Psalms 92

PESALEM 92

Wê lambiŋŋa

Tanam daŋge Apômtau kêtu gêŋ ŋanô mataêjam.
O Lôlôc Ŋatau, aêac alanem nêm ŋaê.
Êndêŋ bêbêcgeŋ samob aêac asôm nêm têmtac gêwiŋ teŋgeŋŋa lasê
ma êndêŋ êmbêc akêŋ nêm biŋ ŋaŋêŋ ŋawae.
Apip gêŋ wêŋa ŋagam lemelu ma anac kaliŋgwaŋsêga êtaŋ
ma anac gêŋ wêŋa ŋagêdô amboac tonaŋgeŋ.
Gebe aôm Apômtau gôgôm nêm gêŋ ŋajam e kêmoasiŋ aêŋoc ŋalêlôm,
tec gajam wê ma katuc samuc nêm lêmam ŋakôm.

O Apômtau, aômnêm kôm ŋanô kapôêŋanô.
Aôm taêm gêjam biŋ samob kêsêp lêlôm e jakôkip sa.
Ŋac taŋ nê kauc masi naŋ, oc êjala gêŋ tonaŋ ŋai atomanô.
Ma ŋac meloc oc êjala ŋam sapu.
Lau taŋ sêkac tauŋ su aŋga Anôtônê naŋ, têtôm gêgwaŋ ŋamêdôb wakuc ŋajam, ma lau samob, taŋ sêgôm sec naŋ, têtôm ka ŋaola kêsa,
mago oc sêmoa atom, sênaŋa samucgeŋ.
Ma aôm Apômtau oc ôŋgôŋ nêm lêpôŋ, taŋ kêkô lôlôcŋa naŋ,
endeŋ tôŋgeŋ.

O Apômtau, aômnêm ŋacjo oc sênaŋa biŋŋanô. Nêm ŋacjo oc sênaŋa biŋŋanôgoc.
Aôm oc onseŋ lau samob, taŋ sêgôm sec naŋ, popoc êliŋ-êliŋ.
10 Aôm gôgôm aê ôlic walô kêsa amboac bôc bulimakao kapoac ŋaclai teŋ.
Aôm goeŋ oso aê ŋa gêŋ têtac ŋajamŋa.
11 Aê galic sêku ŋoc ŋacjo tulu
ma gaŋô lau sec sêwakic.

12 Lau gêdêŋ sêpoa sêpi amboac nip
ma têtu baliŋ kêtôm kaseda Lebanonŋa.
13 Êsêac têtôm ka, taŋ sêsê kêsêp Apômtaunê andu naŋ.
Êsêacnêŋ ŋaola gêjac lêtêŋ aŋga aêacnêŋ Anôtônê malacluŋ.
14 Êsêac sêjam ŋanô gêdêŋ taŋ môdê kêpi êsêac naŋ.
Nêŋ ŋatêkwi taêsam ma ŋalauŋ ŋawawa laŋgwageŋ.
15 Biŋ tonaŋ gêwa sa gebe Anôtô eŋ ŋac ŋaŋêŋ
ma biŋ keso teŋ gêc ŋoc lamu atom.
Wê Sabatŋa.


Copyright information for `JAE