Psalms 27

PESALEM 27

Apômtau kêtu ŋoc Ja to ŋoc moasiŋ

Apômtau kêtu ŋoc ja to ŋoc moasiŋ, amboac tonaŋ oc jatêc asa.
Apômtau kêtu katucnê lamu, amboac tonaŋ oc jaê go asa.

Lau sec embe sênac aê gebe senseŋ aê su,
go êsêac, taŋ têtu ŋoc soŋo-soŋo to ŋoc ŋacjo naŋ, sêka selelec e sêu tauŋ.
Siŋwaga taêsam embe sêŋgi aê auc, oc ŋoc ŋalêlôm ŋatutuc atom.
Ma êsêac embe sênac siŋ êndêŋ aê, oc têtac êpa sugeŋ.

Aê kateŋ gêŋ tageŋ gêdêŋ Apômtau ma ŋoc ŋalêlôm kêkac aê biŋ tageŋ tonecŋa
gebe jaŋgôŋ Apômtaunê andu êtôm ŋoc bêc jamoa matoc jaliŋa samob
gebe jalic Apômtaunê ŋajam
ma jateŋ eŋ gebe êwê aê.
Gebe êndêŋ bêc ŋawapacŋa eŋ oc êsiŋ aê jaŋgôŋ ênê bec ŋalêlôm.
Ênê bec ŋagadê oc ênsaŋ aê auc. Eŋ êsuŋ aê sa najaka poc ŋajaŋa tôŋ.
Amboac tonaŋ tecbeloc aŋgeŋ êndêŋ ŋoc ŋacjo, taŋ sêgi aê auc naŋ.
Aê gabe jakêŋ da aŋga ênê bec ma jakêŋ toôndugeŋ. Aê jaŋga wê ma janam êndêŋ Apômtau.

O Apômtau, ôkêŋ taŋam aê gebe aoc gêjac aôm kapôêŋ.
Taêm walô aê ma ôkêŋ taŋam aêmaŋ.
Aôm kôsôm gebe “Ansom aê.”
“O Apômtau, amboac tonaŋ tec gabe jansom aôm.”
Ôsiŋ laŋôm aê atom ma ôtiŋ nêm sakiŋwaga su totêmtac ŋandaŋŋa atom.
O ŋoc kêsiwaga Anôtô, aôm kôtu ŋoc gêjam-sa amboac tonaŋ ôtiŋ aê su to ônac kapoac aê atom.
10 Tinoc agêc tamoc sêwi aê siŋ su,
mago Apômtau oc êkôc aê sa.

11 O Apômtau, ôtôc nêm intêna êndêŋ aê ma ôwê aê jasa gamêŋ tapa ŋajam.
Ôŋgôm êtu ŋoc ŋacjoŋa.
12 Ôwi aê siŋ jandêŋ biŋ, taŋ ŋoc ŋacjo sêkic naŋ atom.
Gebe biŋ-gêgawaga dêdi sebe sênac aê ma sêjac tênêp gebe senseŋ aê su.

13 Aê kakêŋ gêwiŋ
gebe jalic Apômtaunê ŋajam aŋga gamêŋ sêŋgôŋ mateŋ jaliŋa.
14 Ôkêŋ matam Apômtau totêmtac êpa sugeŋ ma tonêm ŋalêlôm samucgeŋ.
Ôkêŋ matam Apômtaugeŋ.
Dawid gêga.

Copyright information for `JAE