Psalms 28

PESALEM 28

Mec Apômtau ênam aêac saŋa

O Apômtau, aê aoc gêjac aôm gebe ŋoc lamu aôm.
Laŋôm elo ma ônam taôm tôŋ aê atom,
gebe aôm embe ênam taôm tôŋ aê,
aê oc jatôm lau, taŋ sêsêp sê sêja e laŋôŋmê naŋ.
Embe jamôêc êndêŋ aôm ma jaôc lemoc sa êndêŋ nêm lôm ŋagamêŋ dabuŋsêga,
naŋ ôkêŋ taŋam ŋoc taŋiboa.
Ôtiŋ aê su jawiŋ lau, taŋ sêkac tauŋ su aŋga Anôtônê naŋ, to lau alôb-alôbwaga atom.
Gebe lau tonaŋ nêŋ ŋalêlôm keso ma sêbanac biŋ gêdêŋ nêŋ lau jabaŋ êsêacŋa.

Ôkêŋ ŋagêjô êndêŋ êsêac êtôm nêŋ gêŋ, taŋ sêgôm to sêjac lau mateŋanô aucŋa naŋ.
Ôkêŋ ŋagêjô êndêŋ êsêac êtôm gêŋ, taŋ lemeŋ sêgôm naŋ, ôkêŋ gêŋ tau ŋagêjô êndêŋ êsêac.
Gebe êsêac mateŋ gêdiŋ Apômtaunê gôliŋ to gêŋ, taŋ lêma gêgôm naŋ atom.
Amboac tonaŋ oc enseŋ êsêac su e ênam êsêac sa êtiam atom.
Aoc êôc Apômtau
gebe eŋ kêkêŋ taŋa ŋoc taŋiboa kapôêŋ.
Apômtau kêtu ŋoc ŋaclai to ŋoc lautuc.
Ŋoc ŋalêlôm kêsap eŋgeŋ, tec gêjam aê sa.
Amboac tonaŋ ŋoc ŋalêlôm gegeŋ aê sa samucgeŋ
gebe jaŋga wê daŋgeŋa êpi eŋ.

Apômtau kêtu nê lau nêŋ ŋaclai
to kêtu nê ŋac, taŋ seŋ oso eŋ naŋ, nê lautuc.
Ônam nêm lau sa to ônam mec nêm gêŋlênsêmmaŋ
ma ojop to ôsip aêac sa endeŋ tôŋgeŋ.
Dawidnê teŋ.

Copyright information for `JAE