Psalms 98

PESALEM 98

Anôtô kêtu nom samucgeŋ ŋagôliŋwaga

Apuc wê wakuc teŋ sa êndêŋ Apômtau
gebe eŋ gêgôm gêŋsêga.
Ênê lêma anôŋa
to ŋaclai dabuŋ kêku nê ŋacjo tulu.
Apômtau kêsôm eŋ kêku ŋacjo tulu ŋawae lasê.
Eŋ geoc nê biŋgêdêŋ lasê gêdêŋ tenteŋlatu samob.
Eŋ taê gêjam nê têtac gêwiŋ teŋgeŋŋa to biŋ ŋaŋêŋ,
taŋ gêjac mata gêdêŋ gôlôac Israel naŋ.

Lau gamêŋ samobŋa awem êôc Apômtau toôndugeŋ.
Anam lasê to apuc wê lambiŋŋa sa.
Aŋgôm gêŋ wêŋa êtaŋ gebe êŋgôm Apômtaunê wae êsa.
Aŋgôm ŋa gêŋ wêŋa ma apuc wê tau sa.
Anac dauc to posauno êtaŋ.
Awem êôc kiŋ Apômtau toôndugeŋ.

Gwêc to ŋagêŋ samob, taŋ gelec-gelecgeŋ sêmoa ŋalêlôm naŋ, ŋadindiŋ êsa
ma lau samob, taŋ sêŋgôŋ nom auc naŋ, amboac tonaŋgeŋ.
Bu kapôêŋ ŋasamac, amakop lemem.
Lôc samob sêkêli tauŋ sêpi-sêpigeŋ sêkô Anôtô laŋôgeŋ.
Sêŋgôm êndêŋ Apômtau gebe eŋ oc mêŋêmêtôc ŋamalac nomŋa nêŋ biŋ.
Eŋ oc êmêtôc lau samob, taŋ sêŋgôŋ nom auc naŋ, ŋa biŋgêdêŋ ma biŋkatô.
Copyright information for `JAE