Micah 1

Apômtaunê biŋ gêdêŋ Mika aŋga malac Moreset gêdêŋ kiŋ Judaŋa Jotam agêc Ahas ma Hiskia nêŋ têm. Eŋ gêlic biŋ tau kêkanôŋ Samaria to Jerusalem.

Taŋiboa kêpi Samaria to Jerusalem

O amac lau tomôkê-tomôkê samob, akêŋ taŋemmaŋ,
o nom to ŋagêŋlêlôm samob, aŋômaŋ.
Apômtau Anôtô, taŋ êsa aŋga nê lôm dabuŋ êmêŋ naŋ,
gebe êwa amacnêm biŋ sa e ênêc awêgeŋ.
Gebe alic acgom, Apômtau kêsa aŋga nê gamêŋ gêmêŋ,
eŋ oc êsêp mêŋêka nom ŋagamêŋ ŋabau.
Ma lôc, taŋ akaiŋ êka naŋ, oc êwê
êtôm lêp ŋaobo, taŋ ja geŋ naŋ.
Ma gaboaŋ oc êôc êkôc
êtôm bu, taŋ gêboaŋ kêsêp salic naŋ.
Biŋ samob tonaŋ êsa êtu Jakobnê geoŋa
ma êtu gôlôac Israel nêŋ secŋa.
Jakobnê geo tau ŋam amboac ondoc
Ŋam kêsêp Samaria atom me.
Gôlôac Juda nêŋ sec tau ŋam amboac ondoc.
Ŋam kêsêp Jerusalem atom me.
Kêtu tonaŋŋa aê gabe jaŋgôm Samaria êtu lênduc teŋ
êkô awê aŋga gamêŋ tau,
jaŋgôm êtu gamêŋ sêsê wain êsêpŋa.
Aê jansambi ŋapoc êsêp gaboaŋ êna
ma jakip malac tau ŋanombaŋ sa ênêc awêgeŋ.
Êsêac oc têtuc Samaria ŋakatu samob popoc
ma sêkêŋ ja êniŋ ŋada awalauŋ
ma aê oc janseŋ ŋagwam samob su.
Gebe gêŋ samob tonaŋ ŋai ŋam kêsêp mockaiŋo ŋaôli.
tec gêŋ tau êmu naêtu mockaiŋo ŋaôli êtiam.

Kêtu tonaŋŋa aê gabe japuc taŋiboa sa ma jataŋ,
aê jasô atapa atom, jasêlêŋ ŋa ockaiŋ ŋaôma ma toôlic ŋaôma
Aê oc jataŋ amboac kêam saleŋŋa
ma jataŋ amboac kêcsêwa,
gebe kamoc, taŋ Apômtau gêjac naŋ, oc emo atom,
ma kamoc tau jagelom Juda,
ma gêô lasê ŋoc launêŋ katam jagêdêŋ Jerusalem.

Ŋacjo têdabiŋ Jerusalem

10 Asôm biŋ tau lasê aŋga Gat atom, ataŋ atomanô.
Ansambi taôm anêc kekop aŋga Bet-Le-Apra. *
11 Amac lau Sapirŋa, andi asêlêŋ.
Lau Sananŋa sêsa aŋga nêŋ malac sêmêŋ atom.
Taŋiboa taŋ kêpi aŋga Bet-Esel naŋ, oc elom amac.
12 Lau Marotŋa sêkêŋ mateŋ gêŋ ŋajam elêmê,
gebe gêŋwapac sec kêsêp aŋga Apômtaunê gêmêŋ
mêŋgêô lasê katam Jerusalemŋa.
13 Amac lau Lakisŋa, amansaŋ hosnêŋ ômbiŋkap, gebe sê kareta.
Aôm kôtu Sion latuonê sec ŋamôkê,
gebe êsêac têtap Israelnêŋ geo sa aŋga aôm ŋalêlôm.
14 Amboac tonaŋ akêŋ gêŋ êndêŋ Moreset-Gat ma awi êsêac siŋ.
Aksib ŋaandu oc êtu lakô êndêŋ Israelnêŋ kiŋ.

15 O lau Maresŋa, aê jasakiŋ lau-sêku-amac-tuluwaga êndêŋ amac êtiam,
ma Israelnêŋ ŋawasi oc naêô lasê Adulam.
16 Ôkaliŋ taôm ma ôkapiŋ môkêmlauŋ êtu nêm gêŋenecŋa.
Ôkaliŋ taôm pomgeŋ,
gebe êsêac oc sêwi aôm siŋ nasêŋgôŋ kapoacwalô.**
Ŋamadiŋ 10-15 ŋam gêc awa atom. Propete gêwa malac
ŋagêdô nêŋ gêŋwapac, taŋ atap êsêac sa naŋ sa.
Lau Juda sêkaliŋ tauŋ katu gêŋwapac, taŋ katap
êsêac sa naŋŋa.
Copyright information for `JAE