Psalms 17

PESALEM 17

Ŋac mansaŋ awa gêjac Apômtau

O Apômtau, biŋgêdêŋ ŋatau, ôkêŋ taŋam ŋoc taŋi.
Ôê taŋam ŋoc mec gebe kasôm kêsa gêdôcôlic dansaŋ atom.
Aôm taôm oc ômêtôc aêŋoc biŋ,
gebe aôm tec matamanô gôlic gêŋ gêdêŋ.

Embe ônsaê ŋoc ŋalêlôm me embe ôtuc kêniŋ êsêp ŋoc ŋalêlôm êndêŋ êmbac me embe ômbêlêm aê,
oc ôtap aê taêc gêjam biŋ geo teŋ sa atom ma aocsuŋ kasôm biŋ keso teŋ atom.
Ŋamalac embe sêŋgôm nêŋ gêŋ oc sêŋgôm, mago aê kasa ŋaclainêŋ lêŋ atom
gebe aôm awamsuŋ gêjac jao.
Ockaiŋ kêpuc aôm waŋam.
Aê kasêlêŋ kaku-kaku atom.

O Anôtô, aê aoc gêjac aôm, gebe aôm kôkêŋ taŋam aê.
Ôê taŋam aê ma ôŋô ŋoc biŋmaŋ.
Oc nêm têmtac gêwiŋ teŋgeŋŋa lasê.
Aôm gôjam lau, taŋ sêc nêŋ ŋacjo su wacsê lamu nêm anôŋa naŋ kêsi.

Ojop aê êtôm aôm taôm gojob nêm matamanô.
Ôŋgandê aê jaŋgôŋ nêm magêm ŋaajuŋlabu.
Ojop aê êndêŋ lau sec, taŋ têtu kasec aê naŋ,
to êndêŋ ŋoc ŋacjo, taŋ sêgi aê auc e tapi-tapigeŋ sebe senseŋ aêŋa naŋ.

10 Êsêacnêŋ ŋalêlôm ŋadani e taêŋ walô aê atom
ma sêboa tauŋ sa ŋa aweŋsuŋgeŋ.
11 Aê embe jamoa ŋasawa teŋ, oc sêwa aê auc.
Êsêacnêŋ ŋalêlôm taêŋ gêjam tageŋ tonec gebe sênac aê piŋpaŋ e jansambi sa janêc.
12 Êsêac têtôm lewe, taŋ kesegeŋ gwadaŋa gêmoa naŋ.
Ac têtôm lewe ŋalatu, taŋ sacgeŋ-sacgeŋ gêmoa gamêŋdani ŋalêlôm gêdib nê gwada gêmoa naŋ.

13 O Apômtau, ôndi naôndac ŋoc ŋacjo ma ôku êsêac tulu.
Ôc nêm siŋ sa ma ônam katuc kêsi aŋga lau secwaga nêŋ.
14 O Apômtau, taôm lêmam ônam aê sa aŋga ŋamalacnêŋ
to lau nom tonecŋa, taŋ taêŋ kêka nêŋ gêŋ nomŋageŋ naŋ nêŋ.
Gêŋ taŋ gôjac tôŋ gêc naŋ, ôkêŋ êndêŋ êsêac e êpô êsêac ôkwi laŋgwageŋ.
Tauŋ sêniŋ e êtôm êsêac ma sêkêŋ ŋagêdô êndêŋ nêŋ latuŋi.

15 Mago aê oc jalic aôm laŋômanô gebe aê gagôm keso teŋ atom.
Embe matoc êpoa êtiam, naŋ jalic aôm endeŋ tôŋgeŋ e tekoc êsa laŋgwageŋ.
Dawidnê mec teŋ.

Copyright information for `JAE