Psalms 40

PESALEM 40

Wê lambiŋŋa

(Pes 70:1-5)

Aê gaôŋ Apômtau to gajam aoc su eŋ,
ma eŋ gewec mêŋkêkêŋ taŋa ŋoc taŋi.
Eŋ gê aê sa aŋga gêsuŋ ŋakêlêndiŋ
to aŋga lemoŋ ŋagôlub-gôlub.
Eŋ kêkêŋ ockaiŋ kaka poc tôŋ
ma kêpuc ockaiŋ tôŋ kasêlêŋ ŋajaŋa.
Eŋ kêkêŋ wê wakuc kêsêp aocsuŋ.
Kêdôŋ wê lambiŋŋa teŋ kêpi aêacnêŋ Anôtô.
Lau taêsam sêlic e selendec
e mateŋ êsap Apômtaugeŋ.

Aoc êôc ŋac, taŋ mata kêsap Apômtau naŋ,
ma gêmoa gêwiŋ teŋbeleŋ aŋgeŋwaga atom to kêsa dansaŋtêna nêŋ lêŋ atom.
O ma Apômtau Anôtô, aôm gôgôm gêŋtalô taêsam kêtu aêacŋa.
Ŋac teŋ kêtôm aôm gêmoa atom.
Aôm taêm gêjam lêŋ moasiŋŋa taêsam amboac tonaŋ.
Aê embe jawa sa to jasa sa, oc jatôm atom gebe taêsam ŋanô lasê.

Da sêbucŋa to da keleŋ gêjac aôm matamanô ŋajam atom, mago kômasaŋ taŋocsuŋ gobe jaŋô biŋ.
Aôm koteŋ daja to da wama atom.
Amboac tonaŋ jasôm gebe “Ôlic acgom, oc jawac
sêwa aêŋoc biŋ sa gêc biŋsu ŋabuku.
O ŋoc Anôtô, aê jaŋgôm aômnêm biŋ êtu tôŋ janac ŋawae.
Nêm biŋsu gêc ŋoc ŋalêlôm.”

Aê kasôm aôm gôjam aêac sa ŋawae lasê aŋga lau taêsam sêkac tauŋ sa ŋalêlôm.
O Apômtau, aôm taôm gôlicgac gebe aê kagamiŋ gêdôcôlic atom.
10 Aê gasaŋ nêm biŋ gôjam lau kêsiŋa ŋawae auc gêc ŋoc ŋalêlôm atom.
Kasôm lasêgeŋ gebe aôm ŋac ŋaŋêŋ to gôjam lau sa.

11 O Apômtau, amboac tonaŋ ôŋgamiŋ taêm walô êndêŋ aêma atom.
Nêm têmtac gêwiŋ teŋgeŋŋa to biŋ ŋaŋêŋ oc êkwa aê auc ŋapaŋ.

Mec ênam saŋa

12 Gêŋwapac ŋalêlêma atom kêgi aê auc.
Ŋac sec kêtap aê sa gêjam aucgeŋ.
Taêsam ŋasec kêlêlêc môkêclauŋ môkêcapacŋa su,
tec gajac kapoac tauc gacgeŋ gamoa.
13 O Apômtau, ôlic ŋajam ma ônam aê sa.
O Apômtau, ônsaic taômgeŋ mêŋôpuc aê tôŋ.
14 Êsêac taŋ dêdib aê sebe senseŋ aê su naŋ, ôkêŋ êsêac samob majeŋ to teŋbeleŋ ŋawapac êsa.
Ôkêŋ êsêac, taŋ sêkêŋ mateŋgeŋ sebe aê jatu sec naŋ, sêc tomajeŋgeŋ sêmu sêna.
15 Êsêac taŋ sêgôm Kec, kec kêpi aê naŋ,
ôkêŋ êsêac têtakê tomajeŋgeŋ.

16 Ôkêŋ êsêac samob, taŋ sesom aôm naŋ,
ôliŋ êpi to têntac ŋajam êsa êtu aômŋa.
Ôkêŋ êsêac samob, taŋ taêŋ kêka aômnêm moasiŋ naŋ,
sêsôm lasê endeŋ tôŋgeŋ gebe Apômtau ŋac towae.

17 O Apômtau, aê tec ŋac palê-palê to ŋac ŋalêlôm sawa jamoa naeo, mago aôm taêm gêjam aê.
O ŋoc Anôtô, ônam gamêŋ tôŋ atom gebe ŋoc ônam-aê- sa to ôpuc-aê-tôŋwaga aômgoc.
Dawidnê pesalem teŋ.


Copyright information for `JAE