Psalms 77

PESALEM 77

Gêŋwapac embe êŋgôm aêac, naŋ Anôtô taê walô aêac

Aê gamôêc gêdêŋ Anôtô ŋa aoc kapôêŋ. Biŋŋanô aê gabe jamôêc.
Gamôêc kapôêŋ gêdêŋ Anôtô gebe eŋ êkêŋ taŋa aê.
Gêdêŋ taŋ gêŋwapac gêgôm aê naŋ, aê kateŋ mec gêdêŋ Apômtau,
mago gêŋ teŋ gêjam malô aê atom.
Aê embe taêc ênam Anôtô, oc janiŋ oliŋ tauc.
Embe taêc ênam biŋ ŋam, oc ŋoc kauc ensom mala ôkwi.
Eŋ kêkêŋ aê gajam jali gêbêcauc samuc.
ŋoc ŋalêlôm ŋatutuc e kasôm biŋ jageo.
Aê taêc gêjam kêsêp bêc gêmuŋgeŋŋa
ma jala, taŋ gêjaŋa wanêcgeŋ su naŋ, amboac tonaŋ.
Kêtôm gêbêcgeŋ aê taêc gêjam biŋ jakêsa-jakêsa.
Aê taêc gêjam biŋ gêc ŋoc ŋalêlôm ma kakip sa e ganac matoc gebe
“Apômtau oc êtiŋ aêac su samucgeŋ
ma êmoasiŋ aêac êtiam atomanô me masi.
Ênê têtac gêwiŋ teŋgeŋŋa gêbacnê me.
Ma biŋ, taŋ eŋ gêjac mata naŋ, gêjac pep su me.
Anôtô oc kêliŋ êmoasiŋ lauŋa siŋ me.
Ênê têtac ŋandaŋ gêbôc nê taê walô auc me.”
10 Tec kasôm gêdêŋ tauc gebe “Aêŋoc ŋalêlôm ŋawapac ŋanô
gebe Apômtau gêjam nê gôliŋ ôkwi.”
11 Aê gabe taêc ênam gêŋ, taŋ Apômtau gêgôm naŋ.
Biŋŋanô, gabe taêc ênam nêm gêŋtalô, taŋ gôgôm gêdêŋ andaŋgeŋ naŋ.
12 Jakip gêŋ samob, taŋ aôm gôgôm naŋ, ŋam sa
ma jasala aômnêm gêŋsêga samob.

13 O Anôtô, nêm intêna dabuŋ.
Lau samuc nêŋ anôtô ondoc kapôêŋ kêtôm aôm.
14 Aôm taômgeŋ Anôtô, taŋ gôgôm gêŋsêga naŋ.
Aôm kôwaka nêm ŋaclai sa gêdêŋ tenteŋlatu sêlic.
15 Lêmam ŋajaŋa gôjam nêm lau,
Jakob agêc Josep latuŋi kêsi.

16 O Anôtô, gêdêŋ taŋ bu gêlic aôm naŋ, kêtêc aôm.
Ma gwêc ŋagêdim kêtênêp lasê.
17 Tao sêsêwa kom ŋasec to umboŋ ŋatêtac kêkêŋ wapap gêjac.
Ma aômnêm sôbôsic geŋ gamêŋ gêŋgic-gêŋgic.
18 Aômnêm wapap ŋakicsêa ŋadindiŋ kaiŋ teŋ, ôsic kêpô gamêŋ ŋawê kêsa
e nom ŋawiwic dendeŋgeŋ to kôtêŋ-kôtêŋgeŋ.
19 Aômnêm intêna gêjac gwêc gêŋgic ma nêm lêŋ gêwa ŋasamac kapôêŋ êliŋ-êliŋ,
mago sêlic waŋam atom.
20 Aôm gôwê nêm lau amboac ŋacgejob gêwê nê domba.
Mose agêc Aron sêjam aôm laŋôm.
Asapnê teŋ.


Copyright information for `JAE