Matthew 11

Jesu kêdôŋ nê ŋacseŋomi 12 su, go gêdi aŋga tonaŋ gêja gebe naêndôŋ to ênam mêtê lau êtôm nêŋ malacgeŋ.

Ŋackêsagu Joaŋ kêkêŋ lau dêdeŋ Jesu sêja

(Luk 7:18-30)

Joaŋ gêŋgôŋ kapoacwalô e gêŋô Kilisinê koleŋ ŋawae, tec kêsakiŋ nê ŋacseŋ omi ŋagêdô jatêtu kênac eŋ gebe “Aôm ŋac tau, taŋ sêsôm sebe êmêŋŋa naŋ, me aêac ansaê ŋac teŋ acgom.” Tec Jesu gêjô êsêac aweŋ gebe “Ana ma anac miŋ gêŋ, taŋ aŋô to alic naŋ, êndêŋ Joaŋ gebe mateŋpec sêlic gamêŋ kêtiam to magiŋ kêsu sêsêIêŋ, kamocbôm têtu selec to taŋeŋsuŋbic sêŋô biŋ, ŋacmatê dêdi sa to lau sêsôm ŋawae ŋajam lasê gêdêŋ lau ŋalêlôm sawa. Ma aê aoc êôc êsêac, naŋ têntac lulu kêtu aêŋa atom naŋ.”

Êsêac sêc sêja acgom, go Jesu gêôc awa sa ma kêsôm biŋ gêdêŋ lau totoŋ-totoŋ tau kêpi Joaŋ gebe “Amac asa gamêŋ sawa aja abe al ic asageŋ. Abe alic sôbolec teŋ mu gêôc jakêsêp mêŋkêsêp me. Aja abe alic asageŋ. Abe alic ŋac teŋ kêsô ŋakwê palê-palê me. Alic acgom, lau, taŋ sêsô ŋakwê palê- palê naŋ, sêŋgôŋ kiŋgeŋ nêŋ andu. Asa aja kêtu ageŋŋa. Abe alic propete teŋ me. Aec, aê jasôm êndêŋ amac gebe ŋac tau kêlêlêc propete su, 10 gebe ŋac tau tec teto biŋ kêpi eŋ gebe

‘Ôlic acgom, aê jasakiŋ ŋoc ŋacjaeŋ êmuŋ aôm naêmansaŋ nêm intêna, taŋ gêc aôm laŋômnêmŋa naŋ.’
Anôtônê biŋ tau tonaŋ.
11 Biŋŋanô, aê jasôm êndêŋ amac gebe Lau samob, taŋ lauo sêkôc êsêac naŋ, nêŋ teŋ kêlêlêc ŋackêsagu Joaŋ atom. Mago ŋac sauŋ, taŋ sêsam eŋ kêtu ŋamu aŋga gamêŋ undambêŋa naŋ, kêlêlêc eŋ su. 12 Gêdêŋ taŋ ŋackêsagu Joaŋ kêpoa lasê e mêŋgêdêŋ galoc nec Anôtô gêu gamêŋ undambêŋa lasê, ma lau, taŋ sêjac tênêp naŋ, oc sêjaŋgo su. 13 Gebe propete samob to Mosenê biŋsu seoc biŋ lasê e gêdêŋ Joaŋ 14 ma amac embe taêm ênam gebe akôc sa, go akêŋ êwiŋ gebe Joaŋ eŋ Elia, taŋ sêsôm gebe êmêŋ naŋ. 15 Ŋac teŋ nê taŋasuŋ embe ênêc, naŋ êŋômaŋ.

16 “Aê janam dôŋ lau têm tonecŋa êpi asageŋ. Êsêac têtôm ŋapalê, taŋ sêmoa malacluŋ ma sêmôêc gêdêŋ tauŋ gebe 17 ‘Aêac ajac oŋ, mago amac atê wê atom. Aêac ataŋ taŋiboa, mago amac ataŋ awiŋ atom.’ 18 Joaŋ gêmêŋ e geŋ to gênôm gêŋ atom, ma lau sêsôm sebe ‘Ŋalau sec teŋ gêgôm eŋ.’ 19 Ŋamalacnê Latu mêŋgeŋ to gênôm gêŋ ma mêŋac sêsôm teŋ gebe ‘Alic eŋ lasamtêna to gênôm wain anaboa, teloŋ to lau sec nêŋ teŋ eŋgoc.’ Mago Anôtônê mêtê tokauc gêjam ŋanô kêwaka tau sa.”

Jesu geŋ oliŋ malac, taŋ sêkêŋ gêwiŋ atom naŋ

(Luk 10:13-15)

20 Go Jesu gêôc awa sa ma geŋ oliŋ malac, taŋ sêlic ênê gêŋtalô taêsam naŋ, gebe sêjam tauŋ ôkwi atom gebe 21 “Ojae Korasinma, ojae Betsaidama, gêŋtalô taŋ gagôm aŋga amacnêm naŋ, embe jaŋgôm aŋga Turu to Sidon nêŋ, oc sênam tauŋ ôkwi wanêcgeŋ su ma sêsô talu sa to sênac tauŋ auc. 22 Amboac tonaŋ jasôm êndêŋ amac gebe Êndêŋ bêc Anôtô êmêtôc ŋamalacnêŋ biŋŋa eŋ taê walô lau Turu to Sidon êlêlêc amac su. 23 Ma aôm Kapanaum gobe sêsuŋ aôm sa e ŋatêpôê nadiŋgeŋ undambê me. Aôm oc u taôm ôsêp lamboam ôna. Gêŋtalô taŋ kêsa aômnêm gamêŋ naŋ, embe êsa Sodom oc ênêc e mêŋêndêŋ tonec. 24 Amboac tonaŋ jasôm êndêŋ amac gebe êndêŋ bêc Anôtô êmêtôc ŋamalacnêŋ biŋŋa eŋ taê walô lau Sodom êlêlêc amac su.”

Andêŋ aê amêŋ ma alêwaŋ taôm

(Luk 10:21-22)

25 Gêdêŋ ŋasawa tonaŋ Jesu gêôc awa sa ma kêsôm gebe “Tamoc, undambê to nom Ŋatau, aê jalambiŋ aôm gebe gôsa biŋ tônê ŋai auc gêdêŋ lau mêtê to lau tokauc ma goc lasê gêdêŋ ŋapalê dedec. 26 Tamoc, biŋŋanô, aôm gôlic ŋajam amboac tonaŋ, tec gôgôm nêm gêŋ.

27 “Tamoc kêkêŋ gêŋ samob gêdêŋ aê, ma ŋac teŋ kêjala Latu atom, Tama taugeŋ. Ma Tama, naŋ ŋac teŋ kêjala eŋ atom, Latu taugeŋ to lau, taŋ Latu gebe eoc lasê êndêŋ êsêac.

28 “Amac samob, taŋ aŋgôŋ jageo to aôc wapac amoa naŋ, andêŋ aê amêŋ, go janam amac awem su. 29 Aôc ta ambalaŋ ŋoc wabaŋa e jatu nêm kêdôŋwaga gebe ŋoc ŋalêlôm malô to katoc tauc sa atom, ec atap malem alêwaŋ taômŋa sa. 30 Gebe ŋoc tê ŋagaô to ŋoc waba ŋawapac atom.”

Copyright information for `JAE