Psalms 140

PESALEM 140

Mec êtu Anôtô ênam aêac saŋa

O Apômtau, ônam aê kêsi êndêŋ lau sec
ma ojop aê êndêŋ lau toŋaclai.
Lau tonaŋ taêŋ gêjam biŋ sec gêc nêŋ ŋalêlôm
ma sêkalom kisa kêtôm bêcgeŋ.
Êsêacnêŋ imbeleŋ ŋamata kêtôm moac wêmnê.
Moac ŋamalic gêc kêsa paŋ gêdôŋôlicgeŋ.

O Apômtau, ojop aê êndêŋ lau alôb-alôb lemeŋ.
Ônam jaom aê êndêŋ lau toŋaclai, taŋ sêkic biŋ sebe senseŋ aê naŋ.
Tetoc-tauŋ-sawaga sêwa lakô kêtu aêŋa.
Êsêac sêkic uc gêjac intênataligeŋ ma sêwa lip kêtu aêŋa gebe ênac aê.

Aê kasôm gêdêŋ Apômtau gebe “Ŋoc Anôtô aôm.”
O Apômtau, ôkêŋ taŋam ŋoc taŋi kapôêŋ

O Apômtau, ŋoc Anôtô, ŋoc ŋac, taŋ gôjam aê sa ŋajaŋa naŋ.
Aôm kôtu ŋoc lamu gêdêŋ noc siŋŋa.
O Apômtau, ôkêŋ biŋ, taŋ lau alôb-alôb taêŋ gêjam to kêkac êsêac naŋ, ŋanô êsa atom.
Onseŋ biŋ, taŋ sêkic kêtu aêŋa naŋ su.

Ôkêŋ ŋoc ŋacjo sêku aê tulu atom
ma biŋ, taŋ sêkic kêtu aêŋa naŋ, êpi êsêac tauŋ.
10 Eŋ êkêŋ ŋalana ênsêlô êpi êsêac tauŋ.
Eŋ êtiŋ êsêac sêsêp sêlêlôm sêna e dêndi sa êtiam atom.
11 Ŋac-gêga-biŋwaga oc êmoa naeo.
Ma gêŋwapac oc epeŋ ŋac toŋaclai sec naŋ, piŋpoap- piŋpoap e ênaŋa.

12 Aê galicgac gebe Apômtau oc êmansaŋ lau sêŋgôŋ jageo nêŋ biŋ
to êmansaŋ lau ŋalêlôm sawa nêŋ biŋ.
13 Biŋŋanô, lau gêdêŋ oc sênam daŋge êtu aômnêm ŋaêŋa.
Lau gêdêŋ oc sêŋgôŋ sêwiŋ aôm.
Dawidnê pesalem teŋ.


Copyright information for `JAE