Psalms 101

PESALEM 101

Kiŋ gêjac mata biŋ

Aê gabe jaŋga wê api moasiŋ to biŋgêdêŋ.
O Apômtau, aê gabe janam wê êndêŋ aômgeŋ.
Aê gabe jasa lau laŋôŋnêm sawa nêŋ lêŋ
Aôm oc ôndêŋ aê ômôêŋ êndêŋ ondoc.

Aê gabe jaŋgôŋ ŋoc andulêlôm
toŋoc ŋalêlôm ŋawageŋ.
Aê gabe matoc êndiŋ
gêŋ eso atom.
Aê jakêŋ kisa êndêŋ êsêac, taŋ sêkac tauŋ su aŋga Anôtônê.
Biŋ amboac tonaŋ êtap aê sa atom.
Ŋalêlôm keso ênac jaê aê.
Aê gabe janam kauc gêŋ sec.
Aê gabe janseŋ lau,
taŋ sêgôliŋ biŋ sacgeŋ kêpi nêŋ lau sackapoa gêdô gêdêŋ tauŋ naŋ.
Lau teŋbeleŋ aŋgeŋ ma êsêac, taŋ nêŋ ŋalêlôm kêkiaŋ tauboa naŋ,
galic êsêac keso ŋoc ŋalêlôm.

Matoc gê lau, taŋ sêgôm nêŋ gêŋ ŋaŋêŋgeŋ naŋ,
gebe sêmoa sêwiŋ aê.
Lau tolaŋôŋnêm sawa
oc sênam sakiŋ aê.

Ŋac teŋ embe ênam biŋ dansaŋ ŋa lêmageŋ
oc êŋgôŋ ŋoc andu atom.
Matoc geso lau,
taŋ sêsôm biŋ dansaŋ sêmoa naŋ.
Lau samob, taŋ sêgôm biŋ alôb-alôb naŋ,
janseŋ êsêac su aŋga gamêŋ tonec êtôm bêcgeŋ.
Ma lau samob, taŋ sêgôm sec naŋ,
oc janseŋ êliŋ-êliŋ aŋga Apômtaunê malac.
Dawidnê pesalem teŋ.


Copyright information for `JAE