Psalms 33

PESALEM 33

Lambiŋ êndêŋ Anôtô, taŋ kêkêŋ to gejob gêŋ samob naŋ

O lau gêdêŋac, atu samuc Apômtau toôndugeŋ.
Lambiŋ gajac lau mansaŋ ŋawae.
Anam daŋge Apômtau ŋa gêŋ wêŋa.
Aôc eŋ sa ŋa gêŋ wêŋa, taŋ ŋagam lemeŋlu naŋ.
Aŋga wê wakuc teŋ epi eŋ.
Ansaic ŋagam êtaŋ toaligeŋ.

Gebe Apômtaunê biŋ biŋŋanô.
Ma gêgôm nê gêŋ samob ŋaŋêŋgosu.
Eŋ têtac gêwiŋ biŋ gêdêŋ to biŋ ŋaŋêŋ.
Apômtaunê têtac gêwiŋ teŋgeŋŋa gêjam nom samuc auc.

Undambê ŋanô kêsa ŋa Apômtaunê biŋ.
Ma ŋagêlôŋ samob tonaŋ ŋanô kêsa ŋa ênê awajaô.
Eŋ gêjac gwêc sa kêpi tageŋ amboac kêsêp bulakôp.
Eŋ kêkêŋ gwec ŋagêdimbob kêpoac ŋalapsamboam.

Nom samuc têtêc Apômtau
ma ŋamalac samob, taŋ sêŋgôŋ nom naŋ, sêuc labu eŋgeŋ.
Gebe eŋ kêsôm ma gêŋ ŋanô kêsa.
Eŋ kêjatu ma gêŋ tau jakêkô.
10 Apômtau geseŋ tenteŋlatunêŋ poac e ŋanô masi.
Eŋ kêkô biŋ, taŋ lau samuc sêmasaŋ naŋ auc.
11 Apômtaunê poac ênêc endeŋ tôŋgeŋ.
Biŋ taŋ eŋ kêmasaŋ gêc nê ŋalêlôm naŋ, oc elom gôlôac to gôlôac.
12 Aweŋ êôc lau, taŋ Apômtau kêtu nêŋ Apômtau naŋ,
lau tau, taŋ eŋ kêjaliŋ sa gebe têtu ênê gêŋlênsêm naŋ.

13 Apômtau kêtuc kêniŋ aŋga undambê kêsêp gêmêŋ.
Eŋ mataanô kêpi ŋamalacnêŋ latuŋi samob.
14 Ŋac tau gêŋgôŋ nê lêpôŋ ma mata gêdiŋ ŋamalac samob,
taŋ sêŋgôŋ nom naŋ.
15 Ŋac tau tonaŋ tec kêmasaŋ samob nêŋ ŋalêlôm.
Ŋac tau tonaŋ tec mata gêdiŋ gêŋ samob, taŋ êsêac sêgôm naŋ.

16 Siŋwaga taêsam ŋasec, mago oc sênam nêŋ kiŋ sa atom.
Ma siŋsêlêc ŋaclai oc êku ŋacjo tulu atom.
17 Teŋ embe taê êka nê hos siŋŋa gebe êku ŋacjo tulu, oc ênsau tau,
gebe nê hosnê ŋaclai tau oc ênam eŋ sa atom.

18 Alic acgom, Apômtau mata gê êsêac, taŋ têtêc eŋ naŋ,
to êsêac, taŋ sêkêŋ mateŋ ênê têtac gêwiŋ teŋgeŋŋa naŋ,
19 gebe ênam êsêac katuŋ sa êtu sêmac êndu atomŋa
to êôc êsêac, taŋ sêmoa mateŋ jali naŋ, tôŋ êndêŋ noc tôbômŋa.

20 Aêacnêŋ katuŋ kêtu gwasaê Apômtau,
aêanêŋ gêjam-sawaga to aêacnêŋ lautuc eŋ.
21 Biŋŋanô, aêacnêŋ ŋalêlôm kêtu samuc eŋgeŋ,
gebe aêac takêŋ gêwiŋ ênê ŋaê dabuŋ.

22 O Apômtau, aômnêm têmtac gêwiŋ teŋgeŋŋa mêŋêpi aêac
êtôm aêac, tec akêŋ mateŋ aôm nec.
Copyright information for `JAE