Revelation of John 7

Sepeŋ ŋatalô kêpi Israelneŋ lau 144,000

Tonaŋ su, go galic aŋela aclê sêkô nom ŋakêclêsu aclê ma sêmêgôm nom ŋamu aclê tôŋ, gebe mu teŋ êsêlêŋ naêpi nom ma gwêc to ka teŋ atom. Go galic aŋela teŋ aŋga oc ŋam kêpi gêmêŋ, naŋ kêkôc Anôtô mata jali nê peŋ sepeŋ ŋatalôŋa ma gêmôêc ŋa awa kapôêŋ gêdêŋ aŋela aclê, taŋ têtap ŋaclai sêŋgôm nom to gwêc êtu secŋa sa naŋ gebe “Aŋgôm nom to gwêc ma ka êtu sec atomgeŋ e aêac apeŋ ŋatalô êpi aêacnêŋ Anôtônê sakiŋwaganêŋ teŋbeleŋ su acgom.” Go gaŋô sêsa lau, taŋ sepeŋ ŋatalô kêpi êsêac naŋ, nêŋ namba sa kêtôm 144,000. Sepeŋ ŋatalô kêpi Israel latuinêŋ gôlôac samob kêtômgeŋ.

Aŋga Judanê gôlôac sepeŋ ŋatalô kêpi lau 12,000,
aŋga Rubennê gôlôac 12,000,
aŋga Gadnê gôlôac 12,000,
aŋga Asernê gôlôac 12,000,
aŋga Naptalinê gôlôac 12,000,
aŋga Manasenê gôlôac 12,000,
aŋga Simeonnê gôlôac 12,000,
aŋga Lewinê gôlôac 12,000,
aŋga Isakamê gôlôac 12,000,
aŋga Sebulonnê gôlôac 12,000,
aŋga Josepnê gôlôac 12,000,
ma aŋga Benjaminnê gôlôac 12,000.

Lau nomŋa totoŋ-totoŋ sêjam sakiŋ Anôtô

Tonaŋ su, go galic lau taêsam ŋasec, ŋac teŋ kêtôm gebe êsa êsêac saŋa atomanô. Êsêac aŋga lau totoŋ-totoŋ samob nêŋ to lau tomôkê-tomôkê ma lau to-m-to-m samob to lau aweŋ teŋ-aweŋ teŋ. Êsêac sêkô lêpôŋ kiŋŋa to Domba laŋônêmŋa sêsô ŋakwê kwalam-kwalam ma sêôc tômtôm ŋalauŋ. 10 Ma sêmôêc ŋa aweŋ kapôêŋ gebe “Moasiŋ ênam aêac kêsiŋa gêmêŋ aŋga Anôtô, taŋ gêŋgôŋ lêpôŋ kiŋŋa naŋ, agêc Domba nêŋ.” 11 Ma aŋela samob, taŋ sêkô sêgi lêpôŋ kiŋŋa to laumata ma bôc aclê auc naŋ, sêu tauŋ têtap labôcgeŋ sêc lêpôŋ kiŋŋa ŋanêmŋa ma teteŋ mec gêdêŋ Anôtô 12 ma sêsôm gebe

“Biŋŋanô, lambiŋ to ŋawasi
ma kauc mêtêŋa to daŋge
ma wae to ŋaclai ma ŋajaŋa
êndêŋ aêacnêŋ Anôtô teŋgeŋ ma teŋgeŋ. Biŋŋanô.”
13 Go laumata teŋ kêtu kênac aê gebe “Êsêac taŋ sêsô ŋakwê kwalam-kwalam naŋ, asa lau ma sêmêŋ aŋga ondoc.” 14 Ma aê kasôm gebe “Ŋoc apômtau, aôm kôjalagac.” Tec eŋ kêsôm gêdêŋ aê gebe “Gêŋwapac kêkôniŋ êsêac ŋanô, tec sêmêŋ ma sêkwasiŋ nêŋ ŋakwê kêsêp Dombanê dec, tec ŋakwê tau kêtu sêp.

15 Sêgôm amboac tonaŋ, tec sêkô Anôtônê lêpôŋ kiŋŋa ŋanêmŋa
ma sêjam sakiŋ eŋ kêtôm bêc to geleŋ sêmoa ênê lôm dabuŋ.
Ma ŋac, taŋ gêŋgoŋ lêpôŋ kiŋŋa ŋaô naŋ,
mêŋêtu nêŋ bec.
16 Mo to bu oc êjô êsêac êtiam atom.
Ma oc to gêŋ ŋandaŋ teŋ oc êtuŋ êsêac êtiam atom,
17 gebe Domba, taŋ kêkô lêpôŋ ŋaluŋgeŋ naŋ, oc ejop êsêac
ma oc êwê êsêac sêndêŋ bumata mata jali sêna.
Ma Anôtô oc êmbuŋ êsêac mateŋsulu samob aŋga mateŋgasi su.”
Copyright information for `JAE