Romans 13

Taŋem wamu endeŋ gôliŋwaga

Lau samob sêsô nêŋ gôliŋwaga ŋalabu, gebe gôliŋwaga tauŋ sêkêŋ tauŋ atom, Anôtô kêkêŋ êsêac. Anôtô kêtu gôliŋwaga, taŋ sêmoa naŋ, nêŋ ŋamôkê. Amboac tonaŋ ŋac teŋ embe enseŋ gôliŋwaganêŋ biŋ, oc êkô Anôtônê ŋagôliŋ auc. Ma êsêac, taŋ sêkô ŋagôliŋ auc naŋ, têtap Anôtônê mêtôc sa. Lau taŋ sêsa nêŋ lêŋ ŋajam naŋ, têtêc gôliŋwaga atom, lau taŋ sêgôm sec naŋgeŋ, tec oc têtêc. Aôm embe têmtac êwiŋ gebe ôtêc gôliŋwaga atom, naŋ ôŋgôm nêm gêŋ ŋajamgeŋ, go gôliŋwaga awa êôc aôm. Ŋac tau kêtu Anôtônê sakiŋwaga, gebe ejop aôm ômoa ŋajamŋa. Embe ôŋgôm sec, oc ôtêc taôm, gebe eŋ gêôc nê siŋ ŋaômageŋ atom. Eŋ kêtu Anôtônê sakiŋwaga ma gêgôm ênê têtac ŋandaŋ ŋanô kêsa kêpi ŋac, taŋ gêgôm sec naŋ. Amboac tonaŋ asô gôliŋwaga ŋalabumaŋ, tageŋ asô ŋalabu êtu atêc Anôtônê têtac ŋandaŋŋageŋ atom, asô ŋalabu êtu nêm ŋalêlôm êkac amacŋa êwiŋ. Kêtu tonaŋŋa akêŋ takis êndêŋ gôliŋwaga gebe sêjam kôm tonaŋ tec têtu Anôtônê sakiŋwaga. Launêŋ tôp, taŋ gêc amacŋa naŋ anac. Akêŋ takis êndêŋ ŋac takisŋa to anam ôli gôliŋwaganêŋ takis ŋagêdô amboac tonaŋ. Asô nêm laumata ŋalabu to atoc lau towaeŋ sa.

Biŋ têntac gêwiŋ lauŋa

Ajop taôm gebe aŋgôm tôp atom. Tôp tageŋ tonec ênêc amacŋa gebe akêŋ têmtac gêwiŋ elom tau. Ŋac taŋ têtac gêwiŋ nê lau jabaŋ eŋ naŋ, gêgôm biŋsu ŋanô kêsa. Biŋsu tonec ŋai gebe “Ôŋgôm gêŋ mockaiŋo to mockaiŋŋa atom, ônac ŋamalac êndu atom, ônam geŋgeŋ atom, matam katu gêŋ atom,” to biŋsu ŋalô ŋagêdô samob, naŋ ŋalô tonec kêkatoŋ sa gebe “Têmtac êwiŋ nêm lau wacbaŋ aôm amboac têmtac gêwiŋ taôm.” 10 Ŋac taŋ têtac gêwiŋ nê lau jabaŋ eŋŋa naŋ, êŋgôm êsêac sec atom. Amboac tonaŋ embe têntac êwiŋ lau, go daŋgôm biŋsu samob ŋanô êsa.

Kilisinê bec kêdabiŋ

11 Aŋgôm geŋ tonaŋ gebe ajala noc taugac. Aêc bêc kêtôm, galoc noc andi saŋa mêŋkêsagac. Gêdêŋ taŋ takôc takêŋ gêwiŋ sa naŋ, Anôtônê moasiŋ ênam aêac kêsiŋa gêc ŋasawa ec baliŋ mago galoc mêŋkêdabiŋgac. 12 Gêbêcauc gêbacnê ma geleŋmatagac. Amboac tonaŋ takwalec koleŋ ŋakesecŋa su ma daja laukasap ŋawêŋa sa. 13 Aêac tasa nêŋ lêŋ ŋapep amboac lau, taŋ sêsêlêŋ gêdêŋ ocsalôgeŋ naŋ. Taniŋ lasamboa atom to tanôm anaboa atom, daŋgôm gêŋ mockaiŋo to mockaiŋŋa atom ma mateŋ daŋgucboa atom, takêŋ kisa êndêŋ lau to tanam lêmuŋ êsêacboa atom. 14 Asô Apômtau Jesu Kilisi sa êtu nêm ŋakwê ma amoasiŋ ôlim ŋapep, tageŋ ajop taôm êndêŋ têmtac ŋakalac.

Copyright information for `JAE