Psalms 18

PESALEM 18

Dawidnê wê kêku ŋacjo tuluŋa

O Apômtau, aê têtac gêwiŋ aôm,
taŋ kôtu ŋoc ŋaclai naŋ.

Apômtau kêtu ŋoc lamuanô to kêtu ŋoc tuŋtêna ma kêtu ŋoc gêjamsawaga.
Ŋoc Anôtô kêtu ŋoc lôm, taŋ gaê lamu naŋ, eŋ kêtu ŋoc lautuc to kêtu ŋoc moasiŋ ŋabulakôp ma kêtu ŋoc lêmôp ŋajaŋa sec naŋ.
Aê aoc gêjac Apômtau ma eŋ ênam aê kêsi aŋga ŋoc ŋacjonêŋ.
Talanem Apômtau.

Gêmacanô ŋadembom gênôm aê auc
to gêŋ gebe enseŋ aêŋa kêtakê aê.
Lamboam ŋa-uc kêkic aê auc.
Gêmac ŋalakô mêŋkêtap aê sa.
Gamoa e katuc uŋ tageŋ ma aoc gêjac Apômtau.
Gamôêc gêdêŋ ŋoc Anôtô gebe ênam aê sa.
Eŋ gêŋgôŋ nê gamêŋ dabuŋ ŋalêlôm e gêŋô ŋoc môêc.
Ma gê taŋa aêŋoc taŋiboa, taŋ kataŋ gaŋgôŋ eŋ laŋônêmŋa naŋ.

Go ôjô gêjam to nom ŋawiwic kêsa to kôtêŋ- kôtêŋgeŋ ma lôc ŋam kêtênêp e kôjô-kôjôgeŋ,
gebe eŋ totêtac ŋandaŋ gêmoa.
Jadauŋ kêsa eŋ lusuawa to ja ŋawaô kêsa eŋ awasuŋ
ma ŋamôsi kêpêlaŋ aŋga ênê kêsa gêja-gêja.
Eŋ kêwê undambê sêlilip kêsêp gêmêŋ.
Ma tao majaŋ gêc eŋ akaiŋ ŋalabu.
10 Eŋ mêŋgêlôb gêŋgôŋ kerub ŋaô
to mu ŋamagê kêpuc eŋ tôŋ mêŋkelelo gêmoa.
11 Eŋ kêkwa tau auc ŋa gêsuŋbôm.
Kom ŋamajaŋ to tao tokatap-tokatap kêkôm ênê bec auc.
12 Tao kêkôm ênê ŋawasi auc,
mago kompoc to jawaô mêŋkêlêpaŋ kêsa.

13 Go Apômtau kêkêŋ nê wapap kêtaŋ aŋga undambê.
Ma Lôlôc Ŋatau kêkêŋ nê awa kompoc to jawaô kêsa.
14 Eŋ kêpê nê ŋacjo ŋa sôb e sêc sêjam gamêŋ aucgeŋ sêja.
Eŋ kêpalip ôsic e kêjanda êsêac êliŋ-êliŋ.
15 Gêgôm e gwêc ŋagêdimbob gêôc tau sa kêtu awê
ma nom ŋataoŋ kêwaka tau sa.
Gebe aôm Apômtau gôjam wambaŋ
e atêm bu gwec-gwecgeŋ.

16 Eŋ kêmêtôc lêma aŋga lôlôc mêŋkêkam aê tôŋ,
ma gê aê sa aŋga ŋasamac kapôêŋ ŋalêlôm.
17 Eŋ kêjaŋgo aê su aŋga ŋoc ŋacjo ŋaclai nê
to aŋga ŋoc gobi, taŋ nêŋ ŋaclai kêlêlêc aê su naŋ nêŋ.
18 Êsêac sebo sêsa dêdêŋ aê gêdêŋ ŋoc bêc wapacŋa,
mago Apômtau kêpuc aê tôŋ.
19 Eŋ kêkam aê sa jakakô gamêŋ kwalam.
Eŋ kêsaic aê sa kasa gaja gebe têtac gêwiŋ aêgac.

20 Apômtau kêmoasiŋ aê kêtu laŋôcnêm sawaŋa.
Eŋ gêjam aê sa kêtu lemoc selecŋa.
21 Gebe aê kasa Apômtaunê lêŋ ŋapep
ma kakac tauc su aŋga ŋoc Anôtônê ŋaucŋageŋ atom.
22 Ênê ŋagôliŋ samob geseŋ ŋoc intêna auc
ma kamasuc ênê biŋsu teŋ atom.
23 Aê kasa ŋoc lêŋ ŋapep e eŋ gêlic aê ŋajam
ma gajob tauc ŋapep gêdêŋ gêŋenseŋ aêŋa samob.
24 Amboac tonaŋ Apômtau kêmoasiŋ aê kêtu gamoa ŋaŋêŋŋa,
kêtu aê lemoc selecŋa, tec eŋ mataanô gêlic aê jagêdêŋ.

25 Aôm oc ôwa taôm sa êndêŋ ŋac ŋajam gebe aôm ŋac gabêjam.
Aôm oc ôwa taôm sa êndêŋ ŋac biŋŋanôŋa gebe aôm ŋac biŋŋanôŋa.
26 Aôm oc ôwa taôm sa êndêŋ ŋac mansaŋ gebe aôm ŋac mansaŋ,
mago ŋac keso-keso, tec oc ôtôc taôm êndêŋ eŋ e êtakê.
27 Aôm kotoc lau mateŋ jali sa ŋapep
ma kôkôniŋ lau mateŋ waô tôŋ.

