Psalms 96

PESALEM 96

Wê lambiŋŋa

Aŋga wê wakuc êpi Apomtau.
Amac lau gamêŋ samobŋa, aŋga wê êpi Apômtau.
Aŋga wê êpi Apômtau ma awem êôc ênê ŋaê.
Asôm ênê moasiŋ ŋawae lasê êtôm bêc to eleŋgeŋ.
Asôm ênê ŋawasi lasê êndêŋ tenteŋlatu
to ênê gêŋsêga êndêŋ lau nomŋa samob.

Apômtau eŋ ŋac kapôêŋ, amboac tonaŋ samob aweŋ êôc eŋ.
Tatêc eŋ êlêlêc anôtôi samob su.
Gebe tenteŋlatu nêŋ anôtôi samob gwamgeŋ.
Apomtau taugeŋ tec kêkêŋ undambê.
Wae to ŋawasi kiŋŋa kêkôm eŋ auc.
Ŋaclai to ŋawasi gêjam ênê gamêŋ dabuŋ auc.

O lau samuc nêŋ gôlôac, atoc Apômtau sa.
Atoc Apômtaunê ŋawasi to ŋaclai sa.
Atoc Apômtaunê ŋaê towae sa.
Asô ênê malacluŋ ana ma ansuŋ da êndêŋ eŋ.
Au taôm anêc Apômtau laŋônêm togêlôŋ dabuŋgeŋ.
Nom ŋagamêŋ samob, atênêp êtu eŋŋa.

10 Asôm biŋ tonec lasê êndêŋ lau samuc gebe “Apômtau katu kiŋ.
Eŋ kêsuŋ nom ŋam tôŋ ŋajaŋa gebe kôjô-kôjô atom. Eŋ oc êmêtôc tenteŋlatunêŋ biŋ naêndêŋgeŋ.”
11 Undambê atu samuc ma nom têtac wapi,
gwêc tau to gêŋ mateŋ jali samob, taŋ sêmoa ŋalêlôm naŋ, ŋadindiŋ êsa.
12 Kôm to gêŋ kômŋa samob sênam lasê.
Ka saleŋtênaŋa samob sêmôêc toaligeŋ.
13 Sêkô Apômtau laŋônêmŋa gebe eŋ oc êmêŋ.
Biŋŋanô, eŋ oc amêŋ gebe êmêtôc nom.
Eŋ oc amêtôc gamêŋ samob ŋa biŋgêdêŋ
to tenteŋlatu ŋa nê biŋ ŋaŋêŋ.
Copyright information for `JAE