Matthew 6

Biŋ tamoasiŋ lauŋa

“Alic taôm gebe anam sakiŋ Anôtô êtu ŋamalac sêlic amacŋa atom. Embe aŋgôm êtu lau sêlic amacŋa, go atap ŋagêjô aŋga Tamemi, taŋ gêmoa undambê naŋ, nê sa atom.

“Amboac tonaŋ embe ômoasiŋ lau, naŋ ôkêŋ lau sênac dauc êtaŋ aôm atom amboac lau tetoc tauŋ saŋa sêgôm sêmoa lôm to malacluŋ gebe ŋamalac sêlambiŋ êsêac. Biŋŋanô, aê jasôm êndêŋ amac gebe Êsêac seso nêŋ ŋaôligac. Mago aôm embe ômoasiŋ lau, naŋ ôŋgôm kelecgeŋ, lau teŋ sêŋô ŋawae atom, gebe nêm moasiŋ êsiŋ tau ênêc lêlômgeŋ, go Tamam, taŋ gêlic gêŋ kêsêp lêlômgeŋ naŋ, êkêŋ ŋagêjô êndêŋ aôm.

Biŋ tateŋ mecŋa

(Luk 11:2-4)

“Ma embe ateŋ mec, naŋ atôm lau tetoc tauŋ saŋa atom, gebe êsêac têntac gêwiŋ gebe teteŋ mec sêkô lôm to intêna gêga tau ŋamala êtu têtôc tauŋ êndêŋ lau sêlic êsêacŋa. Biŋŋanô, aê jasôm êndêŋ amac gebe Êsêac seso nêŋ ŋaôligac. Mago aôm embe oteŋ mec, naŋ ôsô nêm balêm ôna e naôlai katam auc, go oteŋ mec êndêŋ Tamam, taŋ gêmoa lêlôm, ma Tamam, taŋ gêlic gêŋ kêsêp lêlômgeŋ naŋ, êkêŋ ŋagêjô êndêŋ aôm.

“Embe ateŋ mec, naŋ ateŋ êtu biŋ ole amboac lau samuc atom. Êsêac tonaŋ seboc sêkôc ŋanô êtu nêŋ ŋalô gwalêkiŋŋa. Atôm êsêac atom, gebe Tamemi kêjala gêŋ, taŋ gêjô amac ma abe ateŋ naŋ kwanaŋgeŋ. Amboac tonaŋ ateŋ nêm mec amboac tonec gebe

‘Tamemai, taŋ gômoa undambê.
Aômnêm ŋaê lau sênam dabuŋmaŋ.
10 Ômôêŋ ôtu Apômtau ôtôm gamêŋgeŋ.
Aômnêm biŋ êtu tôŋ aŋga nom amboac aŋga undambê.
11 Ôkêŋ aêacma mo êtôm bêcgeŋŋa êndêŋ aêac êndêŋ oc tonec.
12 Nêm tôp, taŋ gêc aêac naŋ, ôsuc ôkwi amboac aêac asuc ma tôp ôkwi gêdêŋ tauŋ.
13 Ôwê aêac asa lêtôm atom.
Ôjaŋgo aêac su aŋga gêŋ sec.
(Aôm Apômtau, aôm ŋaniniŋ to ŋajaŋa
ma ŋawê ŋatau laŋgwa teŋgeŋ. Biŋŋanô.)’
14 Gebe amac embe asuc ŋamalacnêŋ biŋ ôkwi, go Tamemi undambêŋa êsuc amacnêm biŋ ôkwi amboac tonaŋ. 15 Ma embe asuc ŋamalacnêŋ biŋ ôkwi atom, go Tamemi êsuc amacnêm biŋ ôkwi atom amboac tonaŋgeŋ.

Biŋ tanam dabuŋ moŋa

16 “Embe anam dabuŋ mo, naŋ aŋgôm laŋômanô bêlê-bêlê amboac lau tetoc tauŋ saŋa atom. Lau tonaŋ sêgôm laŋôŋanô taujala gebe têtêc tauŋ êndêŋ lau sêlic êsêac sêjam dabuŋ mo. Tec biŋŋanô, aê jasôm êndêŋ amac gebe Êsêac seso nêŋ ŋaôligac. 17 Amboac tonaŋ aôm embe ônam dabuŋ mo, naŋ ôniŋ oso môkêmapac to Okwasiŋ laŋômanô, 18 gebe ôtôc taôm ôndêŋ lau sêllc aôm gôjam dabuŋ mo nec atom, mago Tamam, taŋ gêmoa lêlôm naŋ, oc êjala ma gêlic gêŋ kêsêp lêlômgeŋ, tec êkêŋ ŋagêjô êndêŋ aôm.

