Luke 16

Biŋgôliŋ gejobwaga secŋa

Ŋasawa teŋ Jesu kêsôm gêdêŋ nê ŋacseŋomi gebe “Ŋac tolêlôm teŋ gêŋgôŋ ma nê gejobwaga teŋ gêmoa. Ma lau sêju biŋ gêdêŋ ŋatau gebe gejobwaga kêjaiŋ ênê waba. Tec ŋatau gêmôêc eŋ ma kêsôm gêdêŋ eŋ gebe ‘Biŋ amboac ondoc tec gaŋô kêpi aôm nec. Ôwa kôm gejobwagaŋa sa acgom gebe aômnêm kôm gejobwagaŋa gêbacnê.’ Gejobwaga tonaŋ kêsôm gêdêŋ tau gebe ‘Ŋoc ŋatau oc êkôc ŋoc kôm gejobwagaŋa su aŋga aêŋoc, tec jaŋgôm asageŋ. Kôm takwê nomŋa oc jaŋgôm êtôm atom, ma embe jateŋ gêŋ, oc majoc. Aê kajala gêŋ, taŋ gabe jaŋgôm naŋ, ec sêkôc aê sa jaŋgôŋ nêŋ andu êndêŋ noc ŋatau êtiŋ aê su aŋga kôm gejobwagaŋa.’ Go kêkalem lau samob, taŋ nê ŋataunê tôp gêc êsêacŋa naŋ, tageŋ-tageŋ dêdêŋ eŋ sêja ma kêtu kênac gêdêŋ ŋac ŋamataŋa gebe ‘êôc ŋataunê tôp amboac ondoc gêc aômŋa.’ Ma eŋ kêsôm gebe ‘Niptêkwi wapap 100.’ Go eŋ kêsôm gêdêŋ ŋac tau gebe ‘Ôŋgôŋ sic ma ôkôc nêm papia tôpŋa mêŋoto sebeŋ gebe 50.’ Go kêtu kênac ŋac teŋ gebe ‘Ma aômnêm biŋ tôpŋa amboac ondoc.’ Tec eŋ kêsôm gebe ‘Jaŋgom gasuc kapôêŋ 100.’ Ma gejobwaga kêsôm gêdêŋ eŋ gebe ‘Ôkôc nêm papia tôpŋa ma oto gebe 80.’ Go ŋatau kêlanem gejobwaga keso tonaŋ gebe gêgôm tokauc gebe lau nom tonecŋa sêgôm gêŋ gêdêŋ tauŋ tokauc sêlêlêc lau ŋawêŋa su.

“Amboac tonaŋ jasôm êndêŋ amac gebe Akôc awa nomŋa naanam lau ôkwi têntac êwiŋ amac, gebe sêkôc amac sa aŋgôŋ bec teŋgeŋŋa êndêŋ noc awa êmbacnêŋa. 10 Ŋac teŋ embe ejop gêŋ ŋasec-ŋasec ŋapepgeŋ, oc ejop gêŋ kapôêŋ-kapôêŋ êtôm tonaŋ. 11 Embe ajop awa nomŋa ŋapep atom, ma asa oc êkêŋ waba ŋanô êndêŋ amac gebe ajopŋa. 12 Ma embe ajop gêŋ jaba tonec ŋapep atom, ma asa oc êkêŋ gêŋ ŋanô êndêŋ amac gebe awê kaiŋ êsa ôlim.

13 “Sakiŋwaga teŋ ênam sakiŋ apômtau luagêc êtôm atom, eŋ oc têtac endec teŋ ma têtac êwiŋ teŋ me oc êsap teŋ tôŋ ma têtac êmbu teŋ. Amac amboac tonaŋ, atôm gebe anam Anôtô to awa êpi tageŋ atom.”

Jesunê biŋ ŋalô ŋagedô

(Mat 11:12-13; 5:31-32; Mar 10:11-12)

14 Parisai taŋ sêgôm mocsac awêŋa naŋ, sêŋô biŋ samob tônê e sêlêc lusuŋsuŋ sa. 15 Tec eŋ kêsôm gêdêŋ êsêac gebe “Amac tec atoc taôm sa gêdêŋ ŋamalac gebe lau gêdêŋ amac, mago Anôtô kêjala amacnêm ŋalêlôm su. Waeŋ taŋ ŋamalac sê taêŋ naŋ, Anôtô gêlic amboac gêŋ alôb-alôb.

