Revelation of John 17

Awê mockaiŋo agêc bôc tau

Ma aŋela 7, taŋ sêkôc laclu 7 naŋ, nêŋ teŋ kêsa mêŋkêsôm gêdêŋ aê gebe “Ômôêŋ, aê jatôc mockaiŋo towae, taŋ gêŋgôŋ bu kapôêŋ ŋatali naŋ, nê mêtôc êndêŋ aôm. Kiŋ nomŋa sêgôm gêŋ mockaiŋŋa gêdêŋ eŋ, ma lau taŋ sêŋgôŋ nom naŋ, sênôm ênê wain mockaiŋoŋa e kêjaŋiŋ êsêac.”

Go katuc kaiŋ teŋ kêsa e ŋac tau gêôc aê kasa gamêŋ sawa teŋ gaja. Ma galic awê teŋ gêŋgôŋ bôc bomsamuc teŋ ŋaô, ma teto ŋaê alôb-alôb gêjam eŋ ôli auc. Ma bôc tau môkêapac 7 to nê jabo 10. Awê tau kêsô ŋakwê asôsamuc to bomsamuc ma gêjam gêlôŋ tau ŋa gold ma pocawa to kêkôm. Lêma kêkôc laclu gold, taŋ awê tau nê mockaiŋ ŋagêŋ môp to ŋatêmui kêsêp e mêŋgêc. Ma teto ŋaê teŋ gêc eŋ têbela, naŋ ŋam kêsêp lêlôm gebe “Babel kapôêŋ, nom ŋamockaiŋo samob to gêŋ môpŋa samob ŋatêna.” Ma galic awê tau gênôm Anôtônê lau to lau, taŋ sêwa Jesu sa naŋ, nêŋ dec e kêjaŋiŋ eŋ.

Gêdêŋ taŋ galic eŋ naŋ, gaê taêc eŋ ŋanô.
Mago aŋela kêsôm gêdêŋ aê gebe “Gôê taêm kêtu asageŋŋa. Aê oc jawa awê to bôc tomôkêapac 7 ma nê jabo 10, taŋ kêbalaŋ awê tau naŋ, nêŋ ŋam kêsêp lêlômŋa sa êndêŋ aôm. Bôc taŋ gôlic naŋ, gêmoa gêdêŋ gêmuŋgeŋ e galoc malamê, ma malôgeŋ acgom, go êpi aŋga gêsuŋbôm êmêŋ e ênaŋa. Lau taŋ sêŋgôŋ nom naŋ, oc sêlic bôc tau, taŋ gêmuŋgeŋ gêmoa e galoc malamê ma oc mêŋêô lasê êtiam naŋ, ma sê taêŋ. Mago gêdêŋ taŋ Anôtô kêkêŋ undambê to nom atomgeŋ naŋ, lau taŋ sê taêŋ naŋ, nêŋ ŋaê kêsêp buku mata jaliŋa atom.

“Amboac tonaŋ lau tokauc mêtêŋa taêŋ ênam biŋ tau acgom. Môkêapac 7 têtôm lôc 7, taŋ awê gêŋgôŋ ŋaô, naŋ. Môkêapac tau têtôm kiŋ 7 amboac tonaŋ. 10 Kiŋ lemeŋ teŋ sêjaŋa su. Teŋ tec gêmoa. Ma teŋ gêmêŋ atom tageŋ. Eŋ embe êmêŋ, oc êmoa ŋasawa dambêgeŋ. 11 Ma bôc tau, taŋ gêmuŋgeŋ gêmoa ma galoc malamê naŋ, kêtu kiŋ 8ŋa. Eŋ aŋga êsêac 7 nêŋ, mago oc ênaŋa.

12 “Ma jabo 10, taŋ gôlic naŋ, têtôm kiŋ 10, taŋ sêkôc nêŋ gôliŋ kiŋŋa sa atom tageŋ. Mago êsêac oc sêkôc ŋaclai kiŋŋa sa êtôm ockatu ŋasawa tageŋgeŋ sêwiŋ bôc tau. 13 Êsêacnêŋ biŋ kêpi tageŋ ma sêkêŋ nêŋ ŋajaŋa to ŋaclai gêdêŋ bôc tau. 14 Êsêac oc sênac siŋ êndêŋ Domba, mago Domba tau oc êku êsêac tulu, gebe eŋ kêtu apômtaunêŋ Apômtau to kiŋnêŋ Kiŋ. Ma lau, taŋ eŋ kêkalem to kêjaliŋ êsêac sa ma têdaguc eŋ ŋaŋêŋgeŋ naŋ, sênac siŋ sêwiŋ eŋ.”

15 Go aŋela kêsôm gêdêŋ aê gebe “Bu taŋ gôlic mockaiŋo gêŋgôŋ ŋatali naŋ, kêtôm lau to-m-to-m to lau tomôkê-tomôkê ma lau totoŋ-totoŋ to lau aweŋ teŋ-aweŋ teŋ. 16 Ma jabo 10, taŋ gôlic naŋ, to bôc tau, naŋ têntac gedec mockaiŋo. Êsêac sêjaŋgo ênê gêŋ samob su e êmoa ôli ŋaômageŋ êmoa nê tauŋa, ma sêniŋ ênê ŋamêsôm to sêkêŋ ja êniŋ eŋ su. 17 Biŋ tonaŋ êsa gebe Anôtô kêkêŋ kêsêp êsêacnêŋ ŋalêlôm gebe sêŋgôm ênê biŋ êtu anô, tec kêkêŋ êsêacnêŋ ŋalêlôm kêpi tageŋ ma sêwi nêŋ gôliŋ kiŋŋa siŋ gêdêŋ bôc tau ênêc e Anôtônê biŋ ŋanô êsa acgom.

18 “Ma awê, taŋ gôlic naŋ, kêtôm malacsêga, taŋ gêjam gôliŋ kiŋ nomŋa samob.”

Copyright information for `JAE