Matthew 19

Yisu ginei yaun ebe amolmol bwais ve aruasgen be itin is ok

Yisu ginei yaun bambamo etok be ma gikwai kob tis ane singamolomb-gen ikwai Galilaia as taku be es bui Joldan gili ile ipil Judia as taku. Be amolmol dubi bamo ti itau ile Yisu tis ane singamolomb-gen be ile, be nangge etok ete Yisu gilgum amolmol ebe tis gimat ok be utlas vie vukuri. Bekob Parisai subu itangi Yisu ile be ilgum ve inyo inyo ei, beti iutani ei be inei, “Eitit and luev giengk dang etok ve atob amol ti ginei bua ve arue kob atob nitin me ma?” Yisu giwel eisir avos be ginei, “Yem usam yaun ebe giengk Pomate ane kapia ok gikwai me ma? Warik mate ane Pomate gipasang amol ti be avie ti, be ginei, “Amol atob nikwai tame gabu tine be nile nivang nivin arue, be atob gabu invang weik gen ano dongke-ngge. Be gen ete ande Pomate gidgin gikwai ok, gitangi ebe atob sulu as ti nidbwen gen etok gili ok ite ma.” Be eisir Parisai iutani Yisu vukuri be inei, “Be nam-nambed be Mose geb yaun ti gitangi amei be ginei, ‘Amol ti ginei bua ve arue be ve nitin okob niro yaun ebe ve bua ve arue ok, nireu kapia den ti be nemb nitangi arue nile?’ ” Yisu giwel eisir avos be ginei, “Mose geb yaun etok gitangi yem ve gili yem aplongg-aim dadani molge be gitangi ebe ve unatpweng gen arkares ok ite. Bemem warik gimungg ane luev ti dang etok giengk ite molge. Be ayeu nanei nitangi yem, amol ti ginei bua ve arue be ve nitin ei bemem avie nok gilgum gen wasi ane ite, be amol etok gile geb avie vaku ti, okob amol etok giyaing luev ebe ve inemb isate ane ok.” 10 Bekob eisir singamolomb itangi Yisu ile be inei, “Ginei amolmol ilgum gen dang dang-etok gitangi aruasgen, okob gen etok vie ve amol be avie nemb isate bwaya.” 11 Yisu giwel ane singamolomb-gen avos be ginei, “Yaun etenok gitangi ebe atob amolmol tepwengge inatpweng are ok ite ma, bemem amolmol ebe Pomate ginei yaun etenik ane dabe gitangi eisir ok ge, gitangi atob inatpweng are. 12 Ve yaun ete amol be avie inemb isate ite nik ane dabe walang giengk. Amolmol subu tinas-gen ikuv is be gitangi ebe atob inemb avie ok ite, be subu ete amolmol iro eisir vukir be be tas gitung ete ve nemb avie ok ite ma. Be eisir subu bwais ve inemb avie giwei eisir tas gitung Pomate ane kulkul ebe ve nemb amolmol dabin ok. Amol ti ginei gitpweng yaun etenik are atob nilgum.”

Yisu geb yaun vie giwei nunus

13 Amolmol subu inggas nunus natu natu itangi Yisu ile ve nitak bage niwei is be nes miengk niwei eisir, bemem eisir singamolomb inggo eisir nok. 14 Bemem Yisu ginei gitangi ane singamolomb-gen be ginei, “Untau nunus etenok be intangi ayeu inme, be unvarkei eisir avut bwaya. Ve Pomate ane taku giengk ve amolmol dang dangetenok ane. 15 Bekob gitak bage giwei nunus nok dabas be geb avo ukwas giwei eisir gikwai kob tis ane singamolomb-gen ile.

Amol singamolomb ti ebe tis wambal ok

16 Be seukie-ngge amol singamolomb ti gitangi Yisu gile be giutani ei be ginei, “Gidung, gen vie ret giengk ebe ve ayeu nalgum veik nambweg matawangg dang etok ok?” 17 Yisu giwel ei avo be ginei, “Nam-nambed be mie gutani ayeu ve gen vie ane? Gen vie dongke-ngge ete giengk nik; Pomate dongke-ngge ei Amol vie, be ginei mie tam givin ve numbweg matawem nemb ta-ngge, okob nusov Ei ane yaun ane lu ge.” 18 Be amol nok giutani Yisu, “Yaun ret?” Be Yisu ginei, “Nos amolmol vunu ite, nulgum gen wasi ane ite, nunei yaun bingkas kasop nipil amolmol ite, nuvaina gen ite, 19 nusov tamem gabu tinem as yaun ane lu ge, be tam nivin am nune-nggen weik ete mie ate tam givin imate ok.” 20 Be amol nok ginei, “Ayeu galgum yaun walang etok ano gile gikwai, be gen ret giengk ebe ve ayeu nalgum vukuri ok?” 21 Yisu ginei gitangi ei, “Ginei mie gupasang gen walang etok love gitangi ge okob vie, be nule be nomb am wambal tepwengge be amolmol inavgo. Bekob nuvwat am gen etok ane mone nule be numbwas nitangi amolmol ebe gen ma ve is ok, be nindeb mul ane atob mie nunggas am gen vevies ge nangge Pomate ane taku. Bekob nunme be nuvang mul ve ayeu.”

22 Givin ebe amol nok giute yaun etok ok be givang gikwai tis aplo bunam ge ve gile, ve gisov ei amol ti ebe tis wambal bamo ok be ei bua ve ret nikari ane gen ti. 23 Be Yisu ginei gitangi ane singamolomb-gen be ginei, “Ayeu nanei bingano-ngge nitangi yem, gen etok bunam molge gitangi amolmol ebe tis wambal ok ebe ve insov Pomate ane taku ebe ve nemb amolmol dabin inde ok. 24 Ayeu nanei vukuri. Gen etok bunam ve gen bamo ti weik bwelk ok nisov gen avo natu ti weik nil avo ok nile, bemem bunam molge gitangi amolmol ebe tis wambal ok, ebe ve insov Pomate ane taku ebe ve nemb amolmol dabin inde ok.” 25 Eisir singamolomb iute yaun etok be tas gitung walang ano be ile iutani Yisu be inei, “Ginei dang-etok, okob amol ret gitangi ebe atob nimbweg vie ok?” 26 Yisu na giro ane singamolomb-gen be ginei, “Amol ti gitangi nilgum gen dang-etok ite, bemem Pomate ei dongke-ngge gitangi atob nilgum gen walang ok.”

27 Be Pita ginei gitangi Yisu, “Amei avang akwai amei gen walang ok be anme avang mul ve mie. Be asonge amei an-gas gen vie ret?” 28 Be Yisu ginei gitangi eisir, “Asonge nindeb mul ane nivin ebe gen walang ok ve menihlang vaku vukuri ok, atob Pomate Natu Ayeu ebe meng-gahlang weik amolmol ok atob nambweg nawei angg lopong tis angg bogbogo ve naute amolmol as yaun. Be nivin etok atob yem ete uvang mul ve ayeu nik, atob unambweg unvin ayeu be unalgum amolmol nangge Israel as yaun. 29 Amolmol ebe ivang ikwai tamas-gen tis tinas-gen be as nam tis natus-gen be luvus avie-nggen be as male-nggen tis as taku, ve awangg kulkul ane ok, atob in-gas gen walang molge nitlek as gen etok nindeb mul ane, be atob inambweg matawas nemb ta-ngge. 30 Bemem amolmol ete galkik imungg nik atob inde indeb mul ane, be eisir ete mul ane ok atob inde inmungg.”

Copyright information for `KBM