Leviticus 23

Om ŋagôliŋ

Apômtau kêsôm gêdêŋ Mose gebe “Ôsôm êndêŋ lau Israel gebe Apômtaunê om toê-toê, taŋ amac asam gebe dabuŋ ma akac taôm sa naŋ, tonec. Anam nêm kôm êtôm bêc 6, mago êndêŋ bêc êtu 7 êtu bêc lêwaŋŋa ŋanô akac saŋa dabuŋ teŋ. Anam kôm teŋ atom. Bêc tonaŋ êtu Apômtau tau nê om aŋga nêm gamêŋ samob. Bêc tonec kêtu Apômtaunê om toê-toê, taŋ eŋ kêkêŋ naŋ. Akalem lau sa êndêŋ ŋanoc gebe akac taôm sa ma alic om dabuŋ tau.

Omsêga Pasa

“Êndêŋ ajôŋ ŋamataŋa ŋabêc 14 ŋaêtulala naŋ alic Apômtaunê Om Pasa. Ma êndêŋ ajôŋ tonaŋgeŋ ŋabêc 15 alic Apômtaunê om Polom Ŋalucŋa. Êndêŋ bêc 7 aniŋ polom ŋaluc. Êndêŋ bêc ŋamataŋa tonaŋ akac sa to alic om dabuŋ. Anam kôm teŋ atom. Mago akêŋ daja êndêŋ Apômtau êtôm bêc 7 tonaŋ ma êndêŋ bêc êtu 7 oc alic om dabuŋ teŋ êtiam ma anam kôm atom.”

Ma Apômtau kêsôm gêdêŋ Mose gebe 10 “Ôsôm êndêŋ lau Israel gebe êndêŋ taŋ aô lasê gamêŋ tau, taŋ aê jakêŋ êndêŋ amac ma aniŋ gêŋ lasê naŋ, go amac akêŋ kôm ŋanô ŋamêc êndêŋ dabuŋwaga 11 ma eŋ ênsuŋ nêm gêŋ tonaŋ êndêŋ Apômtau êna gebe eŋ êlic amac ŋajam. Sabat su ma ŋaeleŋ dabuŋwaga êŋgôm gêŋ tau. 12 Ma êndêŋ bêc, taŋ ansuŋ nêm gêŋ tonaŋ naŋ, akêŋ domba ŋalatu kapoac ŋajam teŋ ŋajala tageŋŋa êtu daja êndêŋ Apômtau êwiŋ. 13 Ma akêŋ da keleŋ tonec êwiŋ gebe polom matac êtôm gêŋ 10 ŋaluagêc sêŋgaluŋ êwiŋ katêkwi êtu daja êndêŋ Apômtau gebe êŋu ŋamalu ŋajam ma akêŋ wain ŋatêkwi kekec teŋ êwiŋ êtu da. 14 Aniŋ polom matac ma sigob me kêsôcŋa teŋ aŋga kôm wakuc atomanô e êndêŋ bêc, taŋ amac akêŋ nêm da êndêŋ nêm Anôtô su acgom. Biŋ tonaŋ êtu ŋagôliŋ ênêc endeŋ tôŋgeŋŋa teŋ êndêŋ gôlôac to gôlôac êtôm nêm gamêŋgeŋ.”

Om Tajoŋ Kôm Ŋanô Saŋa

15 “Sabat, taŋ amac akêŋ da onaŋ su naŋ, ŋaeleŋ go asa woke sa e êtôm woke samuc 7. 16 Asa bêc 50 sa e êtap bêc, taŋ êndaŋguc Sabat êtu 7 naŋ sa, go akêŋ da polom wakucŋa teŋ êndêŋ Apômtau. 17 Akôc polom sigob luagêc aŋga nêm andu amêŋ gebe êtu da. Sêmansaŋ polom tonaŋ ŋa polom matac ŋajam ma sêpac ŋa jist êtu kôm ŋanô ŋamêc êndêŋ Apômtau.

