Psalms 116

PESALEM 116

Anôtô gêjam ŋac, taŋ kêsa paŋ lêndaŋ naŋ, sa ŋawê daŋgeŋa

Aê têtac gêwiŋ Apômtau gebe eŋ kêkêŋ taŋa aê
ma gêŋô ŋoc taŋiboa.
Eŋ gê taŋa aê.
Amboac tonaŋ jamôêc êndêŋ eŋ êtôm ŋoc bêc samob.
Tamac êndu ŋalêpoa gêsô aê tôŋ ma katêc tauc ŋasec kêtu lamboamŋa.
Aê gaôc gêŋwapac to kapô lêna
e aoc gêjac Apômtaunê ŋaê gebe
“O Apômtau, aê jateŋ aôm ônam aê kêsimaŋ.”

Apômtau eŋ ŋacmoasiŋ to gêdêŋ.
Aêacnêŋ Anôtô kêtu taê labu ŋamôkê.
Apômtau gejob lau meloc-meloc.
Aê katu palê, mago eŋ gêjam aê sa.
O katuc tau, naôlêwaŋ taôm êtiam
gebe Apômtau kêmoasiŋ aômgac.

Biŋŋanô, aôm gôjam katuc kêsi aŋga tamac ênduŋa.
Aôm kôpuc matocgasi tôŋ gêdêŋ matocsulu ma godeŋ ockaiŋ tôŋ gebe jaka selelec atom.
Aê jasa ŋoc lêŋ jamoa Apômtau laŋônêm
aŋga gamêŋ sêŋgôŋ mateŋ jaliŋa.
10 Gêdêŋ taŋ aê kasôm gebe “Ŋoc ŋalêlôm popoc- popocgeŋ” naŋ,
mago gawi kakêŋ gêwiŋ Anôtôŋa siŋ atom.
11 Gêdêŋ taŋ kapô lêna ŋasec naŋ, aê kasôm gebe
“Ŋamalac samob dansaŋtêna.”

12 Aê oc jakêŋ asageŋ êndêŋ Apômtau
êjô nê moasiŋ, taŋ kêkêŋ gêdêŋ aê naŋ.
13 Aê gabe jaôc moasiŋ ŋalaclu sa êtu daŋge
ma gabe aoc ênac Apômtaunê ŋaê.
14 Biŋ taŋ gajac mata gêdêŋ Apômtau naŋ, gabe jaŋgôm êtu tôŋ.
Gabe jaŋgôm êtu tôŋ aŋga ênê lau samob ŋalêlôm.

15 Apômtaunê lau mansaŋ embe sêmac êndu,
oc êlic amboac gêŋwapac teŋ.
16 O Apômtau, nêm sakiŋwaga aê, nêm sakiŋwaga latu aê.
Aôm kôgaboac lêpoa, taŋ gêsô aê tôŋ naŋ su.
17 Aê jakêŋ da daŋgeŋa êndêŋ aôm
ma aoc ênac Apômtaunê ŋaê.
18 Biŋ taŋ gajac mata gêdêŋ Apômtau naŋ, gabe jaŋgôm êtu tôŋ.
Gabe jaŋgôm êtu tôŋ aŋga ênê lau samob ŋalêlôm.
19 Aê gabe jaŋgôm jakô Apômtaunê andu ŋamalacluŋ,
aŋga aôm, Jerusalem, ŋaluŋgeŋ.
Copyright information for `JAE