Revelation of John 13

Bwelkusing ailu meihlang

Bekob gali bwelk ti meng-gihlang nangge gielk. Bwelk nok dabe tulkwe ane dabe range gitangi 10 be dabe tulkwe gitangi 7. Be gululung king ane gitangi 10 giengk giwei dabe range 10 etok, be iro ares 7 bwalbwale giengk bwelk nok dabe tulkwe 7 etok gitangi ge. Be ares nok ane dabe dang-eteik; Yaun bambamo tepwe ebe ihle Pomate ok. Bwelk nok na weik ebe pisi sangas ane ok, be va weik pupkaue as bwelk ebe ital inei bea ok be godo weik ebe bwelk tiate laion godo ok. Be muat bamo galkok geb ane gwang-ne gitangi bwelk nok, be geb ei ve amol bamo (king) weik ete ei ate ok, be geb gwang-ne bamo molge gitangi ei. Be gali bwelk nok ane dabe tulkwe ti weik ebe nolge iro be es vunu gikwai ok. Bemem ei dabe bid nok ande ainggwen be givin vukuri. Amolmol tepwengge ikuri vunu-ngge ve bwelk nok, be ile ivang mul ve ei. Eisir inei uiye be es miengk gitangi muat bamo nok, ve ebe geb gwang-ne gitangi bwelk etok ok, be inei uiye be es miengk gitangi bwelk nok givin weik etok ge be inei; “Amol ret gitangi bwelk etenik? Be amol ret gitangi ebe atob nes valir nitangi ei ok?”

Be Pomate ok ande yab-ge ve ginei bwelk nok nindang ate be avo bambamo be nihle Pomate dang-etok nitangi aiweng 42. Bwelk nok geb avo ponge be gihle Pomate. Ei gihle Pomate are tis ane taku be tis Pomate ane amolmol-gen ebe imbweg gulumb ok. Pomate yab-ge gitangi bwelk nok ve ginei ei nes valir nitangi Pomate ane amolmol-gen be nimbweg niwei eisir. Beti bwelk nok gibweg giwei eisir be geb amolmol vu ti ane ti ane nangge nalk walang ok, be avo ti avo ti be ulis ti ulis ti tepwengge dabin. Be amolmol nalk ane tepwengge ebe ares gisov kapia matawas ane ite, givin ebe Pomate gipasang gulumb tis nalk ite nangge ok, eisir etok tepwengge atob inei uiye be ines miengk nitangi bwelk nok. Be kapia nok, etok bwelk Sipsip ebe warik es vunu ok ane kapia.

Amol ti talngavo ginei giengk, okob niute yaun eteik vevie: 10 Ginei es avos bago ve inei amol etok atob nimbweg kapual-lu, okob amol nok nile nimbweg kapual-lu. Be ginei inei inro amol ti vunu ve buyag valir ane, okob inro ei vunu nitangi ete ande inei ok. Dang-etok ginei gen dang dang-etok ve menihlang, okob yem Pomate ane amolmol-gen, yem unvarkei gwang-ne be unemb aim aplongg-aim givin ta gwang-ne ge.

11 Bekob gali bwelk bumue nok ti vukuri gireu nangge nalk aplo meng-gihlang. Bwelk nok dabe range ailu weik ebe bwelk sipsip natu vaku ane ok. Be ginei yaun be avo weik muat bamo galkok. 12 Be bwelk mate ane galkok geb ane gwang-ne tepwengge gitangi bwelk mul ane etenik, be gilgum kulkul givang bwelk mate ane etok na gili ge, ve gilgum amolmol tepwengge nangge nalk be inei uiye be es miengk gitangi bwelk mate ane galkok, ebe warik bid tiate ti ve nen ei vunu bekob bid nok givin be ainggwen vukuri ok. 13 Bwelk bumue mul ane etenik gilgum gen bwal-bwale bambamo walang molge. Gen bwal-bwale ebe ei gilgum ok ti eteik: Amolmol ivarkei be ili ebe ei gilgum be yev gisov nangge gulumb ginme gitak nalk ok. 14 Pomate ande yab-ge ve ginei ei nilgum gen bwal-bwale bambamo dang dang-etok niengk bwelk mate ane galkok na ge. Ei gilgum ve giyo giyo amolmol nalk ane ve ane gen bambamo ete gilgum gilgum ok, be ginei gitangi amolmol be ginei; “Yem unavku bwelk mate ane ebe warik buyag valir ane ges ei be veve nimat vunu bemem kob ete ande gibweg matawe nik, ane dalgo nireu ei be tis gen subu subu, be avongg-aim nivwat ei are be unei uiye be unes miengk nitangi.” 15 Be Pomate yab-ge ve bwelk mul ane etok be giyuv avo ukwas gisov bwelk mate ane galkok ane dalgo ete ivku bwal-bwale gireu ei be tis gen subu subu ok be ginei yaun vusa. Be ginei amolmol subu bwais be inei uiye be es miengk gitangi ei ite, okob atob ei nes eisir etok vunu.

16 Be bwelk mul ane etok ginei be itak tuvweng ti giengk amolmol tepwengge nas-vatu me bais mol. Amolmol ebe tis ares ok be ebe ares ma ok, be amolmol ebe tis wambal bamo ok tis eisir ebe gen ma ve is ok, be tis amolmol ebe ivang as gen vie-ngge ok tis eisir ebe emb kulkul sinsin-ge be mone ma ve is ok tepwengge. 17 Be ginei indi amol ti tuvweng etok giengk ei bage me na-vatu ite, okob ei gitangi ebe atob nivgo gen me nemb ane gen be amolmol inavgo ok ite ma. Be tuvweng nok, etok bwelk nok ane are, me tanei dang-etok tanei are ane tuvweng. 18 Eitit tand-nitung gen etok vevie be tandi kob. Amolmol ebe itpweng gen are gile gulunge molge ok, inav-naui bwelk bumue etok are etok vevie. Ve namba etok etok amol ti ane are, be namba nok 666.

Copyright information for `KBM