2 Corinthians 6

Dangetok beti amei ebe algum Pomate ane kulkul ok, as bing be anei yaun gwangne gitangi yem ve gisov, “Yem unggas Pomate ane yaun bwai bwaya gikwai, dangetok be undi Pomate ane yaun bwai bwaya etok weik gen sin ge ti be unavkir dumangg aim nitangi bwaya.” Ve Pomate ginei dangetik ginei;

“Ayeu gaute yem aim yaun givin sawa ebe tangg-viti ve yem ok.
Be gab yem ru givin sawa ebe tangg givin ve nanggas yem ok.”

Be Pol ginei; Unaute kob. Sawa etenik ebe Pomate ta viti ve amolmol ok. Be unaute; As mate etenik ebe Pomate ta givin ve nemb amolmol ru ok.

Amei buaingg amei ve ret amolmo inei yaun ungglus ungglus nipil amei mei kulkul ete algum ok, beti algum ve anei analgum amolmol be aplos bunam bwaya. Gen walang ebe amei algum ok ete ges ru ve Pomate ane amolmol kulkul ane amei. Amei anggas gen bunam walang ok tis aplongg amei dongke-ngge, be avang tis aplongg amei bunam ge be ambweg vie ite molge. Amolmol es amei be itak amei ambweg kapual-lu be ivarkei meidbul amei be ele-leinge gidbwem amei. Amei algum kulkul bamo molge, amei ayengk matanongg amei ite be an ben ite. Amei as amei luev walang ok vie-ngge, be dabangg amei gwet giengk vie-ngge. Amei tangg amei vavis seukie seukie ve amolmol ite ma, amei algum gen vie-ngge gitangi amolmol. Amei mei luev bambamo etok ete ges ru ve Pomate ane amolmol kulkul ane amei, be Ngalau Yamar ane gwangne giro amei ta be tangg amei givin amolmol tis aplongg amei dongke-ngge. Pomate ge ete giro amei ta ve ane gwangne be algum kulkul. Amei anggas luev vie weik ebe amei lau valir ane ebe ve anes valir be tis ebe ve an-valval amei ate ok. Amolmol subu avos givwat amei arengg amei, be subu ilgum amei be mai-mayangg amei. Be eisir subu ili amei vie, be subu ili amei tiate, amolmol subu inggo amei be inei amei amolmol yaun bingkas kasop ane, bemem amei amolmol yaun ano ane. Amolmol ili amei weik gen sin ge, bemem itpweng amei are, be amei avang weik ebe ande amat vunkunu ok, bemem avang matawangg amei. Amolmol ilgum amei mei yaun bemem es amei vunkunu ite. 10 Amei avang tis aplongg amei bunam ge bemem tangg amei vevie ge tis as mate walang ok ve Amol Bamo ane. Amei wambal ma ve amei bemem amb gen vevies ge gitangi amolmol. Amei gen sawa amei, bemem amei mei gen walang ok giengk.

11 Angg nune-nggen nangge Korint. Amei anei yaun giengk gitip ge gitangi yem be anei, amei amb aplongg amei tepwengge gitangi yem gilek. 12 Bemem yem ate ge ete ungil-gili aplongg aim gitangi amei. 13 Ayeu ve nanei yaun eteik nitangi yem weik ebe ganei gitangi natung-gen ok; Yem unemb aplongg aim tepwengge nitangi amei weik ete amei algum gitangi yem ok.

Eitit weik Pomate ane lum yamar

14 Amolmol gitip ane as luev ti, dangetok be yem unvang unvin eisir be unvang mul ve eisir as luev bwaya. Ve yaun ano be tis yaun bingkasop, sulu gitangi ebe atob invang invin is ate ok ite ma. Be gen aiweng tumi ane tis gen ebe giengk gitip ok gitangi ebe atob inambweg invin is ate ok ite. 15 Kilisi gabu Sadam, sulu gitangi ebe ve inbiti yaun ti invin is ate ok ite ma. Be amol ebe aplo givin ok gabu amol ebe aplo givin ite ok, gitangi ebe atob gabu in-gas gen ano dongke-ngge invin is ate ok ite. 16 Pomate matawe ane gabu pomate bingkasop ane, as lum yamar gile dongke ite ma. Be eitit tatpweng are gikwai ve eitit ate nik, ete Pomate matawe ane, ane lum yamar. Ve Pomate Ei ate ginei dangeteik;

“Ayeu atob natav angg nam be nambweg navin angg amolmol-gen, be atob navang navin eisir.
Be atob ayeu weik eisir as Pomate. Be eisir weik awangg amolmol-gen.”

17 Be Amol Bamo ginei vukuri dangeteik;

“Dangetok be yem unamdil be unde unambweg aikawe unkwai eisir.
Be un-gilgili aim ate nitangi gen tomtom bambamo ebe gitangi ve tanalgum ite ok. Veik atob ayeu nanggas yem.

18 Be atob ayeu weik yem Tamangg aim, be yem weik Ayeu natung-gen tis natungg avie gen.” Amol Bamo Ei Amol gwangne, ane avo ukwas etenik.

Copyright information for `KBM