Psalms 10

PESALEM 10

Mec Anôtô êmêtôc naêndêŋŋa

O Apômtau, amboac ondoc kôkac taôm su wackôkô jaêcgeŋ.
Amboac ondoc kôsiŋ taôm gêdêŋ têm gêŋwapacŋa.
Lau alôb-alôb tetoc tauŋ sa ma sêjanda lau ŋasec.
Biŋ taŋ êsêac taêŋ gêjam naŋ, êtap êsêac tauŋ sa acgommaŋ.

Ŋac alôb-alôb kêkêli tau kêtu nê kauc secŋa
ma ŋac, taŋ gêjam bôlêŋ ŋaôli ôkwi naŋ, kêsôm biŋ meloc kêpi Anôtô e gêwi eŋ siŋ.
Ŋac alôb-alôb nê biŋ gêjac kolec tau gebe Anôtô êkêŋ ŋagêjô atom.
Eŋ ketoc tau sa ma taê gêjam gebe Anôtô gêmoa atom.

Eŋ gêgôm nê gêŋ kêmoatiŋ eŋ e gêmoa ŋajam gedeŋ tôŋgeŋ. Aômnêm lêŋ mêtôcŋa gêjac jaê eŋ.
Eŋ kêtaŋ pêlê nê soŋo-soŋo samob.
Eŋ taê gêjam gêŋ tau gebe “Aê oc jambeŋ teŋ atomanô,
ma gêŋwapac oc êtap aê sa atomanô amboac tonaŋgeŋ.”
Ênê awasuŋ kapuc boa ŋanô ma biŋdansaŋ to ŋaclai gêjam auc.
Gêŋwapac to gêŋ alôb-alôb gêsac imbêla ŋatêpôêgeŋ.

Eŋ gêdib lau gêŋgôŋ gamêŋ gasaŋ e gêjac ŋac, taŋ tobiŋmê naŋ êndu.
Eŋ mata geso lau, taŋ sêpô lêna kêtu gêŋ ŋagêdôŋa naŋ.
Eŋ gê lamu gamêŋ ma gêdib lau amboac lewe gêdib gêŋ gêmoa gamêŋdani.
Eŋ gêdib gebe êkatôm ŋac ŋasec tôŋ.
Eŋ kêkatôm ŋac ŋasec
gebe ênsaic eŋ naêsêp nê uclêlôm.

10 Eŋ kêgalab gewec-gewec
e kêtap lau ŋasec sêpô lêna tauŋŋa sa.
11 Eŋ taê gêjam gêc nê ŋalêlôm gebe “Anôtô kêliŋ siŋ.
Anôtô gêsaŋ laŋôanô auc e gêlic sapu.”

12 O Apômtau, ôndi sa. O Anôtô, ôc lêmam sa.
Ôliŋ lau ŋasec siŋ atom.
13 Ŋac alôb-alôb oc êsôm biŋ meloc-meloc êpi Anôtô êtu asageŋŋa.
Ma amboac ondoc taê ênam ênêc nê ŋalêlôm gebe “Aôm oc ôkêŋ ŋagêjô êndêŋ aê atom nec.”

14 Mago aôm tec gôlic gêŋgac. Aôm gôlic gêŋwapac to lau-sêpô-lênawagagac,
ma aôm lêmam ônam gôliŋ.
Aôm taômgeŋ, tec ŋac kêpô lênaŋa mata kêsap aôm.
Aôm gôjam mosêbu sa.

15 Ônac ŋac alôb-alôb to ŋac, taŋ kêkac tau su aŋga Anôtônê naŋ, lêma tulu.
Ôkêŋ ŋagêjô êpi eŋ êjô nê gêŋ samob e tomalageŋ.

16 Apômtau kêtu kiŋ êŋgôŋ teŋgeŋ ma teŋgeŋ.
Lau samuc maleŋmê aŋga ênê gamêŋ sugac.

17 O Apômtau, aôm kôjala lau ŋasec têntac kêkac êsêac aômŋa.
Aôm gôê taŋam êsêac to kôpuc êsêacnêŋ ŋalêlôm tôŋ,
18 gebe ômêtôc mosêbu to lau sêŋgôŋ jageoŋa nêŋ biŋ êtu katô
e ŋamalac nomŋa têtakê lau teŋ êtiam atom.
Copyright information for `JAE