Romans 5

Anôtô kêmasaŋ aêacnêŋ biŋ ŋaŋanô

Anôtô kêmasaŋ aêacnêŋ biŋ e gêlic aêac tatu lau gêdêŋ kêtu takêŋ gêwiŋŋa, tec gê wama aêac kêtu aêacnêŋ Apômtau Jesu Kilisiŋa. Aêac takêŋ gêwiŋ, tec ŋac tau gêlêc katam su ma tamoa moasiŋ ŋalêlôm to takêŋ mateŋ tawê kaiŋ Anôtônê ŋawasiŋa toôliŋ kêpigeŋ. Mago tonaŋgeŋ atom. Aêac ôliŋ kêpi kêtu gêŋwapacŋa amboac tonaŋgeŋ, gebe tajala gêŋwapac tau kêkêŋ aêac daôc wapac totêntac kêpa sugeŋ. Daôc gêŋwapac totêntac kêpa sugeŋ kêkêŋ aêac tatu lau ŋaŋêŋ. Tatu lau ŋaŋêŋ, tec takêŋ mateŋ gêŋ, taŋ gêc nêmŋa. Takêŋ mateŋ oc êŋgôm aêac majeŋ êsa atom, gebe Anôtô kêkêŋ nê Ŋalau Dabuŋ gêdêŋ aêac, tec kêkêc nê têtac gêwiŋ ŋanô kêsêp aêacnêŋ ŋalêlôm.

Gêdêŋ taŋ aêac tamoa tonêŋ palêpalageŋ naŋ, Kilisi gêmac êndu gêdêŋ ŋanoc kêtu lau dedec Anôtôŋa. Ŋamalac teŋ oc êmac êndu êtu ŋac gêdêŋ teŋŋa atom. Moae lau tageŋ-tageŋ oc sêmac êndu êtu ŋac ŋajamŋa. Mago Kilisi gêmac êndu kêtu aêacŋa gêdêŋ taŋ tamoa tosecgeŋ. Biŋ tonaŋ gêwa Anôtônê têtac gêwiŋ aêacŋa sa. Kilisinê dec kêmasaŋ aêacnêŋ biŋ gêdêŋ Anôtô, tec Kilisi oc ênam aêac kêsi êndêŋ Anôtônê têtac ŋandaŋ amboac tonaŋgeŋ. 10 Aêac tatu Anôtônê ŋacjo, mago eŋ gê wama aêac kêtu Latu gêmac ênduŋa. Galoc gê wama aêac su ma Latu tau gêmoa mata jali, tec oc ênam aêac kêsi êlêlêc su ŋêŋgeŋ. 11 Mago biŋ tonaŋgeŋ atom. Aêac ôliŋ kêpi Anôtôŋa kêtu aêacnêŋ Apômtau Jesu Kilisi gê wama aêac gêdêŋ Anôtôŋa.

Adam agêc Kilisi

12 Sec gêmêŋ nom kêtu ŋamalac tageŋ nê secŋa. Ma gêmacanô tau mêŋgêô lasê kêtu sec tauŋa. Gêmac tau gelom-gelom e kêtap ŋamalac samob sa, gebe samob sêgôm secgac. 13 Biŋsu mêŋkêsa atomgeŋ ma sec gêc nom kwanaŋgeŋ. Mago biŋsu embe masi, oc sec ŋadôŋ masi amboac tonaŋ, tec sêsôm ŋabiŋ atom. 14 Mago gêmacanô tau gêjam gôliŋ ŋamalac samob, taŋ sêmoa Adam agêc Mose nêŋ têm ŋasawa naŋ. Êsêac sêgôm sec kêtôm Adam kêgêli biŋsu nec atom, mago gêmacanô tau gêjam gôliŋ êsêac amboac tonaŋgeŋ. Adam tau kêtu ŋac, taŋ oc êmêŋŋa naŋ, nê dôŋ.

15 Mago Anôtônê moasiŋ ma Adam kêgêli biŋsu kêtôm tau atom. Taêsam sêmac êndu kêtu ŋac tageŋ kêgêli biŋsuŋa, mago Anôtônê moasiŋ to ŋamalac tageŋ Jesu Kilisi nê moasiŋ, taŋ lau taêsam sêkôc  aômageŋ naŋ, kapôêŋ kêlêlêc su. 16 Ma moasiŋ, taŋ Anôtô kêkêŋ ŋaômageŋ naŋ, to sec, taŋ ŋac tageŋ gêgôm naŋ, keso tau. Ŋac tageŋ gêgôm sec, tec mêtôc geseŋ eŋ. Mago moasiŋ tau kêmasaŋ lau sêgêli biŋsu ŋabiŋ taêsam kêtu solop. 17 Biŋŋanô, ŋac tageŋ kêgêli biŋ ma kêtu ŋac tageŋ tonaŋŋa gêmacanô gêjam gôliŋ gêŋ samob. Mago ŋac tageŋ tonec, Jesu Kilisi, nê kôm ŋanô kêlêlêc su. Lau samob, taŋ sêkôc moasiŋ tolêlôm-tolêlôm to êsêac, taŋ Anôtô kêmasaŋ êsêacnêŋ biŋ e gêlic êsêac têtu lau gêdêŋ naŋ, oc sênam gôliŋ sêŋgôŋ mateŋ jali êtu ŋac tageŋ Jesu Kilisiŋa.

18 Amboac tonaŋ, ŋac tageŋ kêgêli biŋ, tec geseŋ ŋamalac samob su, ma ŋac tageŋ gêjam kôm gêdêŋ, tec Anôtô kêmasaŋ ŋamalac samob nêŋ biŋ e sêŋgôŋ mateŋ jali. 19 Ŋac tageŋ nê taŋapêc gêgôm lau taêsam têtu sec. Ma ŋac tageŋ nê taŋa wamu kêmasaŋ lau taêsam nêŋ biŋ e Anôtô gêlic êsêac têtu lau gêdêŋ.

20 Biŋsu tau mêŋgêô lasê gebe êŋgôm lau sêŋgêli biŋsu ênam sêga. Mago gêdêŋ taŋ sec gêjam sêga naŋ, Anôtônê moasiŋ taŋ kêtôp kêtu kapôêŋ kêlêlêc su. 21 Amboac tonaŋ sec gêjam gôliŋ kepeŋ gêmacanôgeŋ, ma Anôtônê moasiŋ gêjam gôliŋ kepeŋ daŋgôŋ mateŋ jali teŋgeŋŋa kêtu Anôtô kêmasaŋ aêacnêŋ biŋ tatu lau gêdêŋ kêtu aêacnêŋ Apômtau Jesu Kilisiŋa.

Copyright information for `JAE