Psalms 2

PESALEM 2

Anôtô agêc ŋac, taŋ geŋ oso eŋ naŋ

Lau samuc sêli aweŋ sa kêtu asageŋŋa,
ma tenteŋlatui sêkic biŋ ŋaôma-ŋaôma nec ŋam amboac ondoc.
Kiŋ nomŋa sêkac tauŋ sa,
ma gôliŋwaga sêkic biŋ sêwiŋ tauŋ sebe senseŋ Anôtô agêc nê ŋac, taŋ geŋ oso eŋ naŋ.
Êsêac sêsôm gebe “Tamô êsêacnêŋ lakô êŋgic
ma tambaliŋ êsêacnêŋ lêpoa, taŋ kêgi aêac auc, naŋ siŋ.”

Apômtau, taŋ gêŋgôŋ lêpôŋ aŋga undambê naŋ, kaômac
ma kêsu êsêac susu.
Go kêsôm biŋ gêdêŋ êsêac totêtac ŋandaŋgeŋ
ma eŋ têtac kêmoatiŋ tôŋ kêtakê êsêac gebe
“Aê tauc kakêŋ ŋoc kiŋ gêŋgôŋ ŋoc lôc dabuŋ Sion.”

“Aê gabe jasôm biŋ, taŋ Apômtau taê gêjam naŋ, lasê acgom.
Eŋ kêsôm gêdêŋ aê gebe ‘Aêŋoc latuc aôm, ocsalô tonec aê katu aôm tamam.
Oteŋ aê, go jakêŋ lau samuc têtu nêm gêŋlênsêm
ma jakêŋ nom samucgeŋ êtu nêm gamêŋ.
Aôm oc ônam gôliŋ êsêac ŋa tôcki
to olo êsêac êtôm selo kunom.’”

10 Amboac tonaŋ amac kiŋ nêm kauc êsamaŋ
ma amac nom ŋagôliŋwaga taêm ênam biŋ, taŋ galêŋ biŋ amac naŋ.
11 Anam sakiŋ Apômtau toatêc eŋgeŋ,
au taôm anêc eŋ akaiŋŋa toatênêpgeŋ.
12 Embe masi, oc têtac ŋandaŋ êsa
ma amac anaŋa aŋga intêna,
gebe eŋ ŋac têtac dambê.
Aweŋ êôc lau samob, taŋ sê lamu eŋgeŋ naŋ.
Copyright information for `JAE