Psalms 104

PESALEM 104

Apomtau gejob nê gêŋ, taŋ eŋ kêkêŋ naŋ

O katuc tau, ôlanem Apômtau. O ŋoc Apômtau Anôtô, aôm ŋac kapôêŋgoc.
Aôm kôsô ŋawasi kiŋŋa to ŋaclai kêtu nêm.ŋakwê.
Aôm gôi taôm auc ŋa ŋawê kêtu nêm gadê.
Aôm gôlam undambê kêtôm becobo.
Aôm gôjac nêm andu ŋademboŋ tôŋ tamiŋ bu.
Tao kêtu nêm kareta ma gôŋgôŋ mu ŋamagê ŋaô.
Aôm kôkêŋ mu kêtu nêm jaeŋwaga.
Aôm kôkêŋ ôsic towaô kêtu nêm sakiŋwaga.

Aôm kôsuŋ nom ŋaalê kêsêp ŋêŋgeŋ gêja, tec kêkô ŋajaŋa,
amboac tonaŋ oc wiwic atomanô.
Aôm kôkêŋ gwêc kêkwa nom tau auc kêtôm ŋakwê
ma bu tau kêpoac e kêlêlêc lôc su.
Aôm goec biŋ bu, tec gê su.
Aôm gôjac wapap kêtaŋ, tec kêtaiŋ tau su gêja.
Aôm kôkêŋ lôc kêpi ma gaboaŋ gênê kêsêp gêja
e kêtôm ŋamadiŋ, taŋ aôm kôtôc naŋ.
Aôm kôtôc bu tau ŋamadiŋ gebe êŋgêli atom
gebe bu tau ênam nom samucgeŋ auc êtiam atom.

10 Aôm kôkêŋ bumata kêpulu kêsa gaboaŋ
ma bu tau keseleŋ kêsa lôc ŋasawageŋ gêja.
11 Gêŋ mateŋ jali saleŋŋa samob sênôm.
Bôcgabuŋ sênôm e gêôc êsêac tôŋ.
12 Moc taŋ sêmoa umboŋ ŋalabu naŋ, sêjam sac sêŋgôŋ ŋalêndaŋ.
Sêjam nê wê kêtaŋ kêsa ŋalaka ŋasawa.

13 Aôm kôkêŋ kom aŋga nêm andu lôlôcŋa mêŋkêmalôm lôc.
Aôm gôjam kôm ŋamoasiŋ gêôc tôŋ.
14 Aôm kôkêŋ gêgwaŋ kêpi gebe bôc sêniŋ
ma gêŋ tolauŋ gebe ŋamalac sênam ŋakôm
e têtap gêŋ sêniŋŋa sa aŋga nom
15 to wain gebe êŋgôm ŋamalacnêŋ ŋalêlôm ŋajam êsa ma niptêkwi gebe êŋgôm ŋamalacnêŋ laŋôŋanô sênic- sênic êsa.

16 Kaseda Lebanonŋa sênôm bu e gêôc êsêac tôŋ.
Ka tau Apômtaunê ka, taŋ tau kêsê naŋ.
17 Moc sêjam ic sêŋgôŋ ka tau
ma boaloc gêjam sac gêŋgôŋ kêmêsic.
18 Lôc baliŋ kêtu noniŋ gêbôm nêŋ gamêŋ
ma mojaŋ têkam sê lamu ŋapoclabu.

19 Aôm kôkêŋ ajôŋ gebe êtôc têm ŋanoc.
Oc tau kêjala ŋanoc naêsêpŋa.
20 Aôm kôkêŋ ŋakesec, tec gêbêcauc,
go gêŋ saleŋŋa samob oliŋ palê êsa.
21 Lewe matac têtaŋ sebe sêniŋ nêŋ gwada,
sêjatu nêŋ mo aŋga Anôtônê.
22 Oc embe êpi, oc têtaiŋ tauŋ su
nasêsa tauŋ sic sênêc nêŋ gêsuŋ.
23 Go ŋamalacgeŋ êsa naênam nê kôm,
êŋgôm nê gêŋ êmoa e êmbêcauc.

24 O Apômtau, aômnêm kôm taêsam ŋanô lasê.
Aôm kômasaŋ gêŋ tau samob tomêtêgeŋ ma aômnêm gêŋ, taŋ kôkêŋ naŋ, gêjam nom auc.
25 Gwêc tau kêpoac ŋatapa kêsô gedec laŋgwageŋ.
Gêŋ mateŋ jali sauŋ to kapôêŋ e gelec-gelecgeŋ.
26 Waŋ sêsêlêŋ sêmoa
ma gasu-gasu, taŋ kôkêŋ naŋ, gêjam nê ôwê gêmoa.

27 Gêŋ tonaŋ ŋai samob sêôŋ aômgeŋ
gebe aôm oc ôkêŋ nêŋ mo êtôm ŋanocgeŋ.
28 Aôm embe ôkêŋ, oc sejoŋ sa.
Aôm embe ôlam lêmam, oc ŋanô ŋajam êôc êsêac tôŋ.
29 Aôm embe ônsaŋ laŋômanô auc, oc têtakê.
Aôm embe ôkôc êsêac aweŋjaô su, oc sêmac êndu ma têtu kekop êtiam.
30 Aôm embe ôkêŋ awamjaô, oc mateŋ jali êsa.
Aôm gôjam nom laŋô ôkwi kêtu wakuc.

31 Apômtaunê ŋawasi oc ênêc teŋgeŋ.
Apômtau oc êtu samuc nê geŋ, taŋ kêkêŋ naŋ.
32 Eŋ mata gê nom, tec kêkôtêŋ tau.
Eŋ lêma kêmoasac lôc, tec ŋajadauŋ kêsa.

33 Aê gabe jaŋga wê êpi Apômtau êtôm ŋoc bêc jaŋgôŋ matoc jali samob.
Aê jaŋga wê lambiŋŋa êndêŋ ŋoc Anôtô êtôm ŋoc têm, taŋ jamoa naŋ.
34 Eŋ êŋô aêŋoc wê ŋajammaŋ
gebe Apômtau gêgôm aê têtac ŋajam kêsa.
35 Lau secwaga sênaŋa aŋga nom ma lau, taŋ sêkac tauŋ su aŋga Apômtaunê naŋ maleŋmê.

O katuc tau, ôlanem Apômtau. Aleluja.
Copyright information for `JAE