18 “Ma akêŋ domba ŋalatu ŋajam 7 ŋajala tageŋ ma bulimakao kapoac wakuc teŋ ma domba kapoac luagêc êwiŋ polom tonaŋ êtu daja êndêŋ Apômtau. Êwiŋ da gêŋ kômŋa to da gêŋ têkwiŋa oc êtu daja, taŋ ŋamalu ênac Apômtau mataanô ŋajam naŋ. 19 Ma akêŋ noniŋ kapoac teŋ êtu da êjô secŋa to domba ŋalatu kapoac luagêc, taŋ ŋajala tageŋ naŋ, êtu dawamaŋa teŋ. 20 Ma dabuŋwaga ênsuŋ gêŋ tonaŋ êwiŋ polom ŋamêc êtu da daiŋdaiŋ êndêŋ Apômtau êwiŋ domba ŋalatu luagêc. Gêŋ tau êtu Apômtaunê gêŋ ma dabuŋwaga êwê kaiŋ. 21 Êndêŋ bêc tau amac akac taôm sa gebe êtu om dabuŋ ma anam kôm kapôêŋ atom. Tonaŋ êtu ŋagôliŋ ênêc endeŋ tôŋgeŋŋa teŋ êtu nêm wakucŋa êtôm amacnêm gamêŋ samob.

22 “Ma êndêŋ taŋ amac anac nêm kôm ŋanô sa naŋ, go anac sa e êndêŋ kôm ŋamadiŋ samucgeŋ atom, ma ajoŋ gêŋ ŋasaliŋ-saliŋ sa êtu ŋamu atom. Awi siŋ êndêŋ lau ŋalêlôm sawa to lau jaba gebe Apômtau, amacnêm Anôtô aê.”

Om Jala Wakucŋa

23 Ma Apômtau kêsôm gêdêŋ Mose gebe 24 “Ôsôm êndêŋ lau Israel gebe ajôŋ êtu 7 ŋabêc ŋamataŋa êtu bêc lêwaŋŋa ŋanô teŋ êndêŋ amac. Akac sa ma alic om dabuŋ tau toôndugeŋ. 25 Anam kôm teŋ atom, mago akêŋ da keleŋ teŋ êndêŋ Apômtau.”

Omsêga Wama

26 Ma Apômtau kêsôm gêdêŋ Mose gebe 27 “Ajôŋ êtu 7 tonaŋ ŋabêc 10 êtu bêc Omsêga Wamaŋa. Êtu bêc dabuŋ, taŋ amac akac taôm sa ma anam dabuŋ mo to akêŋ daja êndêŋ Apômtau naŋ. 28 Ma anam kôm êndêŋ bêc tonaŋ atom gebe bêc Omsêga Wamaŋa, ma sê wama amac êndêŋ Apômtau, amacnêm Anôtô. 29 Gebe teŋ embe ênam dabuŋ mo êndêŋ bêc tonaŋ atom, oc senseŋ eŋ su aŋga nê lau nêŋ. 30 Ma teŋ embe ênam kôm êndêŋ bêc tonaŋ, aê oc janseŋ eŋ su aŋga nê lau nêŋ amboac tonaŋgeŋ. 31 Anam kôm teŋ atom. Tonaŋ êtu ŋagôliŋ ênêc endeŋ tôŋgeŋŋa teŋ êndêŋ amacnêm wakuc samob êtôm gamêŋgeŋ. 32 Bêc tonaŋ êtu bêc lêwaŋŋa ŋanô teŋ êndêŋ amac ma anam dabuŋ mo. Alic om tau anac m êndêŋ ajôŋ tonaŋ ŋabêc 9 ŋaêtulala, ma amansaŋ nêm sabat e naêndêŋ ŋabêc 10 ŋaêtulala.”

