ôŋgambam taôm amboac ŋac.
Galoc aê gabe jatu kênac aôm, ma aôm ôwa biŋ tau sa êndêŋ aêmaŋ.
Aôm gobe ôtiŋ biŋ êpi aê me.
Aôm gobe ômêtôc aê eogeŋ ma
gobe ôwaka taôm sa gebe aôm ŋac gêdêŋ me.
Aôm lêmam ŋajaŋa kêtôm Anôtônê me.
Ma aôm awam kêtaŋ amboac wapap gêjac kêtôm aê me.

10 “Embe amboac tonaŋ, go ôndi totêmbêlam aŋgeŋ amboac kiŋ
ma ônam gêlôŋ taôm ŋapep toŋawasi.
11 Matam ê êsêac, taŋ tetoc tauŋ sa naŋ,
ma ônsêwa nêm têmtac ŋandaŋ êpi êsêac to ôkôniŋ êsêac.
12 Biŋŋanô, matam ê êsêac ma ôkôniŋ êsêac
to ôka lau alôb-alôb tôŋ aŋga maleŋ, taŋ sêkô naŋ.
13 Ônsuŋ êsêac sêsêp nom sêna
ma ônsô êsêac tôŋ sêmoa lamboam.
14 Go aê jalambiŋ aôm
ma jajala gebe kôku ŋacjo tulugac.

15 “Ôlic gêŋsêga Behemot. * Aê kakêŋ amagêc lulugeŋ.
Eŋ geŋ gêgwaŋ kêtôm bulimakao.
16 Mago aôm ôlic ŋaclai, taŋ gêc ênê ŋadambê naŋ,
ma ôlic ŋajaŋa, taŋ gêc ênê ‘ŋawalô naŋ acgom.
17 Ênê ŋalêŋuc kêpi amboac kaseda,
ma akalô ŋajaŋa ma ŋagegeb sec.
18 Ênê ŋatêkwa kêtôm gasuc ki joŋjoŋ
ma akaiŋ ŋajaŋa kêtôm balaŋ ki.

19 “Eŋ kêtu gêŋ towae ŋamataŋa, taŋ aê kakêŋ naŋ.
Ŋac taŋ kêkêŋ eŋ naŋ, taugeŋ kêtôm gebe êku eŋ tulu.
20 Lôc taŋ kêtu bôc saleŋŋa nêŋ gamêŋ dôa-dôaŋa naŋ,
kêkêŋ gêŋ êniŋŋa gêdêŋ eŋ.
21 Eŋ gêc ka têkwa-têkwa ŋalabu
ma kêsiŋ tau gêc wandob aŋga siŋlêlôm.
22 Eŋ gec ka têkwa-têkwa ŋaajuŋlabu
ma gê lamu ka, taŋ kêkô bumaŋ naŋ.
23 Eŋ kêtêc bu ŋasamac atom.
Bu embe ênsalê eŋ auc, mago eŋ oc êmoa totêtac êpa sugeŋ.
24 Asa êtôm, gebe êŋguŋ eŋ êsêp mataanô ma êkôc eŋ tôŋ.
Ma asa êtôm, gebe êkim lususuŋ lasê.
Behemot eŋ bôcsêga kaiŋ teŋ. Lau ŋagêdô sebe sêkip
bôc tau ŋam sa ma sêjam dôŋ kêpi bôc buŋa, taŋ sêmoa Aprika naŋ. Lau ŋagêdô sêsôm gebe Behemot kêtôm elepant.
Copyright information for `JAE