Proverbs 19

Aa meda nipu oyae rudu yaliare nipu redepone aa yapulu yaa agaa loa wae pora pami aa rabuaniaaya.

Aa meda nipumi papea namakuaawa yapare pama kalaipu kogono paliare ini namadiaalia.
Aa medame kogono aipapulu palia pare go kogono ora epe-rupa mada napalia.

Gore onaa luabumi nimuna bipa waea pua nimumi Adaa Aa kedaa kaloa wala ratu yaweme.

Aa meda nipu mone adaapu saliare nipuna adami aa page adaapu aalimi.
Go yapare aa meda nipu mone nasaliare mo nipuna adami aanu adapu napitimi.

Gore aa medame yaa agaa loa koso teare nipumi wae yoto mealia.
Goa palia rabu nipu mada napogla palia.

Gore aa adaapumi aa mudu pimi aanu omeme waru peme. Goa pua nipumi nimu raana omenalo.
Oyae pama kane aanu raana omoa go aa nipuna adami aa kone imi.

Gore aa medaa nipu oyae diayalia rabu nipuna amenume page go aa gimeme. Goa peme rabu nipuna adami aanumi page mo aa maasa rilaawa gimeme.
Nipu repara omeme-pi agaa-ta pare nipuna agaa ini namadini pa rasatapa ia.

Aame nipuna bipa epe-rupa piralua kone suare epe pora-para makuae yae mulalo puri waru paloa epe kone meape madaa kogono palia.
Aame makuae yae mua epe konena pora rataliare nipuna epe-rupa pirape yae mua epe-rupa piralia.

Go yapare aa medame koso loa yaa agaa tea-daare nipuna tea yaa agaa mada wae yoto ora mealia.
Go piaene yaa agaa ne aare tumaomalimi.

10 Epe kone na-ia aa nipumi mone oyaenu adaapu su aayare na-epeta.
Naara piri kogono naakimi mo aa mudu wala surubea page ora rado yade.

11 Epe kone i aa nipumi kone gupa ia. Nipu epe kone ia-pulu ratu ratu yawape kone aipapulu naia.
Goa pua aa medame nipu-para waea pea page gimea.

12 Gore mena kiraa-me e waru loa aa mudu king pia aa ratu waru yawea.
Go yapare ratu yawe onaa rabamulalo paliare yai ipua maapu-para eta naape yae ma-opaaya-rupa mada palia.

13 Naaki meda nipu epe kone nasaliare go naakimi nipuna aaraa kedaa waru mea kata.
Gore aa medana oreme ratu yawoa agaa adaapu loaliare nipuna ada runane itipata pabea-rupa tea.

14 Niaana aama aapanumi mone oyaenu rumaa gialimi
pare Gote nipumi epe kone i ona mea gialia.

15 Kiaa rakepene aanu nimu oro yalo pama piruaawa reaeme omoa u keme waru loa patala pu aaeme.

16 Aame Gote-na pora ratua epe-rupa pitiare naoyalia pare nipu ora epe-rupa piralia.
Go yapare aame Gote-na epe kone madaa masa rilaawa waea-nu paliare nipu omalia.

17 Gore neme aa naara meda odome-omoa oyae katalo pali-daare mo Adaa Aame ne madaa rudu ainalo pe.
Goa pali-daare orope Adaa Aa-me nena rudu go abutea.

18 Gore nena naakimi waea pua pupitagi naliare neme nena naaki mana lape. Mana te raburi nipumi epe pora ratalia.
Go yapare neme mana lake pupitagi pa nalaaina gimaliri gore nena naaki riaa omenawa kone sua pe.

19 Gore aa medame rono omoa nipumi waea paliare nipuna go wae yaena yoto mulalo pea.
Go yapare neme nipu rabamua nipuna kedaa mea riali-dare wala orope page nipu rabameaina kone agu sua palia.

20 Go yapare aa medame ne maredepo yawoa epe kone gina kone sali-dare orope ne epe kone waru meali.

21 Aame kone adaa pua sua oyae adaapu palua kone ia
pare Adaa Aa-me pina kone ia-rupa luabu mada palia.

22 Aanumi goa loa lo rogaa i agaa madaa puri palo aaeme. Gore naraa aa apere ota pare pa epeta.
Go aa epe-yaliare mo yaa agaa ne aa ora rabuniaaya.

23 Ne Adaa Aa-na rolo-para piralidare ne epe-rupa pirape yae mea gialia.
Goa palia rabu ne madaa wae yae meda na-epalia rabu ne oro yalo epe-rupa mada pirali.

24 Kiaa raakepene aa nipu ki arota-para pagoa pa pirualiare mo eta yawo i meape yala potea.
Go page kimi musaawa eta mea nape page yala potea.

25 Wae pupitagi ne aa aipuyame tali-daare kone waru na-i aame adoa mada makuaalia. Goa palimi rabu epe kone aba ratua palia.
Go yapare neme epe kone sua aae aanu maredepo yali rabu nimuna makuae yae ora madaa popalia.

26 Naakimi aara ratu yawoa nipuna agi ada-para pane rata saliare
mo nipuna onaa nogo naaki rayo yala mea kataa.

27 Naaki neme epe agaa waru gimaliri kone nai pa maeyae aanuna kone ratua ali.

28 Waea-pi aame koso witnes pulalo epaliri go aa nipumi mo koso ma-oyapena epea.
Go aa nipu mada waea luabu rubita.

29 Wae agaa lo wae pora pameme aanuri nimu wae yoto mealimi.
Goa pua wae pora ratua pupitagi neme aanu nimu aipayame kudu talia.
Copyright information for `KEW