Psalms 63

PESALEM 63

Tanam aweŋ su Anôtô

O Anôtô, aôm kôtu ŋoc Anôtô, aê gasom aôm.
Katuc gêjam awa su aôm.
Ôlic kêtu sawa aômŋa
amboac gamêŋ ŋakeleŋ, taŋ bu masi samucgeŋ ma kêtu sawa bu naŋ.
Aê gabe matoc ê aôm aŋga nêm gamêŋ dabuŋ
ma jalic nêm ŋaclai to ŋawasi.
Gebe aôm têmtac gêwiŋ teŋgeŋŋa ŋajam kêlêlêc jaŋgôŋ matoc jaliŋa su,
tec aoc êôc aôm.
Amboac tonaŋ aê jalambiŋ aôm êtôm ŋoc bec jaŋgôŋ matoc jaliŋa samob
ma jaôc lemoc sa to aoc ênac nêm ŋaê.
Ŋoc katuc kêtap moasiŋ sa e gêôc eŋ tôŋ
ma aoc gêôc aôm toôndugeŋ.

Êndêŋ taŋ jasa tauc sic najanêc ŋoc mê naŋ, jasa aôm laŋôm sa
ma taêc ênam aôm êndêŋ êmbêc samuc.
Gebe aôm gôjam aê sagac,
tec gajam wê totêtac ŋajam samucgeŋ gaŋgôŋ aôm magêm labu.
Aêŋoc katuc kêsap aôm tôŋ ŋajaŋa.
Lêmam anôŋa kêkam aê sa kakô ŋaŋêŋ.

Ma êsêac, taŋ têtu kêka-kêka sebe senseŋ aê su naŋ,
oc sênaŋa sêsêp nom ŋakêlêndiŋ sec sêna.
10 Siŋ enseŋ êsêac su
ma têtu kêam sec saleŋŋa nêŋ gwada.
11 Mago kiŋ oc têtac ŋajam Anôtôŋa. Êsêac samob, taŋ têtôc lemeŋ
kêpi eŋ naŋ, oc têtu samuc gebe eŋ oc êmbôc dansaŋtênanêŋ aweŋsuŋ auc.
Dawidnê pesalem gêga gêdêŋ taŋ gêmoa gamêŋ sawa
Judaŋa naŋ.

Copyright information for `JAE