Psalms 74

PESALEM 74

Têtaŋ nêŋ lôm, dabuŋ kêtu ŋacjo seseŋ suŋa

O Anôtô, amboac ondoc kôtiŋ aêac su ŋanôgeŋ.
Ma têmtac ŋandaŋ sec gêdêŋ gêŋ, taŋ gojob naŋ.
Taêm ênam nêm gôlôac, taŋ gêmuŋgeŋ kôjaliŋ ma kôwaka êsêac sa têtu taôm nêm lau naŋ.
Taêm ênam lôc Sion, taŋ gôŋgôŋ kêtu nêm malac naŋ.
Ôsêlêŋ opeŋ gamêŋ popoc tau, taŋ gacgeŋ gêc-gêc naŋ.
Ojae, gêŋ samob, taŋ kêkô gamêŋ dabuŋ ŋalêlôm naŋ, ŋacjo seseŋ sugoc.

Nêm ŋacjo sêjam wambaŋ ŋamelocŋageŋ aŋga nêm gamêŋ, taŋ lau sêkac tauŋ sa sêmoa naŋ.
Êsêac sêguŋ nêŋ bam kêkô gebe gamêŋ tonaŋ kêtu êsêacnêŋ.
Êsêac têtôm kômwaga saleŋŋa,
taŋ sêsap ka tulu ŋa nêŋ ki naŋ.
Êsêac sêga katapa toŋatalô popoc
ŋa nêŋ ki to hama kapôêŋ.
Êsêac sêkêc nêm gamêŋ dabuŋ ja geŋ su
ma seseŋ nêm ŋaê ŋaandu ŋadabuŋ su e gêjaŋa samucgeŋ.
Êsêac taêŋ gêjam gêc tauŋgeŋ gebe “Aêac danseŋ êsêac su e tomalageŋ.”
Ma sêkêc Anôtônê sakiŋ dabuŋ ŋamala samob, taŋ kêkô-kêkô naŋ, ja geŋ su.

Aêacma gêbôm dabuŋ samob maleŋmê.
Propete teŋ gêmoa kêtiam atom, ma aêac samob ajam kauc ŋanoc gêŋ tonaŋ oc êmbacnê êndêŋ ondoc.
10 O Anôtô, kalomtêna oc sêsôm nêŋ biŋ susu e êndêŋ ondocgeŋ.
Ŋacjo oc sêŋgôm aômnêm ŋaê oc êtu meloc endeŋ tôŋgeŋ me.
11 Amboac ondoc kôtaiŋ lêmam su.
Amboac ondoc kôkapiŋ lêmam tôŋ.

12 Mago Anôtô kêtu aêŋoc kiŋ gêdêŋ andaŋgeŋ tauanô.
Eŋ gêjam ŋamalac sa kêtôm nom ŋagamêŋgeŋ.
13 Aôm gôwa gwêc kakôc ŋa nêm ŋaclai kapôêŋ
ma golo secsêga gwêcŋa môkêapac popoc.
14 Aôm gôga bôcsêga Lewiatan môkêapac kêkôc
ma kôkêŋ eŋ ôli kêtu bôc gamêŋ sawa nêŋ.
15 Aôm kôkêŋ bumata kêpulu to keseleŋ.
Aôm gôwa bu kapôêŋ-kapôêŋ gêŋgic-gêŋgic e ŋakeleŋ kêsa samucgeŋ.
16 Aôm kôtu geleŋŋa ŋatau. Aôm kôtu gêbêcauc ŋatau.
Aôm tec kotoc ajôŋ to oc sêkô maleŋ.
17 Aôm gôjac lôcawa nom e gêdêŋ ŋamadiŋ.
Aôm kôkêŋ oc kêsa to komôgoc.

18 O Apômtau, taêm ênam gebe nêm ŋacjo sêômac aôm.
Êsêac sêkac tauŋ su aŋga aômnêm ma sêgôm nêm ŋaê kêtu gêŋ meloc.
19 Ôwi nêm balôsinê katu siŋ êndêŋ kikic atom.
Ôliŋ aômnêm lau ŋasec nêŋ katuŋ siŋ samucgeŋ atom.
20 Matam êndiŋ nêm poac, taŋ kômoatiŋ gawiŋ aêac naŋ,
gebe ŋaclai sec gêjam gamêŋ ŋakesec nomŋa samob auc.
21 Ôkêŋ ŋac, taŋ gêôc gêŋwapac naŋ, maja êsa atom.
Lau ŋalêlôm sawa to lau ŋasec aweŋ êôc nêm ŋaêmaŋ.

22 O Anôtô, ôndi sa ma ônam nêm gêŋ kêsimaŋ.
Taêm ênam biŋ meloc, taŋ lau alôb-alôbwaga sêgôliŋ kêpi aôm kêtôm bêc to geleŋgeŋ.

23 Oliŋ nêm ŋacjo nêŋ ŋaonda siŋ atom.
Nêm soŋo-soŋo nêŋ wambaŋ, taŋ kêpi gedeŋ tôŋgeŋ naŋ, amboac tonaŋ.
Asapnê teŋ.


Copyright information for `JAE