Psalms 75

PESALEM 75

Anôtô kêmêtôc ŋamalacnêŋ biŋ jagêdêŋ

O Anôtô, aêac aweŋ gêôc aôm. O Anôtô, aêac alanem aôm.
Aêac asôm aôm waem lasê ma awa gêŋtalô samob, taŋ aôm gôgôm naŋ sa.

Anôtô kêsôm gebe “Aê kakêŋ ŋoc noc mêtôcŋa
ma oc jamêtôc biŋ naêndêŋgeŋ.
Embe nom êkôtiŋ tau ma ŋamalac samob, taŋ sêŋgôŋ nom naŋ têtênêp,
go aê jandeŋ nom ŋanombaŋ tôŋ.
Aê aoc ênac tetoc tauŋ sawaga gebe ‘Atoc taôm-sa atom.’
Ma êndêŋ lau alôb-alôbwaga gebe ‘Asa môkêmapac sa amboac secgeŋmaŋ.
Asa môkêmapac sa ŋanôgeŋ
amboac tonaŋ atom. Amêtôc gêsômtêkwa êtu baliŋ alanem taômgeŋ atom.’”

Mêtôcwaga oc mêŋêsa aŋga oc kêpiŋa ma aŋga oc kêsêpŋa atom
ma êmêŋ aŋga gamêŋ gêmu kêpi to gêmu kêsêpŋa atom amboac tonaŋgeŋ.
Anôtô oc êmêtôc biŋ êmoa.
Eŋ oc êkôniŋ lau teŋ tôŋ me etoc lau teŋ sa.
Apômtau lêma kêkam laclu teŋ,
taŋ ênê têtac ŋandaŋ ŋawain ŋajaŋa kêpoac naŋ.
Eŋ kêkêc kêsêp laclu
ma lau alôb-alôb sêlib ŋatetep samob gêwiŋ.
Ma aê oc ôlic api toôndugeŋ ŋapaŋ
gabe aoc aôc Jakobnê Anôtô.
10 Eŋ asap lau sec samob, taŋ sêkac tauŋ su aŋga Anôtônê naŋ, naŋ ŋaclai tulu.
Eŋ êkiaŋ lau gêdêŋ nêŋ ŋaclai sa êtu kapôêŋ.
Asapnê wê teŋ.


Copyright information for `JAE