Psalms 94

PESALEM 94

Anôtô kêtu lau samob nêŋ mêtôcwaga

O Apômtau, aôm kôkac kamocgôc ŋatau.
Kamocgôc ŋaAnôtô mêŋô lasê.
Aôm taŋ kômêtôc lau nomŋa nêŋ biŋ naŋ, ôndi samaŋ.
Ôkêŋ ŋagêjô êndêŋ lau, taŋ tetoc tauŋ sa naŋ.
Secwaga tetoc tauŋ sa
ma ôliŋ kêpi kêtu nêŋ secŋa e êndêŋ ondocgeŋ.
Êsêac sêsôm biŋ alôb-alôb e aweŋôpic mêŋgêbôc laŋgwageŋ.
Secwaga samob sêkêli tauŋ ŋanô.

O Apômtau, êsêac sêka nêm lau popoc.
Êsêac sêkôniŋ nêm gêŋlênsêm tôŋ.
Êsêac sêgiŋ awêtuc to mosêbu êndu
ma sêjac lau jaba, taŋ sêmoa aêacma gamêŋ naŋ êndu.
Êsêac sêsôm gebe “Anôtô oc êlic sapu.
Jakobnê Anôtô kêpuc mata tôŋ aêac atom.”

Amac lau meloc, taŋ amoa lau ŋalêlôm naŋ, nêm kauc êsa acgommaŋ.
Ma amac lau gêbôc oc êndêŋ ondoc acgom, go ajala biŋ ŋam.
Ŋac tau, taŋ kêkêŋ aêac taŋeŋsuŋ kêsap tôŋ naŋ, oc êŋô biŋ atom me.
Ma ŋac tau, taŋ kêkêŋ aêac mateŋanô naŋ, oc êlic gamêŋ teŋ sapu me.
10 Ŋac tau, taŋ gêwa ŋamalacnêŋ kauc sa to gêjam gôliŋ tenteŋlatu samob naŋ,
oc êkêŋ ŋagêjô atom me.
11 Apômtau tec kêjala biŋ, taŋ ŋamalac taêŋ gêjam gêc nêŋ ŋalêlôm naŋ, e jakêkip sa,
mago êsêac tauŋ têtôm aweŋjaô ŋaôma.

12 O Apômtau, aê aoc êôc ŋac, taŋ aôm gôjam gôliŋ eŋ naŋ,
to aoc êôc ŋac, taŋ aôm gôwa nêm biŋsu sa gêdêŋ eŋ naŋ.
13 Aôm gobe ômbôc gêŋwapac auc êndêŋ eŋ,
ôŋgôm ômoa e êndêŋ bêc, taŋ sêkwê sê gebe ŋac alôb-alôb êsêp êna naŋ.
14 Apômtau oc êtiŋ nê lau su atom
ma oc êwi nê gêŋlênsêm siŋ atom.
15 Biŋgêdêŋ oc êwaka tau sa aŋga gamêŋ mêtôcŋa êtiam
ma lau gêdêŋ oc sêpuc biŋgêdêŋ tau tôŋ.

16 Asa oc êpuc aê tôŋ êndêŋ lau secwaga.
Asa oc êkô êwiŋ aê êndêŋ lau alôb-alôb.
17 Apômtau embe ênam aê sa atom,
oc ŋoc katuc wanêcgeŋ naêmoa nê gamêŋ ŋaŋêŋ su.
18 Gêdêŋ taŋ katêc tauc gebe janac tauc êndu naŋ,
nêm têmtac gêwiŋ teŋgeŋŋa kêpuc aê tôŋ, o Apômtau.
19 Gêdêŋ taŋ gêŋwapac gêjam ŋoc ŋalêlôm auc naŋ,
aôm gôjam malô aê e gôgôm aê têtac ŋajam kêsa kêtiam.

20 Lau sêmêtôc biŋ kesowaga to êsêac, taŋ sêjam biŋsu ŋamata ôkwi-ôkwi naŋ,
oc sêwê kaiŋ aôm me.
21 Lau tonaŋ sêkac tauŋ sa gebe sêkic ŋac gêdêŋ nê biŋ
ma sêmêtôc lau, taŋ nêŋ biŋ masi samucgeŋ naŋ, gebe sêmac êndu.
22 Mago Apômtau tec kêtu ŋoc tuŋtêna ŋajaŋa sec.
Ŋoc Anôtô kêtu ŋoc poc, taŋ gaê lamu naŋ.
23 Eŋ oc êkêŋ ŋagêjô êndêŋ êsêac êtôm nêŋ biŋ alôb-alôb ma enseŋ êsêac tauŋ êtu nêŋ secŋa.
Biŋŋanô, Apômtau aêacnêŋ Anôtô, oc enseŋ êsêac su.
Copyright information for `JAE