Proverbs 20

Aa-me ipa bia adaapu noa wae agaa adaapu lo yada marekaawa agaa adaapu tea.
Goa pua mo ipa biame nipu surubena teare epe kone nasalia.

Aa mudu king nipumi ratu yawoa puri pane agaa ta rabu onaa paala ma-saaya. Gore mo kiraa mena laiyono-me buai ta-rupa mada king-mi goa pea.
King nipu raatu mayawaaliri nena kagaa piraama lama pope kone wasupa alupalia.

Aa medame yada pape kone gimaliare nipu epe bi mealia.
Go yapare epe kone na-i aamere oro-yalo yada pape agaa agu loaalia.

Kiaa rakepene aame eta wai poape yapi di rabu maapu su naweare kiaa rakepe pea.
Eta naape yapidi rabu naape awolalo pea pare nipu e napoae aame maapu-para pama asapula pea.

Aa-na konere ipa ini adaa naaku piade-rupa mada yade.
Aa meda kone waru makuae aa yaliare go kone ora so mada popea.

Aa adaapumi nimuna adami onaa raaname omema lo gupa teme.
Go yapare aa medana adami aanuri padane padane laatapu aalimi.

Gore aaraa ora epe kone sua epe pora ritua piralia rabu nipuna sinumi raana omalimi.

Gore aa mudu king nipumi koso pagolalo pea raburi mo kaso ta epeme aanuna kone waru adoa rumaaya.

Niri Gote-na ini-agaa mada ora epe redepone aa awayolo aapimi mada tea pae?
Goa pua neme wae yae meda napawa teme?

10 Onaanumi oyae kabenalo pare aa medame makirae agaa tea-daare
Adaa Aa-me go kone adoa rumaamina.

11 Niaame naakinu aba adoa rumaema nipu epe naaki nipu wae naaki lo.
Go rupa agure niaana naakanuri aba adoa makuaema.

12 Adaa Aa-me niaana ini mariayare oyae adamonalo pisa aane ma-saare agaa pagomonalo pisa-ga waru adamina.

13 Ne oro yalo u-pati aa yaliare mone oyae diayalia rabu naara pirali.
Go yapare ne aipapulu rekoa kogono pali-dare nena maapu-para eta oyae adaapu sali.

14 Aa meda oyae kabolalo pea pare mo yaena yoto ora adaa pea rabu nipumi agaa adaapu ta.
Mo yae aba kaboria pua nipuna adami aanu-para gupa pua ta. Go yaere mone ogesi pe yae meda kaboa mea ipulu ta.

15 Epe kone imi onaana agaa teme raburi pa aa medalomana golo rabuaeme.

16 Gore aa medana yago nipumi pa aa medana rudu abulalua agaa loa yapare wala na-abuteadaare waea pea. Gore nipumi epea go napea-daa.
Gore aa-me go piaene agaa meda teadare neme oyae meda mo rudu abune nona pina ora meape.

17 Yaa agaa loa mua ne etanuri rede pi eta meda kone i pare oropere go paake ne etare wae yae yana kone sali.
Go mea ne etare nena agaa peto-para ipa mu-rupa kilulu tea.

18 Neme epe kone aba mealiri orope nena palide kogono epealia.
Nena yada-lore aa raapu yada pulalo pali-daare neme yada akepu palua palo kone waru niminaawa pape.

19 Aa meda yago mada maa agaa pawa yaa agaa ne aa raapu ne ada mua naape. Goa pua neme kudiripi agaa meda lakete rabu wala mo aa meda pua lakeloa laame tea.
Aa go-rupa teadare gipia.

20 Aa medame agi aaraanu wae agaa teare go aa nipu ora omalia.
Gore laba ribaane-para udinita-rupa mada palia.

21 Aa medame agi aaraa lapo pa pirina nipuna moae luabu aba mealiare go oyae luabu epe-rupa mada nasalia.

22 Aa medame ne-para wae paliare neme nipuna wae-yae abi na-abulape.
Dia Adaa Aa-me ne raba mealiaga nipu kone rulape. Goa paliri rabu nena kedaa luabu diayalia.

23 Aame oyae kabenalo ruma sua yaa agaa tere Adaa Aa-me go mada raaname naomea.

24 Adaa Aa-me pora luabu niaa go su-amaa pa piramona aba maredepoya saaya.
Go pora-re aapara pea palo niaa akepua mada makualiama yae?

25 Adaa Aa nipu Gote opa kalape yaere kone aba maarekawa sape.
Neme go opa kaloa aipapu te pare wala orope kone adaapu sali. Neme goa pali-dare nena bipa ne go mabebolaeyae.

26 Epe aa mudu king-mi waea peme onaana koso pagoa nimuna wae-yae adoa rumalia.
Goa pua nimu keda waru katea.

27 Niana kone wasupa Adaa Aa-me gisare wae oyae waru adoa rumaawa piramonalo laba paa-rupa niaa madaa mapirasa.
Gore epe yae gore wae yae lo mada rumawa ado kiritalima.

28 Go yapare king nipumi nipuna onaanu madaa epea agu pua odome omea.
Go paliadaare king nipu epe-rupa pirua nipu ora adaalupu pirualia.

29 Niaame ogegeaanuna puri ado epeta kone ima.
Goa page yomagaenu kama iri adoa nimu adaa bi kateme.

30 Aa medame wae palia rabu neme nipu aipuyame kudu tali rabu nipuna wae yae mada gimalia.
Goa pua nipu ora epe aa piralia.
Copyright information for `KEW