Psalms 80

PESALEM 80

Mec gebe Anôtô ênam Israel sa êtiamŋa

O Israelnêŋ ŋacgejob, taŋ gojob Josep kêtôm domba ŋatoŋ teŋ naŋ, ôkêŋ taŋam.
Aôm taŋ gôŋgôŋ kerub ŋaô naŋ, oc taôm lasê
êndêŋ Epraim agêc Benjamin ma Manase.
Ôndi toŋaclai mêŋônam aêac sa.

O Anôtô, ônam aêac sa êtiam.
Ôkêŋ laŋômanô mêŋêpô aêac gebe ênam aêac sa.

O Apômtau, lausiŋ undambêŋa nêŋ Anôtô,
nêm lau teteŋ mec elêmê ma aôm gobe ôê têmtac ŋandaŋ tôŋ e êndêŋ ondocgeŋ.
Aôm kôkêŋ êsêac seŋ mateŋsulu kêtu nêŋ mo.
Aôm kôkêŋ êsêac sênôm mateŋsulu, taŋ kêsêp laclu e mêŋgêc naŋ.
Aôm kôpô aêac siŋ e tenteŋlatu sêsu aêac susu
ma aêacma ŋacjo sêômac aêac.

O Lausiŋ undambêŋa nêŋ Apômtau, mêŋônam aêac sa êtiam.
Ôkêŋ laŋômanô mêŋêpô aêac gebe ênam aêac sa.

Aôm kôkip wainmôkê teŋ sa aŋga Aiguptu
ma kôjanda lau samuc sêsa gebe ôsê êsêp êsêac maleŋ.
Aôm kôwaka ŋagamêŋ sa ŋapep,
tec ŋawakac keseleŋ ŋajam ma gêjam gamêŋ auc.
10 Ka tau kêkêŋ ajuŋ lôc samob
ma ŋalaka gêjam kaseda kapôêŋ auc.
11 Ka tau ketoc laka kêsa e jagêdêŋ gwêc
ma ŋasêli kêpi e jagêdêŋ bu Euprat.
12 Amboac ondoc tec goseŋ ŋatuŋ su.
Lau samob, taŋ sasa intêna tonaŋ naŋ, oc sênam geŋgeŋ ŋanô.
13 Bôcgabuŋ kêsuc popoc
ma bôc saleŋŋa ŋagêdô seŋ katu nêŋ mo.

14 O lausiŋ undambêŋa nêŋ Apômtau, ômu ômôêŋ êtiam.
Ôtuc kêniŋ aŋga undambê ma matam e wainmôkê tau e taêm walô nêm geŋ êtiam.
15 Taêm walô nêm gêŋ, taŋ lêmam anôŋa kasê naŋ.
ma ŋasêli, taŋ gôjac kolec naŋ.

16 Ŋacjo dêdim gêŋgic e ja-geŋ su.
Laŋômanô ŋajaê êndêŋ êsêac ma onseŋ êsêac su sênaŋa.
17 Ôkêŋ lêmam eo ŋac, taŋ kêkô nêm anôŋa naŋ auc.
Eo ŋamalac latu, taŋ gôlôm eŋ e kêtu kapôêŋ naŋ auc.
18 Go aêac akac tauŋ su aŋga aômnêm êtiam atom.
Ôkêŋ aêac aŋgôŋ mateŋ jali ma aweŋ êôc aômnêm ŋaê.

19 O lausiŋ undambê naŋ Apomtau, mêŋônam aêac sa êtiam.
Ôkêŋ laŋômanô mêŋêpô aêac gebe ênam aêac sa.
Asap gêwa nê biŋ sa.


Copyright information for `JAE