Biŋ awa undambêŋa

(Luk 12:33-34)

19 “Anac nêm awa sa aŋga nom atom, gebe buleseŋ to da enseŋ gêŋ tau su ma geŋgeŋtêna oc sêkwê ma sênam geŋgeŋ sa. 20 Anac nêm awa sa aŋga undambê acgom, gebe buleseŋ to da enseŋ su ma geŋgeŋtêna sêkwê ma sênam geŋgeŋ sa atom. 21 Gebe gamêŋ, taŋ nêm awa gêc naŋ, nêm ŋalêlôm oc êsap tôŋ amboac tonaŋgeŋ.

Biŋ kêpi ôliŋ ŋaja

(Luk 11:34 36)

22 “Matamanô kêtu ôlim ŋaja. Matamanô embe ŋajam, oc ŋawê ênam ôlim samucgeŋ auc. 23 Ma matamanô embe sec, oc ôlim samuc ŋakesec. Embe ŋawê, taŋ gêc nêm ŋalêlôm naŋ, ŋakesec êsa, go ŋakesec tau ênam sêga.

Biŋ tanam sakiŋ Anôtô to awaŋa

(Luk 16:13)

24 “Ŋac teŋ ênam sakiŋ ŋatau luagêc êŋgôm êtôm atom, eŋ oc têtac endec teŋ ma têtac êwiŋ teŋ me oc êsap teŋ tôŋ ma têtac êmbu teŋ. Amac amboac tonaŋ. Atôm gebe anam sakiŋ Anôtô to awa êpi tageŋ atom.

Biŋ tapô sim taauŋ atomŋa

(Luk 12:22-31)

25 “Tec aê jasôm êndêŋ amac gebe Apô sim taôm êtu aniŋ to anôm geŋ êôc amac tôŋ amoa matem jaliŋa atom to êtu ŋakwê ênsaŋ ôlimŋa atom. Amoa matem jali kêlêlêc mo ma ôlim kêlêlêc ŋakwê su. 26 Asala moc, naŋ sêmoa umboŋ ŋalabu. Êsêac tauŋ sêsê gêŋ to sejoŋ ma sêjac ŋanô sa kêpi andu atom, mago Tamemi undambêŋa gêlôm êsêac. Ma amac abe oc alêlêc moc tau atom me. 27 Amacnêm asa oc êpô sim tau êtu nê têm êmoa nomŋaŋa ma ênac têku ŋasawa tageŋ êwiŋ.

28 “Amac apô sim taôm ŋakwêŋa kêtu asageŋŋa. Asala mênamiŋ, taŋ kêpuc kêkô saleŋ naŋ, gêjam kôm to kêsac obo atom. 29 Mago jasôm êndêŋ amac gebe Salomonê gêŋ ŋawasi samob, taŋ kêkwa eŋ auc naŋ, ŋateŋ kêtôm gêŋ tonaŋ ŋai atomanô. 30 Mago Anôtô embe êkêŋ gêgwaŋ, taŋ galoc kêkô kôm ma bêbêc sêkêŋ êsa ja naŋ, ŋagêlôm êkwa auc, naŋ oc êkêŋ gêŋ êkwa amac auc êlêlêc atom me. Amac lau akêŋ gêwiŋ kwalecŋa. 31 Amboac tonaŋ apô sim taôm to asôm gebe ‘Taniŋ asageŋ’’ me ‘Tanôm asageŋ’ me ‘Tasô asageŋ’ naŋ atom. 32 Gêŋ samob tonaŋ ŋai lau samuc oc taêŋ êka. Mago Tamemi undambêŋa tec kêjala gebe apô lêna gêŋ samob tonaŋ ŋai. 33 Amboac tonaŋ ansom ênê gamêŋ to aŋgôm biŋ, taŋ eŋ kêjatu naŋ, êtu ŋamata acgom, go gêŋ samob tonaŋ ŋai êtu amacnêm êwiŋ. 34 Apô sim taôm êtu gêŋ eleŋ bêbêcŋa atom, gebe apô sim taôm gêŋŋa oc masi êndêŋ eleŋ bêbêc atom. Gêŋwapac kêlêti bêc samob auc kêtômgeŋ.

Copyright information for `JAE