Job 41

“Aôm kôtôm gebe ônac Lewiatan ** ŋa êŋpaŋ

ma ôkic eŋ imbêla tôŋ ŋa lêpoa me masi.
Aôm kôtôm gebe ôkim lususuŋ lasê ma ôkêŋ lêpoa êsêp
ma ôŋgauc eŋ ŋa êŋpaŋ asap nê ŋasê me masi.
Eŋ oc eteŋ aôm gebe taêm walô eŋ
ma asôm biŋ ŋajam-ŋajam êndêŋ aôm me.
Eŋ oc êmoatiŋ poac êndêŋ aôm,
gebe ênam sakiŋ aôm endeŋ tôŋgeŋ me.
Aôm oc ôlic eŋ amboac moc, taŋ kêtu gêŋ masiŋ naŋ,
ma ôtu dôa-dôa ôwiŋ eŋ
ma ôkô eŋ tôŋ gebe sakiŋwagao têtu samuc eŋ me.
Lau iŋa têtulu eŋ
ma lau-têtulu-gêŋwaga sêmoata eŋ su, gebe lau sênam ôli eŋ me.
Aôm kôtôm gebe ôŋguŋ eŋ ŋa sao e ênam eŋ ôli auc
ma ôŋguŋ eŋ ŋa bêlêm êsêp môkêapac me.
Aôm embe ômoasac eŋ, oc êtu siŋ, ma ômoasac eŋ êtiam atom.

“Lau taŋ taêŋ kêka gebe sêkôc Lewiatan tôŋ naŋ,
embe sêlic eŋ, go têtakê e sêu tauŋ sênêc nom.
10 Embe sêli ênê ŋalêlôm sa, go mataanô êtu koc
ma ŋac teŋ êtôm gebe êkô eŋ laŋônêmŋa atom.
11 Asa êtôm gebe ênac siŋ êndêŋ eŋ ma êmoa toôli samuc.
Lau taŋ sêmoa nom ŋagamêŋ samob naŋ, nêŋ ŋac teŋ oc êŋgôm êtôm atom.

12 “Aê gabe jawa eŋ akaiŋ sa
ma jasôm ênê ŋaclai to ŋajaŋa lasê êndêŋ aôm.
13 Asa kêtôm gebe êkwalec ênê ŋakwê su
ma êŋguŋ ênê ŋakwê siŋŋa lasê.
14 Asa kêtôm gebe êŋa eŋ awasuŋ.
Ênê luluŋ oc êtakê lau ŋanô.
15 Lautuc ŋadênaŋ-dênaŋ gêsaŋ eŋ dêmôêtêkwa auc,
kêsap tau tôŋ-tôŋ e ŋajaŋa kêsa.
16 Lautuc tau ŋasawa masianô,
ma mu ŋalaulau êtôm gebe êsô ŋasawa teŋ atom.
17 Lautuc tau kêsap tau tôŋ ŋajaŋa
e gêŋ teŋ kêtôm gebe êkac gêŋ tau suŋa atomanô.
18 Eŋ embe êsamuc, go ja ŋamôsi êsa
ma mataanô ŋawê amboac gêlôm kelendeŋ.
19 Jawaô gêlaŋ-gêlaŋ kêsa eŋ awasuŋ
ma ja tomôsi-tomôsi gêlôb kêsa gêmêŋ.
20 Jadauŋ kêsa eŋ lusuawa
kêtôm ŋawajaô kêpi aŋga bu, taŋ keletoc naŋ.
21 Ênê awajaô ŋandaŋ kêtôm jalana,
ma ja ŋawaô gêboaŋ kêsa aŋga eŋ awasuŋ.
22 Eŋ gêsutêkwa ŋaôliwalô kaiŋ teŋ.
Lau taŋ dêdac eŋ naŋ, sêc totêtêc tauŋgeŋ.
23 Ênê ŋadambê e gêôc tauŋ tôŋ-tôŋ,
ma ŋaôlic kêtôm ki, taŋ sêpac gêwê jakêsap ôli tôŋ naŋ.
24 Ênê nipkalop ŋajaŋa kêtôm poc,
amboac poc, taŋ sêlêsa polom kêpi naŋ.
25 Eŋ embe êndi, go ŋaclai samob têtakê
ma têtêc tauŋ e nêŋ meloco êsa.
26 Siŋ teŋ êtôm gebe ênac eŋ atom,
ma kêm to sôb ma bêlêm kêtôm gebe êŋguŋ eŋ lasê atom.
27 Eŋ kêsaê bêlêm ki kêtôm sôbolec,
ma ki joŋjoŋ kêtôm ka ŋanamuc.
28 Sôb teŋ kêtôm gebe êŋgôm eŋ êc atom,
ma kêsaê dabaŋmatu amboac obalauŋ ŋapopoc.
29 Embe sênac eŋ ŋa olopoac, oc ênsaê amboac oba sôb.
Ma embe sêmbaliŋ kêm êpi eŋ, go êômac.
30 Eŋ akêku ŋamata kêtôm kekec
ma kêkip nom palê-palê sa amboac sakweŋ ki.
31 Eŋ gêgôm gwêc keletoc kêtôm ku
ma kêjali e ŋaboab-boab kêtôm ŋalêsi keletoc.
32 Eŋ embe êkêkôc, oc ŋagwêc ŋasênêc êwê kô
ma ŋaôpic ênam gwêc auc.
33 Gêŋ nomŋa teŋ kêtôm eŋ gêmoa atom,
Anôtô kêkêŋ eŋ nê kêtêc masi.
34 Eŋ matapaŋa gêjac bôc samob, taŋ tetoc tauŋ sa naŋ,
eŋ kêtu bôc towae samob nêŋ kiŋ.”
Lewiatan oc bôc kaiŋ teŋ amboac iwa.

Copyright information for `JAE