Joshua 3

Lau Israel selom bu Jordan

Gêdêŋ bêbêc kanucgeŋ Josua gêdi ma gêwi Sitim siŋ ma lau Israel samob sêwiŋ eŋ. Êsêac sêô lasê bu Jordan ma sê becobo aŋga tônê, selom sebeŋ atom. Bêc têlêac gêbacnê, go siŋwaganêŋ laumata sêsêlêŋ sêmoa gamêŋ becŋa ŋalêlôm ma sêjatu lau gebe “Amac embe alic Apômtau, amacnêm Anôtô, nê katapa poacŋa, taŋ lau Lewi nêŋ dabuŋwaga sêmbalaŋ naŋ, go andi ma andaŋguc katapa tau, ec ajala intêna, taŋ asa naŋ, gebe amac asa intêna tonec kwanaŋgeŋ atom. Mago ŋasawa êniŋ katapa to amac êŋgic. Ŋasawa tau amboac saka 500. Andambiŋ katapa tau atom.” Ma Josua kêsôm gêdêŋ lau gebe “Anam dabuŋ taôm, gebe eleŋŋa Apômtau gebe êŋgôm gêŋtalô aŋga amac ŋalêlôm.” Ma Josua kêsôm gêdêŋ dabuŋwaga gebe “Aôc katapa poacŋa sa ma asêlêŋ amuŋ.” Tec êsêac sêôc katapa poacŋa tau sa ma sêsêlêŋ sêmuŋ lau.

Ma Apômtau kêsôm gêdêŋ Josua gebe “Ocsalô aê gabe jatoc aôm sa lau Israel samob sêlic e sêjala gebe aê oc jamoa jawiŋ aôm êtôm gamoa gawiŋ Mose. Ma aôm ôjatu dabuŋwaga, taŋ sêmbalaŋ katapa poacŋa naŋ, gebe ‘Êndêŋ taŋ aô lasê Jordan ŋatali naŋ, akô ŋaŋêŋgeŋ aŋga bu ŋalêlôm.” ’

Go Josua kêsôm gêdêŋ lau Israel gebe “Ajôc, atu gasuc amêŋ, ma akêŋ taŋem Apômtau, amacnêm Anôtô, nê biŋ.” 10 Ma Josua kêsôm gebe “Biŋ tonec êwa sa êndêŋ amac gebe Anôtô mata jali gêmoa gêwiŋ amac ma eŋ êsêlêŋ êmuŋ amac ma êjanda lau Kanaan to Het ma lau Hiw to Peris ma lau Girgas to Amor ma Jebus biŋŋanôgeŋ. 11 Alic acgom, Apômtau, taŋ kêtu nom samucgeŋ ŋatau naŋ, nê katapa poacŋa elom bu Jordan êmuŋ amac. 12 Ma galoc ajaliŋ lau 12 sa aŋga Israelnêŋ gôlôacmôkênêŋ, ŋac tageŋ-tageŋ êtôm gôlôacmôkêgeŋ. 13 Ma êndêŋ taŋ lau dabuŋ, taŋ sêmbalaŋ Apômtau, nom samucgeŋ ŋatau, nê katapa naŋ, sêu eŋtapa êsêp bu Jordan, go bu tau enseleŋ êtiam atom êpoac ma bumôkê êlêc sa naêkô amboac lênsaŋ teŋ.”

14 Amboac tonaŋ gêdêŋ taŋ lau dêdi aŋga nêŋ becobo sebe selom bu Jordan naŋ, dabuŋwaga sêbalaŋ katapa poacŋa sêmuŋ lau. 15 Ma gêdêŋ taŋ dabuŋwaga, taŋ sêbalaŋ katapa naŋ, sêô lasê Jordan ma gêdêŋ taŋ lau-sabalaŋ-katapawaga tau sêu eŋkaiŋ kêsêp bu, taŋ kêsalê Jordan ŋatali auc gêdêŋ têm sêjac kôm ŋanô saŋa naŋ, 16 bumôkê gêlêc sa jakêsuŋ tôŋ kêkô Jaêcgeŋ amboac lênsaŋ kêkanôŋ malac Adam, taŋ gêc Sareta ŋagala naŋ. Ma bu aêŋa, taŋ kêsa gwêc Arabaŋa, taŋ sêsam teŋ gebe Gwêcmatê naŋ, kêpa samucgeŋ. Ma lau selom sêsêp gamêŋ, taŋ kêkanôŋ Jeriko naŋ. 17 Ma gêdêŋ taŋ lau Israel samob sêsêlêŋ sêmoa gamêŋ keleŋgeŋ jasêpi bumakeŋ naŋ, dabuŋwaga, taŋ sêbalaŋ katapa poacŋa naŋ, sêkô gamêŋ ŋakeleŋ aŋga bu Jordan ŋaluŋ e lau samob selom bu Jordan gêbacnê.

Copyright information for `JAE