28 Aôm kôtuŋ ŋoc ja kêpô gamêŋ ŋajam.
Apômtau, ŋoc Anôtô, gêgôm ŋoc ŋakesec ŋawê kêsa.
29 Biŋŋanô, aôm embe ôwiŋ aê oc jalêti laŋôc êlac ŋoc ŋacjogeŋ jana.
Ŋoc Anôtô embe êwiŋ aê oc jamboaŋ jaŋgêli (ŋoc ŋacjonêŋ) tuŋbôm.

30 Anôtô tonaŋ tec gêjam gôliŋ gêŋ samob tomalageŋ.
Apômtaunê biŋ ŋakêŋkêŋ. Eŋ kêtu lau samob, taŋ sê lamu eŋ naŋ, nêŋ lautuc.
31 Gebe anôtô teŋ oc êmoa ondoc, Apômtau eŋ taugeŋgoc.
Ma lamuanô tau teŋ oc êmoa ondoc, aêacnêŋ Anôtô taugeŋgoc.
32 Anôtô tau tonaŋ tec kêjandiŋ aê tôŋ ŋa ŋaclai
to gêjam ŋoc intêna gebe ockaiŋ êndiŋ gêŋ teŋ atom.
33 Ŋac tonaŋ kêkêŋ aê kasêlêŋ ŋagaô katôm isom.
Eŋ ketoc aê kakô ŋoc lôc ŋamoatêc ŋaôgeŋ.
34 Eŋ kêdôŋ lemoc siŋŋa,
tec lemoc jakêka talam ŋamadi ŋajaŋa.

35 Aôm gôsuŋ nêm lautuc êpiŋ aê aucŋa to nêm anôŋa kêpuc aê tôŋ.
Aômnêm moasiŋ ketoc aê sa.
36 Aê kasêlêŋ e aôm kômasaŋ ockaiŋ ŋamala ŋapep
gebe japô ocgêsu ôkwi atom.
37 Aê kajanda ŋoc ŋacjo e gaê êsêac tôŋ
ma paŋpaŋ jagaseŋ êsêac popoc.
38 Aê kamakiŋ êsêac e têtu motam su ma dêdi sa kêtiam atom.
Êsêac sêc ockaiŋ ŋalabu.
39 Aôm kôjandiŋ aê ŋa ŋaclai gebe janac siŋ ŋanô biŋŋanôgoc.
Aôm kôkôniŋ ŋoc ŋacjo tôŋ e ockaiŋ kaka êsêac tôŋ.
40 Aôm kôkêŋ aêŋoc ŋacjo sêc aê sêja.
Aê gaseŋ êsêac samob, taŋ sêkêŋ kisa gêdêŋ aê naŋ su.
41 Êsêac sêmôêc, mago nêŋ ŋac-ênam-êsêac-sawaga teŋ gêmoa atom.
Sêmôêc gêdêŋ Apômtau, mago eŋ kêkêŋ taŋa êsêac atom.
42 Aê kadaba êsêac sa kêtôm mu kelelo kekop.
Aê kakip êsêac sa kêtôm sêpiŋ bôc-kêpêc sa aŋga malacluŋ ma sêbaliŋ siŋ.

43 Aôm gôjam aê sa aŋga siŋ tomôkê-tomôkê e kôkêŋ aê katu lau samuc nêŋ gôliŋwaga.
Lau taŋ sêjam kauc aê naŋ, tec sêjam sakiŋ aê sêmoa.
44 Lau jaba sêŋô aê ŋawaegeŋ ma taŋeŋ wamu êndêŋ aê.
Êsêac latuŋi tetoc aê sa.
45 Lau jaba latuŋi katuŋ gêjaŋa
ma sêsuŋ tauŋ tênêp-tênêpgeŋ sêsa aŋga nêŋ tuŋlêlôm sêmêŋ.

46 Apômtau gêmoa mata jali. Aoc êôc ŋoc lamu.
Aê jatoc ŋoc ŋacmoasiŋ Anôtô sa.
47 Anôtô tau tec kêpuc aê tôŋ e kakac ŋoc kamocgôc.
Eŋ kêkôniŋ malac-malac tôŋ sêsô ŋoc gôliŋ ŋalabu.
48 Ŋac tonaŋ tec gêjam aê kêsi aŋga ŋoc ŋacjo, taŋ ŋaclai sec naŋ, nêŋ to kêpuc aê sa jakatu ŋoc gobi nêŋ ŋatau.
Ŋac tonaŋ tec gêjam aê kêsi aŋga ŋaclai sec nê.

49 O Apômtau, amboac tonaŋ jalambiŋ aôm aŋga lau samuc ŋalêlôm
ma jaŋga wê êpi aômnêm ŋaê.

50 Aôm tonaŋ tec kotoc nêm kiŋ sa ŋanô ma kôtôc nêm têmtac gêwiŋ teŋgeŋŋa gêdêŋ nêm ŋac goeŋ oso eŋŋa
gêdêŋ aê Dawid to ŋoc gôlôac gedeŋ tôŋgeŋ.
Apômtaunê sakiŋwaga Dawid kêsôm biŋ tonec gêdêŋ Apômtau gêjam eŋ kêsi aŋga Saul lêma ma ênê ŋacjo ŋagêdô nêŋ.

Copyright information for `JAE