Micah 4

Apômtau ênam gôliŋ nom ŋagamêŋ samob towamageŋ

Êndêŋ bêc ŋamuŋa Apômtaunê
andu ŋalôc oc êpi êlêlêc lôc ŋagêdô su
ma eleŋ gamêŋ samob su.
Ma tenteŋlatu sêwê dêndêŋ lôc tau sêna.
Ma lau tomôkê-tomôkê oc sêmêŋ ma sêsôm gebe
“Ajôc, tapi Apômtaunê lôc tana,
dandêŋ Jakobnê Anôtônê andu tanamaŋ,
gebe êndôŋ nê lêŋ êndêŋ aêac e tasa ênê intêna.
Gebe ŋagôliŋ êsa aŋga Sion ma Apômtaunê biŋ aŋga Jerusalem.”
Eŋ oc êmêtôc tenteŋlatu taêsam nêŋ biŋ
ma ênam gôliŋ lau tomôkê-tomôkê ŋajaŋa aŋga gamêŋ jaêc.
Êsêac sênam nêŋ siŋ ôkwi êtu kinom
ma nêŋ kêm êtu lêŋgêc.
Lau-m teŋ sênac siŋ êndêŋ lau-m teŋ atom
ma têndôŋ lêŋ sênac siŋŋa êtiam atom.
Êsêac samob sêŋgôŋ nêŋ wain ŋalabu
ma sêŋgôŋ nêŋ kaŋanô ŋaajuŋlabu êndêŋ- êndêŋgeŋ,
ma lau teŋ têtakê êsêac atom,
gebe lau siŋ undambêŋa nêŋ Apômtau kêsôm sugac.

Tenteŋlatu samob sêsêlêŋ sêjam nêŋ anôtôi jaba laŋôŋ,
mago aêac oc tasêlêŋ tanam aêacnêŋ Apômtau Anôtô laŋô teŋgeŋ ma teŋgeŋ.

Apômtau êŋgamboac lau Israel su aŋga kapoacwalô

Apômtau kêsôm gebe
“Êndêŋ bêc ônê aê oc jajoŋ magiŋ kêsu sa
ma jakatoŋ êsêac, taŋ sêjanda êsêac êliŋ-êliŋ
to êsêac, taŋ kakêŋ ŋandaŋ gêdêŋ êsêac naŋ sa.
Aê oc jaŋgôm magiŋ kêsu têtu lau ŋapopoc,
ma êsêac, taŋ sêsa êsêac êliŋ-êliŋ naŋ, têtu lau- m ŋajaŋa.
Ma Apômtau ênam gôliŋ êsêac aŋga lôc Sion
galoc ma endeŋ tôŋgeŋ.”

O andu soso, taŋ domba ŋatoŋ sêkac sa sêmoa naŋ,
o Sion latuonê ŋabau
gôliŋ kiŋŋa ma gamêŋ kiŋŋa, taŋ gôlôac Israel sêwê kaiŋ gêdêŋ andaŋgeŋ naŋ,
oc êmu êndêŋ aôm êwac êtiam.

Amboac ondoc tec kôtaŋ kapôêŋ.
Kiŋ teŋ gêmoa gêwiŋ aôm atom me.

Me ŋac-gêwa-biŋ-sawaga gêjaŋa,
tec ŋandaŋ kêtuŋ aôm amboac awê, taŋ ŋapalê kêtuŋ eŋ naŋ me.
10 O Sion latuo, ŋandaŋ êmônaŋ aôm ma ôtaŋ
êtôm awê, taŋ ŋapalê kêtuŋ eŋ naŋ,
gebe galoc oc ôwi malac siŋ ma ôsa naôŋgôŋ gamêŋ sawa.
Aôm oc ôna Babel, ma aŋga ônê Apômtau oc ênam aôm kêsi
ma ênam aôm sa aŋga nêm ŋacjo lemeŋ.

11 Galoc lau-m taêsam sêkac sa sebe sênac siŋ êndêŋ aôm.
Êsêac sêsôm gebe “Daŋgôm ênê dabuŋ paliŋ
e Sion ŋapopoc ênac mateŋanô ŋajam.”
12 Mago êsêac sêjam kauc biŋ, taŋ Apômtau taê gêjam naŋ.
Êsêacnêŋ kauc kêsa kêpi biŋ, taŋ eŋ kêmasaŋ gebe êŋgôm ŋanô êsaŋa naŋ, atom.
Eŋ kejoŋ êsêac sa amboac sêjac lagic polom toŋakaiŋ,
gebe sêkôc sêna sêka polom ŋamala.
13 O Sion latuo, ôndi ma ôka polom,
gebe aê jakêŋ jabo ki to ampoap ki joŋjoŋ êndêŋ aôm.
Aôm oc ôka lau-m taêsam popoc
ma ôkêŋ êsêacnêŋ waba êtu da êndêŋ Apômtau
to êsêacnêŋ awamata êndêŋ nom samuc ŋatau.
Copyright information for `JAE