Jonah 4

Jona gêlic Anôtô sec kêtu taê walô lauŋa

Biŋ tonaŋ kêmasê Jona sa secanô e têtac ŋandaŋ kêsa jakateŋ nê mec gêdêŋ Apômtau ma kêsôm gebe “O Apômtau, gêdêŋ taŋ gamoa ŋoc gamêŋgeŋ naŋ, aê taêc gêjam kwanaŋgeŋ gebe biŋ amboac tonaŋ oc êsa. Kêtu tonaŋŋa tec gaêc gaja Tarsis. Aê kajalagac. gebe moasiŋ to taê labu ŋaAnôtô aôm. Aôm gôê biŋ tôŋ to nêm têmtac gêwiŋ teŋgeŋŋa kêlêlêc su ma taêm walô lau sec e ôŋgôm nêm taêm gêjam ŋanô êsa atom. Amboac tonaŋ, Apômtau. aê galoc jateŋ aôm gebe ôkôc katuc su. Embe jamac êndu, oc êmoasiŋ aê êlêlêc jamoa matoc jaliŋa su.” Ma Apômtau gêjô eŋ awa gebe “Aôm têmtac ŋandaŋ oc jagêdêŋ me masi.” Go Jona kêsa aŋga malac jagêŋgôŋ ŋamagê gêmu oc kêpiŋa. Eŋ gêjam bec teŋ ma kêsô jagêŋgôŋ ŋaajuŋ, gebe ênsaê gêŋ, taŋ oc êtap malac tau sa naŋ.

Go Apômtau kêkêŋ ka teŋ kêpoa kêpi e jakêlêlêc Jona su, gebe êkêŋ ajuŋ eŋ môkêapac ma ênam malô ênê ŋalêlôm. Ma Jona têtac ŋajam ŋanô kêtu ka tonaŋŋa. ŋageleŋ gamêŋ kêtuŋ tau ma Apômtau kêkêŋ gaoc teŋ gêŋac ka tau e kêmêliŋ. Go gêdêŋ oc kêpi naŋ, Anôtô kêkêŋ mu ŋandaŋ teŋ aŋga oc kêpiŋa kêsêlêŋ ma oc kêpac Jona môkêapac e mata kêlô. Go kêpuc boa tau gebe êmac êndu ma kêsôm gebe “Aê embe jamac êndu, oc êmoasiŋ aê êlêlêc jamoa matoc jaliŋa su.” Mago Apômtau kêsôm gêdêŋ Jona gebe “Aôm têmtac ŋandaŋ kêtu kaŋa oc jagêdêŋ me masi.” Ma Jona gêjô eŋ awa gebe “Aec, aê têtac ŋandaŋ jagêdêŋgoc ma katu gêŋ gêbacgac.” 10 Ma Apômtau kêsôm gêdêŋ eŋ gebe “Aôm taêm walô ka, taŋ gôjam ŋakoleŋ teŋ atom to gôlôm kêtu kapôêŋ atom, ka taŋ kêpi gêdêŋ gêbêc tageŋ ma kêmêliŋ gêdêŋ gêbêc tageŋ naŋ. 11 Ma aê nec oc taêc walô malac kapôêŋ Niniwe tau, taŋ ŋamalac sêlêlêc 120,000 su sêŋgôŋ naŋ, atom me. Êsêac sêjala anô to gasê kêtu tôŋ atom tageŋ, ma bôc taêsam ŋasec sêmoa sêwiŋ.”

Copyright information for `JAE