Psalms 73

BUKU KÊTU TÊLÊACŊA

PESALEM 73

Anôtô kêmêtôc biŋ jagêdêŋgeŋ

Biŋŋanô, Anôtô kêmoasiŋ lau mansaŋ
to kêmoasiŋ êsêac, taŋ nêŋ ŋalêlôm ŋawa naŋ, amboac tonaŋ.
Mago aê kadabiŋ gebe japô ockaiŋ ôkwi
ma kadabiŋ gebe jaka bêlip tageŋ
gebe matoc katu lanemtêna kêtu sêmoa ŋajam-ŋajamŋa
ma galic lau alôb-alôb têtu lau tolêlôm.

Lau tonaŋ ŋai sêjam kauc ŋandaŋ
ma sêmoa ôliŋ ŋajam to ôliŋ samuc.
Êsêac sêôc gêŋwapac têtôm lau ŋagêdô atom.
Ma sêlic ŋandaŋ teŋ têtôm lau ŋagêdô atom.
Amboac tonaŋ tec tetoc tauŋ sa kêtu nêŋ gêlôŋ, taŋ sênôŋ naŋ,
ma ŋaclai kêkwa êsêac auc amboac nêŋ ŋakwê.
Êsêac tonaŋ têtôp e mateŋanô kololoc gêja
ma sêsêwa biŋ meloc, taŋ taêŋ gêjam gêc nêŋ ŋalêlôm naŋ, kêsa awê.
Êsêac sêsu biŋ susu tonêŋ ŋalêlôm ŋamalic.
Êsêac tetoc tauŋ sa ma sêpô biŋ kêpi laugeŋ.
Aweŋsuŋ kêsôm biŋ geseŋ undambê
ma imbeleŋ kêsôm biŋ gêjac laoc nomgeŋ.

10 Amboac tonaŋ tec lau dêdêŋ êsêac
ma sêlib êsêacnêŋ biŋ kêtôm sêlib bu.
11 Êsêac sêsôm gebe “Anôtô oc êjala biŋ amboac ondoc
ma Lôlôc Ŋatau oc êŋô biŋ ŋam amboac ondocgeŋ.”
12 Alic acgom, lau alôb-alôb nêŋ biŋ amboac tonaŋ
sêmoa ŋajam gedeŋ tôŋgeŋ sêjac nêŋ awa sa-sa.
13 Ojae, kamasaŋ ŋoc ŋalêlôm e ŋatipsawa ŋaômagoc
ma kakwasiŋ lemoc e gawê geo teŋ ŋakaiŋ atom.
14 Mago gêŋwapac gêgôm aê kêtôm bêcgeŋ
ma gêŋ kêlêsu aê kêtôm ŋageleŋ samob.

15 Aê embe taêc ênam gebe aê jasôm biŋ amboac tonaŋ jawiŋ
oc jansau nêm launêŋ gôlôac.
16 Amboac tonaŋ katu kêka-kêka gebe jajala ŋam elêmê,
mago galic gebe ŋawapac.
17 E kasô Anôtônê gamêŋ dabuŋ gaja,
go ŋoc kauc kêsa kêpi lau alôb-alôb nêŋ lêŋtêpôê.

18 Biŋŋanô, aôm kotoc êsêac sêkô gamêŋ ŋalêŋô,
go gôgôm êsêac sêu tauŋ e popoc-popocgeŋ sêjaŋa.
19 Seseŋ êsêac su weŋ tageŋ,
sêjaŋa tonêŋ ŋalêlôm ŋatutucgeŋ.
20 Êsêac têtôm aêac taêc bêc e taêc mê.
Mateŋ gêlac ma talic gêŋ ŋakatu tau malamê.

21 Gêdêŋ taŋ ŋoc ŋalêlôm ŋamakic kêsa
e kêtuŋ aê masi naŋ,
22 aê katu meloc e ŋoc kauc gêjaŋa,
katôm bôc gamoa aôm laŋômnêmŋa.
23 Mago kasap aôm tôŋ gedeŋ tôŋgeŋ.
Aôm kôkam aê tôŋ gêdêŋ lemoc anôŋa.
24 Aôm gôwê aê kêtôm, taŋ taêm gêjam naŋ,
ma êtu ŋamu aôm oc ôkôc aê sa toŋawasigeŋ.
25 Aêŋoc asa teŋ gêmoa undambê
ma ŋoc asageŋ gêc nom gebe japô lêna. Aôm taômgeŋgoc.
26 Ôlic to katuc oc êtu palê,
mago Anôtô kêtu ŋoc gêŋlênsêm teŋgeŋ ma teŋgeŋ.

27 Biŋŋanôgoc, êsêac taŋ sêmoa jaêc aôm naŋ sênaŋa.
Aôm goseŋ lau samob, taŋ sêkac tauŋ su aŋga aômnêm naŋ su.

28 Mago aêgoc tec galic ŋajam gebe jamoa Anôtô ŋagalageŋ.
Aê gaê lamu Apômtau Anôtô gebe jasôm aômnêm gêŋ samob, taŋ gôgôm naŋ lasê.
Asapnê.


Copyright information for `JAE