Proverbs 18

Aa padane nipu ode aawaliare nipuna bipa nipuna agu raapo kone-sua awalia.
Aa medaloma nimu epe redepone kone imi page pinawa kone ia.

Epe kone nasu epea napea aamere mo epe pora epe kone meapere gimi omea.
Goa pua nipumi wae pupitagi pape pora ratuaya.

Waea puaaya aamere aa yago medalomare naepe ta-ga pinawa kone ia.
Goa pua nimuna bi ma-oyaawa nimu yalaa waru ma-paaya.

Epe kone i aame agaa tea rabu nipuna-ta agaa mada epe kone mealimiri go agaa epeta-da pageme.
Gore ipa naaku-para rubini popaa koyapape peade-rupa mada pea.

Aa meda wae pupitagi noa koso madaa aaliare go aana koso rabamu laata ne napope.
Gore mo aa nipu koso mada nawini pina rabuaatape.

Epe kone na-i aamere pa onaa raapu yada agu pulalo pea.
Goa pua nipuna agaa pageme rabu otada nipu page tulalo peme.

Kone waru na-i aa medame agaa tea-dare nipuna go agaame nipu ma-oyaaya.
Gore nipuna maa-para yapa-lokena pogaa mada sua maraawa nipu omalia.

Aa medana maa agaa paema rabu go agaa pagape madaa raaname waru omeme.
Go agaare epe redepi-rupa meda yapulu aipapulu pagoa eta mada mea neme.

Wae kiaa rakepene aare nimuna bipa nipu ma-oyaya.
Goa pua nimu kiaa rakepea wae-rupa pimi.

10 Adaa Aa-re puri pabe ada-rupa aaya.
Epe redepone aanu nimu go adapara aloma puaa gopara pua piruaeme.

11 Amone aanu nimuna moneme nimu kutapua ora epe-rupa surubalia kone imi.
Mo ada kagure puri-palo aya-rupa mada kone imi.

12 Gore aa meda nipu pupitagi noa nipuna bi minasaliare orope nipu oyalia.
Nena bipa ne rabu aniawa epe pora narataliri ne epe adaa bi mada nameali.

13 Aane waru lobapaina pirua agaa aba waru pagoa orope agaa abulape.
Neme goa napaliri wae maeyae kone sua pe-pulu orope ne yala pote.

14 Aa meda nipu yaina omoa yapare kone puri paboa piraliare go yaina mada perekealia.
Mo aa nipuna kone oyaliare go aa nipuna kone wala akepua ma-epeaalia pae?

15 Aa meda nipumi epe kone sua nipumi oyae rado rado waru makuaatalo pea yae luabu waru makuaaya.
Go page aa medame agaa mana teme rabu nipumi aane lobapa ina pirua mogo agaa rayo waru pagea.

16 Gore neme adaa aa meda raapu agaa talo pali-daare neme nipu pa ode kalape yae meda aba ripinape.
Goa pali raburi neme nipu mada adali.

17 Aa meda nipu kosona ini-agaa madaa aawa agaa teare nipu koso wini pape nonapiaene agaa tea.
Go yapare pa aa meda agaa waru maredepo yainalo agaa mealia-dare go koso apimi wini palia palo marea.

18 Aa laapona rikiraane koso aapimi ora wini palialo abi nalapaeme raburi apimi wini palia pala marea teme.

19 Nena ame meda wae kone saliri nipumi go kone mea rogasua ne raaname na-omalia. Gore onaa medalome mo ada kagurena pora gape poaeme-rupa mada nimu runane pope-rupa maralimi.
Gore mo aa lapo nipu yada pape agaa loa ki namealipi. Nipuna lo robaa padane-para mada nasalipi. Adaa poragape garulaawa aana kerepo pora rugutade-rupa mada. Goa palipi-pulu nipu ada runane mada napalia.

20 Neme agaa epe-rupa loa redepone-rupa te rabu nena lo robaa-para raana waru palia.

21 Nena tede agaame onaa epe-rupa mapiraali. Nena agaame agu onaa ma-oyaawa onaa maepeaalia.
Goa pe-pulu neme epe agaa lape madaa raname omalimi ne epe-rupa mada pirali.

22 Neme ona meda rumali-daare gore ora epealia.
Goa paliri Gote-me page lo robaa gua epeta kone salia.

23 Naraame amope oyae pawa agaa mea.
Go yapare aamaame agaa puri palo loa abuta.

24 Gore aa meda nipuna adami aa adaapu aaliare go aa nipu oyalia.
Go yapare aa meda nipuna adami aa ora epe rado piaene meda alipiri go aa lapo nipu lo rabaa waru sua nipu lapo ameaya-rupa alipi.
Copyright information for `KEW