Om Bec

33 Ma Apômtau kêsôm gêdêŋ Mose gebe 34 “Ôsôm êndêŋ lau Israel gebe Êndêŋ ajôŋ tonaŋgeŋ ŋabêc 15 êtu Apômtaunê om sêsam gebe Om Bec. Alic om tonaŋ êtôm bêc 7. 35 Êndêŋ bêc ŋamataŋa akac taôm sa gebe alic om dabuŋ teŋ. Anam kôm teŋ atom. 36 Êndêŋ bêc 7 tonaŋ akêŋ daja êndêŋ Apômtau. Ma êndêŋ bêc êtu 8 amac akac taôm sa gebe alic om dabuŋ teŋ êtiam ma akêŋ daja teŋ êndêŋ Apômtau. Bêc tonaŋ êtu bêc dabuŋ akac saŋa, tec anam kôm teŋ atom.

37 “Apômtaunê om toê-toê tau tonaŋ, taŋ amac asôm lasê gebe akac sa ma anam sakiŋ Apômtau gebe akêŋ daja to da keleŋ ma da têkwi. Da samob tonaŋ akêŋ êndêŋ Apômtau êtôm ŋanoc solopgeŋ. 38 Alic om tonaŋ naêwiŋ Apômtaunê sabat to êwiŋ nêm gêŋ ŋagêdô, taŋ ajac mata ma akêŋ kêtu nêm ŋalêlôm kêkac amacŋa gebe akêŋ êndêŋ Apômtau naŋ.”

Biŋ Om Becŋa ŋagêdô kêtiam

39 “Êndêŋ ajôŋ 7 ŋabêc 15 embe anac nêm kôm ŋanô samob sa êmbacnê naŋ, alic Apômtaunê om êtôm bêc 7. Bêc ŋamataŋa êtu bêc lêwaŋŋa ŋanô teŋ ma bêc êtu 8 amboac tonaŋgeŋ. 40 Êndêŋ bêc ŋamataŋa amac ajoŋ ka ŋanô ŋajam-ŋajam to tômtôm ŋalauŋ ma lêsô ma atu samuc amoa Apômtau, amacnêm Anôtô, laŋônêm êtôm bêc 7. 41 Alic Apômtaunê om êtôm bêc 7 êtôm jalageŋ. Tonaŋ êtu ŋagôliŋ ênêc endeŋ tôŋgeŋŋa teŋ êndêŋ nêm wakuc samob. Alic om tau êndêŋ ajôŋ êtu 7ŋa. 42 Aŋgôŋ bec êtôm bêc 7 tonaŋ. Lau Israel ŋanô samob sêŋgôŋ becgeŋ. 43 Gebe nêm wakuc to nêŋ wakuc sêjala gebe aê kakêŋ lau Israel sêŋgôŋ bec gêdêŋ taŋ aê kakôc êsêac sêsa aŋga gamêŋ Aiguptuŋa sêmêŋ naŋ. Apômtau, amacnêm Anôtô aê.”

Amboac tonaŋ Mose kêkêŋ om, taŋ Apômtau kêjatu naŋ, ŋawae gêdêŋ lau Israel.

44 

24:1 — 27:34 Biŋsu tokaiŋ-tokaiŋ kêsêp môkêlatu tonaŋ. Biŋsu ŋagêdô kêmasaŋ sakiŋ omŋa, ŋagêdô kêmêtôc lau, taŋ sêsôm biŋ alôb-alôb, ŋagêdô kêjatu lau gebe sêsa nêŋ lêŋ bisnis to kômŋa ŋapep ma sêŋgôŋ sêwiŋ tauŋ tomêtêgeŋ, ŋagêdô kêmêtôc lau, taŋ taŋeŋpêc gêdêŋ Anôtônê biŋsu naŋ ma ŋagêdô kêmasaŋ lêŋ tatôc lemeŋ ma tanac mata gêŋ êndêŋ Anôtôŋa.

Copyright information for `JAE