16 “Mosenê biŋsu to propetenêŋ biŋ gêbacnê gêdêŋ Joaŋnê têm, go sêsôm ŋawae ŋajam Anôtônê gamêŋŋa lasê ma lau samob sêkac tauŋ sebe sêsô sêna. 17 Mago undambê to nom embe ê su, oc ŋagaô êlêlêc biŋsu ŋatalô sauŋanô teŋ ê suŋa su.

18 “Ŋac teŋ embe endec nê awê ma ênam teŋ, oc êŋgôm gêŋ mockaiŋŋa. Ma ŋac teŋ embe ênam awê, taŋ nê akweŋ gedec eŋ naŋ, oc êŋgôm gêŋ mockaiŋŋa amboac tonaŋgeŋ.

Ŋac tolêlôm agêc Lasara

19 “Ŋac tolêlôm teŋ gêŋgôŋ. Eŋ kêsô ŋakwê asôsamuc to kwalam-kwalam ŋajam-ŋajam ma kêtôm bêcgeŋ kêmoasiŋ tau ŋapep. 20 Ma ŋac ŋalêlôm sawa teŋ gêŋgôŋ, nê ŋaê Lasara. Kamoc gêjac têc eŋ auc ma tetoc eŋ gêc ŋac tolêlôm nê sacgêdô. 21 Eŋ gebe êniŋ mo ŋapopoc, taŋ kêsêlô aŋga ŋac tolêlôm nê tebo naŋ, ma kêam sêja e têdamôê ênê kamoc. 22 Sêmoa acgom, go ŋac ŋalêlôm sawa tau gêmac êndu ma aŋela sêsip eŋ jatetoc eŋ gêŋgôŋ Abrahamnê labum ŋaô. Go ŋac tolêlôm gêmac êndu amboac tonaŋgeŋ ma sêsuŋ eŋ. 23 Eŋ gêmoa lamboam toŋandaŋ kapôêŋ ma gêôc mataanô sa e gêlic Abraham gêŋgôŋ jaêcgeŋ ma Lasara gêŋgôŋ eŋ labum ŋaô. 24 Tec gêmôêc gebe ‘Tamoc Abraham, taêm walô aê ma ôsakiŋ Lasara êsac lêmalatu ŋatêpôê ŋagec tôŋ êsêp bu ma mêŋêmoasac imbeloc êtu luc gebe gamoa jawaô ŋalêlôm toŋandaŋgeŋ.’ 25 Ma Abraham kêsôm gebe ‘Latucenec, taêm ênam gebe kôkêc nêm ŋajam su kwanaŋgeŋ gêdêŋ gômoa matam jali, ma Lasara kêkôc secgeŋ. Mago galoc eŋ gêŋgôŋ malôgeŋ aŋga tonec ma aôm gômoa toŋandaŋgeŋ. 26 Ma biŋ teŋ êwiŋ gebe Ŋasawa kapôêŋ tec gec, geŋ aêac to amac gêŋgic. Lau teŋ aŋga tonec embe taêŋ ênam gebe dêndêŋ amac sêwac, oc têtôm atom. Ma aŋga tonaŋ amboac tonaŋgeŋ.’ 27 Go ŋac tolêlôm kêsôm gebe ‘Amboac tonaŋ, tamoc, jateŋ aôm gebe ôsakiŋ eŋ êna tamocnê andu. 28 Aêŋoc lasici lemeŋ teŋ tê sêŋgôŋ, tê naêkêŋ puc êsêac ŋapep gebe sêsêp ŋandaŋ ŋagamêŋ tonec sêmêŋ sêwi ŋ atom.’ 29 Tec Abraham kêsôm gebe ‘Mose to propete nêŋ biŋ tê gêc êsêacŋa nê, ac sêŋômaŋ.’ 30 Ma eŋ kêsôm gebe ‘Masi, tamoc Abraham, tonec kêtôm atom. Mago ŋac teŋ aŋga ŋacmatênêŋ embe êndêŋ êsêac êna, oc sênam tauŋ ôkwi.’ 31 Tec Abraham kêsôm gêdêŋ eŋ gebe ‘Êsêac embe sêkêŋ taŋeŋ Mose to propete nêŋ biŋ atom, oc sêkêŋ êwiŋ ŋac, taŋ êndi sa aŋga ŋacmatênêŋ naŋ, atom amboac tonaŋgeŋ.’”

Copyright information for `JAE