Numbers 20

Bu kêsa aŋga poc

Gêdêŋ ajôŋ ŋamataŋa lau Israel nêŋ gôlôac samob sêô lasê gamêŋ sawa Sin ma lau sêlêwaŋ tauŋ sêŋgôŋ Kades. Ma Miriam gêmac êndu ma sêsuŋ eŋ aŋga tônê.

Ma gôlôacnêŋ bu masi, tec sêkac sa jasêli aweŋ sa gêdêŋ Mose agêc Aron. Ma lau sêôc gêdô Mose ma sêsôm gebe “Ojae, aêac anaŋa awiŋ ma lasitêwai, taŋ Apômtau gêjac êsêac naŋmaŋ. Amagêc awê Apômtaunê gôlôac mêŋaô lasê gamêŋ sawa tonec gebe aêac amac êndu toma bulimakaogeŋ êtu asageŋŋa. Amagêc awê aêac awi Aiguptu siŋ e aô lasê gamêŋ sec tonec kêtu asageŋŋa. Aêac atôm gebe asê gêŋ teŋ atom. Jambô to wain ma aiŋ masi. ma bu anômŋa masi amboac tonaŋgeŋ.” Go Mose agêc Aron sêwi gôlôac siŋ sêja lômbec ŋasacgêdô ma sêu tauŋ laŋôŋanô jagêdêŋ nom. Go Apômtaunê ŋawasi geoc tau lasê gêdêŋ êsêagêc. Ma Apômtau kêsôm gêdêŋ Mose gebe “Ôkôc nêm tôc ma amagêc têwam Aron akac gôlôac sa sêpi tageŋ. Go ôsôm biŋ êndêŋ poc ôkô êsêac laŋôŋnêm gebe poc êkêŋ bu. Amboac tonaŋ ôŋgôm bu êsa aŋga poc êtu êsêacŋa ma ôkêŋ êndêŋ gôlôac to nêŋ bulimakao sênôm.” Ma Mose kêkôc tôc, taŋ gêc Apômtaunê gamêŋ naŋ, kêtôm Apômtau kêjatu eŋ.

10 Go Mose agêc Aron sêkac gôlôac sa sêpi tageŋ sêkô sêwiŋ poc ma kêsôm gêdêŋ êsêac gebe “Amac gêsômtêkwa-ŋatoŋwaga, aŋô acgom. Aêac oc atôm gebe aŋgôm bu êsa aŋga poc ma akêŋ êndêŋ amac me masi.” 11 Go Mose gêôc lêma sa ma gêjac poc ŋa nê tôc kêtu dim luagêc, ma bu kapôêŋ kêsa, ma gôlôac to nêŋ bulimakao sênôm e kêtôm. 12 Ma Apômtau kêsôm gêdêŋ Mose agêc Aron gebe “Amagêc akêŋ gêwiŋ aê atom to awa aê sa e lau Israel sêlic aê amboac ŋac dabuŋ atom, tec amagêc awê gôlôac tonec e nasêsa gamêŋ, taŋ kakêŋ gêdêŋ êsêac naŋ, atom.” 13 Bu tonec bu Meriba, gebe lau Israel sêli aweŋ sa gêdêŋ Apômtau, ma eŋ gêwa tau sa gebe eŋ ŋac dabuŋ.

Lau Edom sêjac jao nêŋ gamêŋ gêdêŋ lau Israel

14 Go Mose kêsakiŋ lau jaeŋŋa aŋga Kades dêdêŋ kiŋ Edomŋa sêja, ma sêsôm gebe “Aôm lasim Israel gebe êsôm êndêŋ aôm gebe Aôm kôjala gêŋwapac samob, taŋ kêtap aêac sa naŋgac. 15 Aêac tamemai sêsêp Aiguptu sêja ma aŋgôŋ Aiguptu ŋasawa baliŋ. Mago lau Aiguptu sêgôm aêac toma tamemai sec. 16 Tec aêac aweŋ gêjac Apômtau ma eŋ kêkêŋ taŋa aêac aweŋ to kêsakiŋ aŋela teŋ. Aŋela tau gêwê aêac asa aŋga Aiguptu amêŋ. Ma galoc aêac aŋgôŋ malac Kades, taŋ gêc nêm gamêŋ ŋamadiŋ naŋ. 17 Ma galoc aêac ateŋ, gebe ôlôc ma aêac asô nêm gamêŋ awac. Aêac oc asa nêm kôm moŋa to kôm wainŋa atom ma anôm bu aŋga bumata atom. Aêac oc asêlêŋ amoa intênasêgageŋ. Aêac oc awi intêna siŋ amu anôŋa me gasêŋa atom e aô lasê nêm gamêŋ ŋamadiŋ ônêŋa.” 18 Mago Edom kêsôm gêdêŋ eŋ gebe “Ôsa ŋoc gamêŋ ômôêŋ atom. Embe ôsa ômôêŋ, oc ôndac aêŋoc siŋ.” 19 Ma lau Israel sêsôm gêdêŋ eŋ gebe “Aêac asêlêŋ amoa intênasêgageŋ. Ma aêac to ma bulimakao embe anôm nêm bu, oc anam ôli bu tau. Aêac abe ateŋ tageŋ tonec, gebe asêlêŋ amoa intênasêgageŋ e aô lasê ŋamadiŋ ônêŋa.” 20 Mago eŋ kêsôm gebe “Aôm ôsa tonec ômôêŋ atom.” Ma Edomnê lau taêsam sêsa dêdêŋ êsêac sêja toŋajaŋageŋ. 21 Amboac tonaŋ Edom gedec ma gêlôc, gebe lau Israel sêsa nê gamêŋŋageŋ sêna atom, tec lau Israel sêjac jaê eŋ.

Aron gêmac êndu aŋga lôc Horeb

22 Lau Israel to nêŋ gôlôac samobgeŋ sêsêlêŋ e sêô lasê lôc Horeb. 23 Aŋga lôc Horeb, taŋ kêkô lau Edom nêŋ gamêŋ ŋamadiŋ naŋ, Apômtau kêsôm gêdêŋ Mose agêc Aron gebe 24 “Aron naêwiŋ nê lau, gebe eŋ êsa gamêŋ, taŋ kakêŋ gêdêŋ lau Israel naŋ, atom. Eŋ êsa atom gebe amagêc ali awem sa to taŋempêc gêdêŋ ŋoc jatu aŋga bu Meriba. 25 Amboac tonaŋ ôkôc Aron agêc latu Eleasar ma ôwê êsêagêc sêpi lôc Horeb sêna. 26 Go ôkwalec Aronnê ŋakwê su ma ôkêŋ êndêŋ latu Eleasar êsô sa. Ma Aron êmac êndu aŋga tônê naêwiŋ nê lau.” 27 Mose gêgôm Apômtaunê jatu ŋanô kêsa ma êsêac sêpi lôc Horeb sêja ma gôlôac samob sêlic. 28 Ma Mose kêkwalec Aronnê ŋakwê su ma kêkêŋ gêdêŋ ênê latu Eleasar kêsô sa. Go Aron gêmac êndu aŋga lôc ônê. Ma Mose agêc Eleasar sêsêp aŋga lôc sêmêŋ. 29 Gêdêŋ taŋ gôlôac samob sêlic gebe Aron gêmac êndu naŋ, lau Israel nêŋ gôlôac samob têtaŋ taŋiboa kêtu eŋŋa kêtôm bêc 30.

Copyright information for `JAE