Psalms 135

PESALEM 135

Aweŋ êôc Apomtau

Aleluja.

Awem êôc Apômtaunê ŋaê.
Amac taŋ ajam sakiŋ Apômtau naŋ, alanem eŋ.
Amac taŋ akô Apômtaunê andulêlôm
to akô aêacnêŋ Anôtônê andu ŋamalacluŋ naŋ,
awem êôc Apômtau, gebe Apômtau eŋ ŋac gabêjam.
Anam wê êpi ênê ŋaê gebe eŋ têtac kêsa laŋgwageŋ.
Gebe Apômtau kêjaliŋ Jakob sa
ma Israel kêtu ênê gêŋlênsêm.

Biŋŋanô, aê galicgac, Apômtau eŋ ŋac kapôêŋ
ma aêacnêŋ Anôtô kêlêlêc anôtôi samob su.
Gêŋ samob, taŋ Apômtau têtac gêwiŋ aŋga undambê to nom ma aŋga gwêc to gêdimbobsêga samob naŋ,
oc êŋgôm êtu tôŋ.
Eŋ tec gêwê tao aŋga gwêcm kêpi gêmêŋ
ma kêkêŋ ôsic kêsêp kom ŋalêlôm ma kêkôc mu su aŋga nom ŋakêclêsu.

Eŋ tec gêjac Aiguptu nêŋ ŋamêc êndu,
gêgôm gêdêŋ ŋamalac to bôc.
Aŋga tônê eŋ kêsakiŋ gêŋsêga to gêŋtalô
gebe êmêtôc Parao to nê sakiŋwaga samob.
10 Eŋ tec geseŋ lau tomôkê-tomôkê taêsam
ma gêjac nêŋ kiŋ toŋaclai êndu.
11 Amboac lau Amor nêŋ kiŋ Sihon ma Basan ŋakiŋ Og
ma lau Kanaan nêŋ kiŋ toê-toê samob.
12 Ma eŋ kêkêŋ êsêacnêŋ gamêŋ
gêdêŋ lau Israel sêwê kaiŋ.

13 O Apômtau, aôm nêm ŋaê oc ênêc teŋgeŋ.
O Apômtau, nêm waem oc êsa êndêŋ gôlôac to gôlôac.
14 Gebe Apômtau kêwaka nê launêŋ biŋgêdêŋ sa
ma taê walô nê sakiŋwaga.
15 Tenteŋlatunêŋ gwam ŋamalac lemeŋ sêgômŋa.
Êsêac sêmasaŋ ŋa silber to gold.
16 Aweŋsuŋ gêc, mago sêsôm biŋ atom.
Mateŋanô gêc, mago sêlic gamêŋ atom.
17 Taŋeŋsuŋ gêc, mago sêŋô biŋ atom
ma sêsi aweŋ atom amboac tonaŋgeŋ.
18 Lau taŋ sêmasaŋ gêŋ tauwaga naŋ, oc têtôm nêŋ gêŋ tonaŋ
ma lau samob, taŋ ôliŋ andaŋ naŋ, amboac tonaŋgeŋ.

19 O Israelnê gôlôac, alanem Apômtau.
O Aronnê gôlôac, alanem Apômtau.
20 O Lewinê gôlôac, alanem Apômtau.
Amac taŋ atêc Anôtô naŋ, alanem Apômtau.
21 Aweŋ êôc Apômtau aŋga Sion,
ŋatau, taŋ gêŋgôŋ Jerusalem naŋ.

Aleluja.
Copyright information for `JAE