Job 5

“Ômôêcmaŋ. Ŋac teŋ oc êjô aôm awam me masi.
Oc nawê lamu ŋac dabuŋ ondoc. *
Ŋac meloc nê têtac sec enseŋ eŋ su
ma kauc gêbôc nê lêmuŋ ênac eŋ êndu.
Aê galic ŋac meloc gêmoa gamêŋ teŋ e ŋawakac jagêjam,
mago aê kapuc boa ênê andu sep tageŋ.
Ênê latui têtap gamêŋ sêmoa ŋaŋêŋŋa teŋ sa atom.
Lau sêkôniŋ êsêac tôŋ aŋga sêmêtôc biŋ ŋamala
ma ŋac teŋ gêjam êsêac sa atom.
Ŋac taŋ mo gêjô eŋ naŋ, oc êniŋ ŋac meloc nê kôm ŋanô.
Eŋ oc êkôc ŋanô tau sa aŋga gamêŋdani amboac tonaŋgeŋ.
Ma ŋac, taŋ bu gêjô eŋ naŋ, mata katu ênê awamata.
Gebe gêŋwapac gêmêŋ aŋga kekop atom,
ma ŋalêlôm ŋawapac gêlac aŋga nom atom.
Masi, ŋamalac tau kêka gêŋwapac lasê,
kêtôm ja ŋamôsi gêlôb kêpi aŋga ja.

“Aê embe jatôm aôm, oc jaê lamu Anôtô,
ma jansuŋ ŋoc biŋ samob êndêŋ eŋgeŋ êna.
Eŋ gêgôm gêŋsêga, taŋ takip ŋam sa naeo.
Eŋ gêgôm gêŋtalô, taŋ tasa sa tatôm atom naŋ.
10 Eŋ kêkêŋ kom gêjac kêsêp nom
ma kêkêŋ bu kêmalôm kôm.
11 Eŋ kêsip lau sawa sa
ma gêgôm lau tonêŋ ŋalêlôm ŋawapac têntac ŋajam kêsa.
12 Eŋ kêlênsôŋ lau, taŋ sêsau sêôc lau naŋ, nêŋ kôm ŋalêŋ, taŋ sêmasaŋ naŋ,
e êsêac lemeŋ ŋakôm ŋanô masi.
13 Eŋ gêwa laumêtênêŋ kauc kêtu tauŋ nêŋ lakô,
gebe biŋ, taŋ êsêac sêmasaŋ tokaucgeŋ naŋ, ênaŋa sep tageŋ.
14 Êsêac têtap gamêŋ ŋakesec sa êndêŋ ocsalô
ma sêlênsageŋ êndêŋ oc êkô ŋaluŋ amboac sêlêsa gêdêŋ gêbêc.
15 Mago Anôtô gêjam mosêbu sa aŋga lau aweŋsuŋ
ma gêjam lau-sêpô-lêna-tauŋwaga sa aŋga lau toŋaclai lemeŋ.
16 Amboac tonaŋ tec lau ŋalêlôm sawa sêkêŋ mateŋ
ma lau alôb-alôb sêkapic aweŋsuŋ.

17 “Aê aoc êôc ŋac, taŋ Anôtô kêmêtôc eŋ naŋ,
tec ôlic Ŋaniniŋ Ŋatau nê mêtôc sec atom.
18 Gebe eŋ kêkêŋ kamoc, mago kêsabaŋ.
Eŋ gêjac aôm, mago eŋ lêma gêgôm ôlim ŋajam kêsa kêtiam.
19 Eŋ ênam aôm sa aŋga gêŋwapac taêsam ŋalêlôm
ma ejop aôm gebe gêŋ sec teŋ êmoasac aôm atom.
20 Êndêŋ noc tôbômŋa eŋ oc ênam aôm sa gebe ômac êndu atom
ma êndêŋ noc siŋŋa eŋ oc ejop aôm êndêŋ siŋ ŋaŋaclai.
21 Eŋ êkwa aôm auc êtu lau imbeleŋ ŋamalicŋa
ma êndêŋ taŋ senseŋ gêŋ waucwaucgeŋ naŋ, aôm ôtêc taôm atom.
22 Êndêŋ taŋ senseŋ gêŋ su waucwaucgeŋ ma sêôc tôbôm naŋ, aôm oc ôjômac.
Ma aôm ôtêc bôc saleŋŋa atom.
23 Waôŋ aŋga nêm kôm oc êkêŋ wapac aôm atom
ma bôc saleŋŋa oc sê wama aôm.
24 Aôm oc ôŋgôŋ nêm bec tobiŋmalôgeŋ
ma nêm domba ŋatoŋ sêmoa tomalageŋ.
25 Aôm oc ôlic nêm wakuc têtu taêsam,
êsêac oc sêpuc amboac gêgwaŋ.
26 Nêm têm nomŋa ênac pep acgom, go ôsêp nêm sê ôna,
ôtôm kôm ŋanô, taŋ sejoŋ sa gêdêŋ ŋanoc naŋ.
Ôlic acgom, biŋ tonaŋ aêac atap sa gebe biŋŋanô,
amboac tonaŋ ôkêŋ taŋam ma taêm ênam e êmoasiŋ aôm.”
27 

6:1 — 13:28 Job gêjô Elipas awa. Go Bildad agêc Sopar sêsôm nêŋ biŋ gêdêŋ Job gêdêŋ-gêdêŋgeŋ, ma Job gêjô êsêagêc aweŋ amboac tonaŋgeŋ. Êsêacnêŋ biŋgalôm ŋamataŋa gêjac pep kêsêp môkêlatu 14.
Eŋ kêlêwiŋ aŋela kêpi ŋac dabuŋ.


Copyright information for `JAE