Psalms 79

PESALEM 79

Mec Anôtô ênam nê lau kêsiŋa

O Anôtô, lau samuc sêsô nêm gamêŋ sêja.
Êsêac seseŋ nêm lôm dabuŋ ŋadabuŋ ma sêjamu Jerusalem e popocgeŋ.
Êsêac sêkêŋ nêm sakiŋwaga nêŋ ŋawêlêlaŋ kêtu moc, taŋ sêmoa umboŋ ŋalabu naŋ, nêŋ gwada.
Sêkêŋ nêm lau mansaŋ nêŋ ŋawêlêlaŋ gêdêŋ bôc ŋaclai.
Êsêac sêkêc êsêacnêŋ dec siŋ kêtôm bu, sêgôm sêgi Jerusalem auc e kêsô tau
ma ŋac teŋ gêmoa gebe ênsuŋ ŋacmatê naŋ gêmoa atom.
Aêacma lau malac ŋagêdô, taŋ dêmôêŋ gêjac tauŋ naŋ, sêsu aêac susu
ma tenteŋlatu, taŋ sêŋgôŋ makeŋ-makeŋ naŋ, sêlic aêac amboac gêŋ meloc ma têtaŋ pêlê aêac.

O Apômtau, oc gobe ôli nêm ŋalêlôm sa ŋapaŋ e êndêŋ ondoc acgom.
Nêm têmtac ŋandaŋ êndaŋgac-êndaŋgac amboac jawaô e êndêŋ ondoc, go êmbacnê.
Ôkêŋ nêm têmtac ŋandaŋ naêpi lau samuc, taŋ sêjam kauc aôm naŋ,
to êpi tenteŋlatu, taŋ aweŋ gêjac nêm ŋaê atom naŋmaŋ.
Gebe êsêac sêjac aêacma lau êndu
ma sêgôm nêŋ malac kêtu gasaŋ.

Ôkêŋ tameŋinêŋ sec ŋagêjô êpi aêac atom. Taêm labu aêac sebeŋmaŋ
gebe aêac awi atu gwasaê aômŋa siŋ.
O Anôtô, taŋ kôtu aêacma kêsiwaga naŋ, ônam aêac samaŋ.
Ôŋgôm nêm ŋaê ŋawae êsa.
Ônam aêac sa to ôsuc aêacma biŋ ôkwimaŋ.
Ôŋgôm êtu nêm waemŋa.
10 Amboac ondoc lau samuc sênac aêac ôkwi gebe
“Lau tônê nêŋ Anôtô oc gêmoa ondoc.”
Ôkac nêm sakiŋwaga, taŋ lau samuc sêkêc êsêacnêŋ dec siŋ naŋ,
nêŋ kamocgôc êndêŋ aêac mateŋanô alicmaŋ.

11 Ôkêŋ taŋam lau kapoacwalôŋa nêŋ biŋ, taŋ seŋ oliŋ tauŋŋa naŋ.
Lêmam ŋajaŋaboa, amboac tonaŋ ônam lau, taŋ sêkic êsêacnêŋ biŋ gebe sêmac êndu naŋ sa.
12 O Apômtau, aôm ôkêŋ ŋagêjô êpi lau, taŋ têtaŋ pêlê aôm sêŋgôŋ aêacma gamêŋ ŋamadiŋ naŋ acgom.
Ma ôkêŋ êsêacnêŋ biŋ ŋagêjô êtu dim 7.
13 Ma aêac tec atu nêm lau to toŋ, taŋ aôm gojob êsêac nec, abe anam daŋge aôm endeŋ tôŋgeŋ,
ma gôlôac to gôlôac sêŋgôm aôm waem êsa êtôm têmgeŋ.
Asapnê teŋ.


Copyright information for `JAE