Proverbs 24

19

Neme waea pi aanuna kone madaa raaname na-omape.
Go waea pi aanu raapu pamuape page gimape.
Nimu waea pape agu niminaaeme.
Goa pua nimumi oro yalo wae pupitagi yada papena agaa agu teme.

20

Aa meda nipu epe kone su epe makuae yae raapu piraliadare nipu ora epe ada-rupa pu patea.
Goa pua nipuna ona nogo naaki raayo puri paloa piralimi.
Go piaene aa nipumi yoto adaapu pe yaenu kaboa nipuna ada-para marubia salia.

21

Aa nipu epe kone sua epe makuae waru rubina aaliare go aa nipu ora puri pabe aa alia.
Goa pua nipuna ada kagure page puri waru mapabalia.
King medame ada kagure medapara piri king meda raapu yada pulalo paliare mo epe kone sua makuae aanu madaa kone aba mealiare goa ora epelia.
Goa pua mo yada papena mana page agaa aba waru minaawa yada waru makuae aa adaapu salia-daare mogo pulalo paliade yada ora nipumi mada wini palia.

22

Epe kone-para epe makuae yae laapo-re ora madaa ia-pulu epe kone na-i aanuna kone luabu rabuaniaaya.
Go yapare aanumi agaa adapu teme rabu agaa kone nasapimi aanuri pa agaa loraawa piruaeme.

23

Waea pape mada agu kone niminaalia aare nipu pupikagi nape aa yade teme.
Wae kone imi aanuni oro yalo nimu wae pupitagi nape kone agu niminawaeme. Go pemea luaburi waeana re luabu yade.
Aanumi ademe raburi nimu ora wae aanu-rupa ademe.

24

10 Gore wae yapi-di meda ne alalia rabu nena uni omapaawa ne ora puri ogesi-da page meda ora nasalia.

25

11 Gore koso-me rumaawa aa meda wae napea pare tumaomatalo palimimiri neme go aa wala puaa raba meape.
12 Neme apo yaere niaana ya-daa dia pi nalape. Adaa Aa-me ne ora waru suruboa nena oyaenu page waru rumaa gu aaya-ga adape.
Goa pua neme go agaana re waru makuape. Gore aanu rayo madaa mo nimuna padane padane laatapu pemeana yoto ruma katea.

26

13 Naa si nere epe redepi alumbi apaa nape.
Gore epe eta yapulu agaa-para rede ora waru palia.
14 Gorupare neme waru makuaawa adape epe kone-para epe makuae yae lapore rede pi yae meda mua oro yalo pirali.
Neme go yaenu mealiri epe-rupa pirua ne abi naomali.

27

15 Ne wae aa yaliare neme kudiripu pirua epe aa medana ada-para nasuruba pirape.
Goa puare nipuna oyaenu paake napape.
16 Gore epe redepone aa wae yaeme malopaaliare nipu oro yalo wala rekaa pitia.
Go yapare wae pupitagi ne aanu lopalimiri nimu bebo teme.

28

17 Nena iaa medame kedaa rialia rabu neme epe pia nalape.
Neme oyae meda madaa aa-kidipa pitaawa lopolalo paliare gore neme giri nalape.
18 Gore akolo ya? Adaa Aa-me neme go palide-a adalia rabu mo iaa madaa pape ronore wala ne madaa pina tea-ga waru adape?

29

19 Neme mo waea pemea adoa kedaame na-omape.
Neme goa pali raburi nena kone mabebolalia. Goa pua mo palimide aanu madaa page kone kedaa nameape.
20 Dia go aanu nimu epe yae meda mada na-adasalimi.
Nimu ora laba paa udinita-rupa mada aipapulu omalimi.

30

21 Gore na si nere ora Adaa Aa-na rolo-para page piru aa mudu king-na rolo-para page pawa pirape.
Go rabu wae aanu rol0-para napimi-pulu nimu raapu napirape.
22 Go piaene onaare nimu wae yae repara repara aipapulu mealia.
Adaa Aa-para aa mudu king lapo-me go piaene onaa-re ake piaene yoto katea palo niaa namakuaema.

Epe Agaa medaloma

23 Epe kone i aanu medalomame go agaa kiritaawa isimi.

Gore aa medaloma koso talo peme rabu koso surube aame aa medaloma rabamua medaloma maoyata palimiri otaa.
24 Waea pi aa koso mada adialimi pare mo koso pagoa rumae aame nipu na-adini pa penatea.
Goa palia raburi ada kagure-nini piri onaame go koso pagoa-rumae aa nipu ero loa marakepeae agaa adaapu teme.
25 Go yapare mo koso pagea aame waea pi aanu adialepape teare nipu eperupa pirua epe yaenu mealia.

26 Epe redepone agaame abutea-daare go aare nena adami aa.

27 Neme aba ripia maapu poa su maredepo yaawoare orope gopare ada paina.

28 Gore neme aa medana koso rabamua talo palidare neme pama pupitagi nane aa loa go aa narabameape.
29 Go page pa aa meda madaa neme abia nipuna wae yae abutalo pi nalape.
Aba ni go aa-me waea pisa-da wala abutalo pi nalape.

30 Ni pora pamua epe kone naiwae kiaa rakepene aa medana e maapu pa mu adawa.
31 Go maapu ripu wae-para itutu medaloma page opea.
E-kepore aana-me pi yapare aba robapapepu lopisana.
32 Neme go maapu adoa kone adaapu mua ni makuae yae ora waru meawa.
33 Wae kiaa rakepene aame goa teme:
Palainawa loa u ogeda pateme.
Goa pua ki arota-para pagoa kiaa rakepea pimi.
34 Nimumi goa peme rabu oyae luabu aipapulu diayoa naraa onaa pirualimi.
Go rabu nimuna oyae luabu paake ne aanumi mube nona palia.
Copyright information for `KEW